Візіт Вэнса ў Грэнландыю: віцэ-прэзідэнт ЗША распавёў пра пагрозы з боку Расіі і паабяцаў не ўжываць сілу

Паводле яго слоў, ЗША паважаюць права мясцовых жыхароў на самавызначэнне, але маюць намер забяспечыць лідарства ў Арктыцы, каб супрацьстаяць пагрозам з боку Расіі і Кітая.

Вэнс таксама раскрытыкаваў мясцовыя ўлады, якія, на яго думку, не здолелі забяспечыць бяспеку вострава, і выказаў здагадку, што Грэнландыя атрымае незалежнасць і мірна далучыцца да ЗША.

Візіт Вэнса працягваўся каля дзвюх гадзін. За гэты час ён паспеў паабедаць з амерыканскімі вайскоўцамі і паразмаўляць з журналістамі, якія яго суправаджалі.

У Грэнландыю Вэнс прыбыў разам з жонкай Ушай, дарадцам Трампа па нацыянальнай бяспецы Майкам Уолтцам, міністрам энергетыкі Крысам Райтам, сенатарам ад штаце Юта Майкам Лі і былой намесніцай дарадцы па нацбяспецы Джуліяй Нешэйват — жонкай Уолца.

Улады Грэнландыі і Даніі, якой належыць востраў, назвалі візіт амерыканскай дэлегацыі правакацыяй і дэманстрацыяй сілы. Прэм’ер-міністар Даніі Метэ Фрэдэрыксен асудзіла рашэнне наведаць востраў без афіцыйнага запрашэння і назвала гэта «непрымальным ціскам».

Раней Дональд Трамп заяўляў, што ЗША патрэбны арктычны востраў для забеспячэння нацыянальнай і міжнароднай бяспекі і не выключаў прымянення сілы для яго атрыманне. «Як вы ўсе ведаеце, прэзідэнт сапраўды зацікаўлены ў бяспецы Арктыкі», — сказаў Вэнс, прыбыўшы ў сталоўку касмічнай базы на паўночным захадзе Грэнландыі.

Падчас прэс-канферэнцыі, адказваючы на першае пытанне, Вэнс заявіў, што ЗША пакуль не маюць планаў па пашырэнні ваеннай прысутнасці ў Грэнландыі. Аднак амерыканскія ўлады плануюць інвеставаць у будаўніцтва ледаколаў і ваенных караблёў, якія будуць дыслакавацца ў рэгіёне.

Паводле слоў Вэнса, многія амерыканцы, магчыма, не разумеюць, чаму Арктыка мае такое значэнне для нацыянальнай бяспекі. Задача амерыканскіх вайскоўцаў у Грэнландыі — адсочванне ракетных пагроз і папярэджанне магчымых паветраных нападаў.

Вэнс падкрэсліў, што калі ЗША не праявяць цікавасці да Грэнландыі, гэта зробяць іншыя — Расія і Кітай, якія актыўна пашыраюць прысутнасць у рэгіёне.

«Мы ведаем, што Расія, Кітай і іншыя краіны праяўляюць цікавасць да арктычных калідораў і марскіх шляхоў, а таксама да карысных выкапняў. Мы павінны забяспечыць лідарства Амерыкі ў Арктыцы», — сказаў віцэ-прэзідэнт.

«Мы не можам зарываць галаву ў пясок — ці, у дадзеным выпадку, у снег — і рабіць выгляд, што кітайцы не зацікаўленыя ў гэтай тэрыторыі», — дадаў ён. «Мы сапраўды маем рознагалоссі з кіраўніцтвам Даніі, якое недастаткова інвесціруе ў Грэнландыю і не ўдзяляе ўвагі ўмацаванню сваёй архітэктуры бяспекі. Гэта неабходна змяніць. Палітыка ЗША — дамагацца менавіта гэтага», — заявіў Вэнс.

Адказваючы на пытанне пра абяцанне Трампа ўзяць востраў пад кантроль, Вэнс адзначыў, што ЗША паважаюць права жыхароў Грэнландыі на самавызначэнне і выступаюць за дыялог.

На яго думку, грэнландцы «зробяць выбар на карысць незалежнасці» і самі вызначаць свой далейшы лёс, заключыўшы дамову з ЗША.

«Мы не лічым, што ваенная сіла калі-небудзь спатрэбіцца», — сказаў ён.

Паводле студзеньскіх апытанняў, пераважная большасць жыхароў Грэнландыі выступае супраць планаў Дональда Трампа па анексіі вострава.

У чацвер жыхары сталіцы Грэнландыі, горада Нуук, устанавілі ў снезе сцягі і кардонную шыльду з надпісам па-англійску: «Наша зямля. Наша будучыня», паведамляе Reuters.

На востраве таксама прайшлі дэманстрацыі — удзельнікі былі ў бейсболках з надпісам «Make America Go Away», якая парадыруе перадвыбарчы слоган Дональда Трампа.

• 0
• 0
• 1
• 1
• 1
• 0
• 4
• 0