Chto ź biełarusaŭ trapiŭ na pryjom da prezidenta Polščy ŠMAT FOTA
U varšaŭskim pałacy Bielvieder 13 studzienia prajšoŭ kaladny pryjom u prezidenta Polščy Karala Naŭrockaha. Na jaho pa tradycyi zaprasili pradstaŭnikoŭ biełaruskaj dyjaspary.
Siarod haściej byli biełaruskija palityki, byłyja palitviaźni, dziejačy kultury, žurnalisty i inšyja pradstaŭniki hramadskaj supolnaści.
Aproč Śviatłany Cichanoŭskaj i jaje daradcaŭ Franaka Viačorki i Dzianisa Kučynskaha, byli taksama kiraŭnik Narodnaha antykryzisnaha ŭpraŭleńnia Pavieł Łatuška, «ministarka ekanomiki» ŭ Abjadnanym pierachodnym kabiniecie Alisa Ryžyčenka, vice-śpikierka Kaardynacyjnaj rady Liza Prakopčyk.
Pradstaŭniki «Biełpoła» Uładzimir Žyhar i Maćviej Kuprejčyk taksama stali haściami ŭ Bielviedery.
Možna było zaŭvažyć lidara «Jeŭrapiejskaj Biełarusi», kandydata ŭ prezidenty — 2010 Andreja Sańnikava i hałoŭnuju redaktarku «Chartyi-97» Natallu Radzinu.
Zaprasili niadaŭna vyzvalenych palitviaźniaŭ — redaktarku Marynu Zołatavu, advakata Maksima Znaka (jon dla pryjomu abraŭ vyšyvanku), žurnalistku Ksieniju Łuckinu.
Žurnalist «Jeŭraradyjo» Źmicier Łukašuk padaryŭ Karalu Naŭrockamu svaju knihu. Siarod zaprošanych taksama błohier Hleb Siamionaŭ (adzin ź viadučych papularnaha jutub-šou «O(b)sudžajem» pryjšoŭ u pryhožym pinžaku z vałoškami), Maksim Paršuta i Kirył Žaŭtok, jakija zapuścili padkast «Zroblena ŭ Polščy», analityk Arciom Šrajbman, sacyjołah Ryhor Astapienia.
Kupałaviec Aleh Harbuz i aktorka dy vydaŭca aŭdyjaknih Kryścina Drobyš, jakija paśla 2020 hoda vymušany byli pierajechać za miažu, byli viadoŭcami kulturnaj častki pryjomu.
Byŭ taksama advakat Illa Salej i kiraŭnik Moładzievaha chaba ŭ Varšavie Aleś Łapko.
U pieršym šerahu možna było zaŭvažyć Marynu Hiryn i Jaŭhiena Buraha, zasnavalnikaŭ Asacyjacyi biełaruskaha biznesu za miažoj ABBA. «Kali b u mianie była takaja opcyja — admovicca ad udziełu na karyść inšaha (naprykład, palitviaźnia) — ja b z zadavalnieńniem heta zrabiŭ. Ale jaje nie było», — pisaŭ paru dzion tamu Bury, kali razharełasia dyskusija vakoł śpisaŭ zaprošanych.
Ideja kaladnych pryjomaŭ u prezidenta Polščy źjaviłasia naprykancy 2021 hoda, kali prezident Andžej Duda prapanavaŭ Cichanoŭskaj pravieści supolnaje mierapryjemstva dla biełarusaŭ u Polščy. Pry Naŭrockim tradycyja zastałasia.
Ciapier čytajuć
Maryna Adamovič apublikavała novyja FOTY Mikoły Statkieviča2
Kamientary