U Minsku pastavili pomnik ź impierskim arłom. Adkryvać pryjechaŭ pamočnik Pucina FOTY
Cyrymoniju aśviačeńnia pravioŭ kiraŭnik Biełaruskaj pravasłaŭnaj carkvy mitrapalit Vienijamin.
12 sakavika 2025 hoda na Vajskovych mohiłkach u Minsku byŭ adkryty novy pomnik sałdatam Rasijskaj impieratarskaj armii, jakija zahinuli padčas Pieršaj suśvietnaj vajny.
U mierapryjemstvie pryniaŭ udzieł pamočnik prezidenta Rasii i staršynia Rasijskaha vajenna-histaryčnaha tavarystva Uładzimir Miadzinski, viadomy svajoj rollu ŭ prapahandysckaj dziejnaści Kramla.
Pomnik, ustalavany na brackaj mahile nieviadomych sałdat, mieścicca kala chrama Alaksandra Nieŭskaha i maje vyhlad, jaki imituje histaryčny. Heta vysoki abielisk z čornaha marmuru z kryžam na viersie, reljefnym hierbam Rasijskaj impieryi i nadpisam:
«Zdieś pokojatsia voiny Russkoj impieratorjskoj armii, pavšije pri zaŝitie Otiečiestva v 1915 hodu. Upokoj, Hospodi, ich duši».
Pomnik byŭ pastaŭleny jašče letaś za košt Rasijskaha vajenna-histaryčnaha tavarystva, pra što śviedčyć nadpis na zadnim baku pomnika, ale adkryty jon byŭ tolki ciapier.
Nijakaj asablivaj nieabchodnaści źmiaščać impierskuju simvoliku na pomniku nie było, kali nie ličyć ideałahičnaj pracy rasijskich ahientaŭ upłyvu ŭ Biełarusi.
Mitrapalit Vienijamin adznačyŭ, što miesca pachavańnia doŭhi čas zastavałasia viadomym tolki starejšym parafijanam carkvy, ale ciapier jano atrymała naležnaje ŭšanavańnie.
«My znachodzimsia na brackaj mahile nieviadomych sałdat Rasijskaj impieratarskaj armii. Pieršaja suśvietnaja vajna doŭhija hady ličyłasia zabytaj, i pamiać pra jaje hierojaŭ taksama była stračanaja», — zajaviŭ padčas cyrymonii Miadzinski.
Cikava, što ŭ hety ž dzień Miadzinski paviedamiŭ, što Rasija pracuje nad sinchranizacyjaj školnych padručnikaŭ pa historyi ź Biełaruśsiu. Pavodle jaho słoŭ, rasijski bok užo atrymaŭ prapanovy i karekciroŭki ad Instytuta historyi Akademii navuk Biełarusi, jakija buduć uličanyja ŭ padručnikach.
«My pryniali ŭsie hetyja parady, niešta padpravili, niešta ŭdakładnili», — skazaŭ pamočnik Pucina.
Na cyrymonii mitrapalit Vienijamin uručyŭ Miadzinskamu «ŭnikalnuju» ikonu śviatoha kniazia Alaksandra Nieŭskaha «na znak padziaki za zachavańnie histaryčnaj pamiaci».
Akramia taho, miedalami śviatoha Kiryła Turaŭskaha byli ŭznaharodžanyja namieśnik kiraŭnika Kiraŭnictva spravami prezidenta Rasii pa dziaržaŭnaj palitycy ŭ humanitarnaj śfiery Mikałaj Aŭsijenka i savietnik pasolstva Rasii ŭ Biełarusi Siarhiej Afonin.
Heta nie pieršy vypadak, kali Rasija praz kulturnyja i histaryčnyja inicyjatyvy ŭzmacniaje svoj upłyŭ u Biełarusi. Takija padziei, jak adkryćcio pomnikaŭ i ŭzhadnieńnie padručnikaŭ, śviedčać pra imknieńnie Kramla da infarmacyjnaha i ideałahičnaha daminavańnia ŭ biełaruskim adukacyjnym i hramadskim poli.
«Naša Niva» — bastyjon biełaruščyny
PADTRYMAĆCiapier čytajuć
Pajšoŭ z žyćcia 32-hadovy Maksim Čarniaŭski — zasnavalnik supołki «Nadakučyŭ nam hety Łukašenka» pačatku 2010-ch22
Kamientary