Niamieckija ekśpierty znajšli ŭ dubajskim šakaładzie šmat cukru i navat ślady hrybka

Vynajdzieny ŭ minułym hodzie ŭ Dubai šakaład z pastaj ź fistašak i tonkimi chrabustkimi nitkami ź ciesta kadajf vyklikaŭ ejfaryju va ŭsim śviecie. Ciapier jaho kopii i varyjacyi ŭ tym ci inšym vyhladzie aktyŭna stvarajuć i pradajuć taksama i ŭ Hiermanii — jak nievialikija kandytarskija, tak i bujnyja vytvorcy prysmakaŭ. Na kaladnych kirmašach jon staŭ sapraŭdnym chitom.

I choć taki šakaład u Hiermanii ciapier nazyvajecca nie dubajskim, a «ŭ dubajskim styli» — tak pastanaviŭ Kiolnski ziamielny sud, kab nie ŭvodzić spažyŭca ŭ zman, asacyjacyja ź viadomym praduktam, a adpaviedna i peŭnyja čakańni jakaści ad hetaha nikudy nie źnikli.

Hałoŭny niamiecki fond niezaležnaj ekśpiertyzy tavaraŭ i pasłuh Stiftung Warentest vyrašyŭ pravieryć, ci vyhadny hety sałodki trend nie tolki dla vytvorcaŭ i pradaŭcoŭ, ale i dla kupcoŭ — i pratestavaŭ skład dastupnaha ŭ krainie «dubajskaha šakaładu». Vyniki akazalisia niesuciašalnymi.

U niekatorych plitkach — hrybki i mahčymyja kancerahieny

«My nie vyjavili ni ŭnikalnaha smaku, ni vydatnaj jakaści», — kanstatavali niezaležnyja ekśpierty 18 sakavika. Jany zrabili starannamy analiz u łabaratoryi šeść plitak hetaha prysmaku ŭ cenavym dyjapazonie ad 7 da 25 jeŭra za 100 hram. Dźvie ź ich — z Dubaja, adna vyrablena ŭ Turcyi, adna — u Niderłandach i jašče dźvie — u Hiermanii.

U niekalkich ź ich zamiest vytančanych inhredyjentaŭ byli vyjaŭlenyja škodnyja rečyvy. Uzory z Dubaja ŭtrymlivali 3-monachłorprapandyjoł i hlicydziłavyja efiry, jakija ŭźnikajuć u pracesie rafinavańnia raślinnych alejaŭ. Hetyja rečyvy časta sustrakajucca ŭ rafinavanym palmavym alei i ličacca patencyjna kancerahiennymi.

Akramia taho, adzin z dubajskich ekzemplaraŭ byŭ zabrudžany afłataksinami ź pleśnievych hrybkoŭ — kancerahiennymi rečyvami, jakija šyroka raspaŭsiudžanyja ŭ fistaškach.

«Nijakich nastupstvaŭ dla zdaroŭja ad užyvańnia šakaładu nie čakajecca. Adnak vyjaŭleńnie škodnych rečyvaŭ niesumiaščalnaje z abiacańniem najvyšejšaj jakaści», — padkreślivajuć ekśpierty.

Načynka z cukru i raślinnaha aleju

Astatnija čatyry plitki nie ŭtrymlivali škodnych rečyvaŭ, ale jany nie byli čymści asablivym z kulinarnaha punktu hledžańnia. Jarka vyražany smak fistašak, pa słovach niezaležnych ekśpiertaŭ fondu, adčuvaŭsia tolki ŭ adnym pradukcie z AAE, — u astatnich piaci ekzemplarach tolki zvyčajny arechavy prysmak.

Samaje vysokaje zadekłaravanaje ŭtrymańnie fistašak dasiahaje 19 adsotkaŭ. Na troch plitkach hetaja infarmacyja całkam adsutničała.

Pavodle danych fondu Stiftung Warentest, načynka pravieranaha im šakaładu składajecca ŭ asnoŭnym z cukru i raślinnaha aleju, a niekatoryja ekzemplary taksama ŭtrymlivajuć aramatyzatary i farbavalniki. Pry hetym markiroŭka čatyroch z šaści plitak uvodziła ŭ zman — naprykład, na joj nie było infarmacyi ab dadatkach abo adznak dla alerhikaŭ.

U svaim zaklučeńni fond Stiftung Warentest ličyć ejfaryju vakoł «dubajskaha šakaładu» nieabhruntavanaj. Ekśpierty rekamiendujuć kłasičny fistaškavy šakaład jak niedarahuju alternatyvu.

Kali ž chočacca mienavita prysmakaŭ u dubajskim styli, to jaho možna pryhatavać i samastojna — u internecie mnostva receptaŭ. Usio, što spatrebicca, — heta šakaład, «vałasy anioła» z kramy ŭschodnich prysmakaŭ, masła, kunžutnaja pasta i fistaškavy krem.

• 3
• 0
• 3
• 1
• 0
• 0
• 0
• 0