U Biełarusi stvarajuć «adukacyjny chab nie horšy za Harvard». Što heta budzie?
Adukacyjny chab chočuć stvaryć na bazie BDU.
«Adukacyjny chab z sučasnym studenckim kampusam moža źjavicca na bazie BDU — kancepcyja ŭžo raspracavanaja. U kłastar uvojduć vučebnyja karpusy, navukovyja łabaratoryi, internaty, kulturna-spartyŭny centr. Lekcyi buduć čytać najlepšyja vykładčyki krainy — prapanujecca vykarystoŭvać kadravy i navukovy patencyjał nie tolki BDU, ale i inšych univiersitetaŭ, a taksama navukovych i vytvorčych arhanizacyj. Takim čynam, my prakładziem absalutna ŭnikalnuju darohu dla vypusknikoŭ Nacyjanalnaha dziciačaha technaparka, dla talenavitaj i adoranaj moładzi škoł, himnazij, licejaŭ», — raskazaŭ u intervju sb.by ministr adukacyi Andrej Ivaniec.
Chab budzie «suśvietnaha ŭzoru nie horšy za Harvard», piša dziaržaŭnaja hazieta.
Pa słovach Ivanca, arhanizujecca apieradžalnaja padrychtoŭka studenta.
«Ujavicie sabie: śpiecyjalista z vyšejšaj adukacyjaj my padrychtujem užo na praciahu pieršych dvuch z pałovaj hadoŭ — u centry na 1—3 kursach buduć intensiŭna vyvučacca fundamientalnyja dyscypliny. Na 4—5 kursach pryjarytet budzie addadzieny praktyčnaj padrychtoŭcy ŭ bazavych arhanizacyjach. Kožny student budzie ŭciahnuty ŭ navukova-daśledčuju i praktyčnuju dziejnaść. Stažyroŭki dla ich buduć prachodzić nie tolki ŭ biełaruskich adukacyjnych i navukovych centrach, ale i za miažoj», — kaža ministr.
Pa jaho słovach, vypusknik novaj ustanovy, naprykład fizik, budzie vałodać surjoznymi viedami nie tolki pa svajoj śpiecyjalnaści, ale i ŭ halinie chimii, matematyki, infarmacyjnych technałohij — jon zmoža pracavać u luboj inavacyjnaj śfiery, a dla hetych met buduć raspracavanyja adukacyjnyja standarty novaha pakaleńnia, jakija buduć istotna intensifikavanyja ŭ paraŭnańni ź dziejučymi.
«Zapłanavanyja čatyry napramki navučańnia: prykładnaja fizika i infarmatyka; prykładnaja matematyka, miechanika i infarmatyka; fundamientalnaja i prykładnaja chimija; fundamientalnaja hieahrafija. Biezumoŭna, nie kožny małady čałaviek zmoža zasvoić prapanavanyja abjomy infarmacyi, tamu pracedura adboru dla pastupleńnia na hetyja śpiecyjalnaści budzie asablivaj. Važna razumieć: my majem namier vypuskać unikalnych śpiecyjalistaŭ z asablivymi kampietencyjami — budučych hałoŭnych inžynieraŭ, technołahaŭ, kanstruktaraŭ, kiraŭnikoŭ navukovych arhanizacyj», — zaklučyŭ ministr adukacyi.
Kamientary