Vizit Vensa ŭ Hrenłandyju: vice-prezident ZŠA raspavioŭ pra pahrozy z boku Rasii i paabiacaŭ nie ŭžyvać siłu

Pavodle jaho słoŭ, ZŠA pavažajuć prava miascovych žycharoŭ na samavyznačeńnie, ale majuć namier zabiaśpiečyć lidarstva ŭ Arktycy, kab supraćstajać pahrozam z boku Rasii i Kitaja.

Vens taksama raskrytykavaŭ miascovyja ŭłady, jakija, na jaho dumku, nie zdoleli zabiaśpiečyć biaśpieku vostrava, i vykazaŭ zdahadku, što Hrenłandyja atrymaje niezaležnaść i mirna dałučycca da ZŠA.

Vizit Vensa praciahvaŭsia kala dźviuch hadzin. Za hety čas jon paśpieŭ paabiedać z amierykanskimi vajskoŭcami i parazmaŭlać z žurnalistami, jakija jaho supravadžali.

U Hrenłandyju Vens prybyŭ razam z žonkaj Ušaj, daradcam Trampa pa nacyjanalnaj biaśpiecy Majkam Uołtcam, ministram enierhietyki Krysam Rajtam, sienataram ad štacie Juta Majkam Li i byłoj namieśnicaj daradcy pa nacbiaśpiecy Džulijaj Niešejvat — žonkaj Uołca.

Ułady Hrenłandyi i Danii, jakoj naležyć vostraŭ, nazvali vizit amierykanskaj delehacyi pravakacyjaj i demanstracyjaj siły. Premjer-ministar Danii Miete Frederyksien asudziła rašeńnie naviedać vostraŭ biez aficyjnaha zaprašeńnia i nazvała heta «nieprymalnym ciskam».

Raniej Donald Tramp zajaŭlaŭ, što ZŠA patrebny arktyčny vostraŭ dla zabieśpiačeńnia nacyjanalnaj i mižnarodnaj biaśpieki i nie vyklučaŭ prymianieńnia siły dla jaho atrymańnie. «Jak vy ŭsie viedajecie, prezident sapraŭdy zacikaŭleny ŭ biaśpiecy Arktyki», — skazaŭ Vens, prybyŭšy ŭ stałoŭku kaśmičnaj bazy na paŭnočnym zachadzie Hrenłandyi.

Padčas pres-kanfierencyi, adkazvajučy na pieršaje pytańnie, Vens zajaviŭ, što ZŠA pakul nie majuć płanaŭ pa pašyreńni vajennaj prysutnaści ŭ Hrenłandyi. Adnak amierykanskija ŭłady płanujuć inviestavać u budaŭnictva ledakołaŭ i vajennych karabloŭ, jakija buduć dysłakavacca ŭ rehijonie.

Pavodle słoŭ Vensa, mnohija amierykancy, mahčyma, nie razumiejuć, čamu Arktyka maje takoje značeńnie dla nacyjanalnaj biaśpieki. Zadača amierykanskich vajskoŭcaŭ u Hrenłandyi — adsočvańnie rakietnych pahroz i papiaredžańnie mahčymych pavietranych napadaŭ.

Vens padkreśliŭ, što kali ZŠA nie prajaviać cikavaści da Hrenłandyi, heta zrobiać inšyja — Rasija i Kitaj, jakija aktyŭna pašyrajuć prysutnaść u rehijonie.

«My viedajem, što Rasija, Kitaj i inšyja krainy prajaŭlajuć cikavaść da arktyčnych kalidoraŭ i marskich šlachoŭ, a taksama da karysnych vykapniaŭ. My pavinny zabiaśpiečyć lidarstva Amieryki ŭ Arktycy», — skazaŭ vice-prezident.

«My nie možam zaryvać hałavu ŭ piasok — ci, u dadzienym vypadku, u śnieh — i rabić vyhlad, što kitajcy nie zacikaŭlenyja ŭ hetaj terytoryi», — dadaŭ jon. «My sapraŭdy majem roznahałośsi z kiraŭnictvam Danii, jakoje niedastatkova invieściruje ŭ Hrenłandyju i nie ŭdzialaje ŭvahi ŭmacavańniu svajoj architektury biaśpieki. Heta nieabchodna źmianić. Palityka ZŠA — damahacca mienavita hetaha», — zajaviŭ Vens.

Adkazvajučy na pytańnie pra abiacańnie Trampa ŭziać vostraŭ pad kantrol, Vens adznačyŭ, što ZŠA pavažajuć prava žycharoŭ Hrenłandyi na samavyznačeńnie i vystupajuć za dyjałoh.

Na jaho dumku, hrenłandcy «zrobiać vybar na karyść niezaležnaści» i sami vyznačać svoj dalejšy los, zaklučyŭšy damovu z ZŠA.

«My nie ličym, što vajennaja siła kali-niebudź spatrebicca», — skazaŭ jon.

Pavodle studzieńskich apytańniaŭ, pieravažnaja bolšaść žycharoŭ Hrenłandyi vystupaje suprać płanaŭ Donalda Trampa pa anieksii vostrava.

U čaćvier žychary stalicy Hrenłandyi, horada Nuuk, ustanavili ŭ śniezie ściahi i kardonnuju šyldu z nadpisam pa-anhlijsku: «Naša ziamla. Naša budučynia», paviedamlaje Reuters.

Na vostravie taksama prajšli demanstracyi — udzielniki byli ŭ biejsbołkach z nadpisam «Make America Go Away», jakaja paradyruje pieradvybarčy słohan Donalda Trampa.

• 0
• 0
• 1
• 1
• 1
• 0
• 4
• 0