10-hadovaja biełaruska stała miedalistkaj čempijanatu Izraila pa himnastycy. Jaje baćki pierad tym musili ŭciakać ź Biełarusi
Try hady tamu siamja Marty Baradzinoj musiła ŭciakać ź Biełarusi paśla taho, jak jaje baćku zatrymali za fatahrafii rasijskich vajskoŭcaŭ. U razmovie z «Radyjo Svaboda» Aleh i Marta Baradziny raskazali pra pośpiechi na novym miescy.
Nacyjanalny čempijanat Izraila pa mastackaj himnastycy siarod kamandaŭ prachodziŭ u Tel-Avivie ŭ kancy sakavika. U składzie ŭdzielnic kłuba «Sechlavim Ašdod» była i 10-hadovaja Marta Baradzina, jakaja jašče try hady tamu žyła z baćkami ŭ biełaruskim Homieli i navat nie dumała, što kaliści budzie vystupać za miažoj. Kamanda Marty ŭ vyniku zaniała druhoje miesca, a biełaruska atrymała srebrany miedal naroŭni ź inšymi ŭdzielnicami.
«Majo pieršaje ŭražańnie paśla spabornictvaŭ było drennym, — raskazała sama Marta Svabodzie. — My ŭsie byli rasčaravanyja druhim miescam. Ale našy supiernicy — vielmi mocnaja kamanda. Ź jakasnaj prahramaj, z vysokim uzroŭniem padrychtoŭki. Tamu my prajhrali mocnym supiernikam, i druhoje miesca — taksama dobra».
Pavodle słoŭ junaj biełaruski, jana paśla spabornictvaŭ vyrašyła praciahvać zaniatki himnastykaj. Marta choča vyjści na darosły prafiesijny ŭzrovień.
«Za dva hady chaču heta zrabić, — kaža biełaruska. — Zdać usie narmatyvy i vyjści ŭ prafiesijnuju lihu. Dla hetaha mnie treba budzie šmat treniravacca i pastajanna pieramahać va ŭsich čempijanatach».
Meblevaja firma i ŭcioki z Homiela
U Izraili siamja Marty žyvie adnosna niadaŭna. 29 sakavika 2022 hoda jaje baćku Aleha Baradzina zatrymali ŭ Homieli, abvinavaciŭšy ŭ fatahrafavańni rasijskich vajskoŭcaŭ, jakija ŭdzielničali va ŭvarvańni na terytoryju Ukrainy. Jak raskazvaŭ «Radyjo Svaboda» sam Baradzin, jon sfatahrafavaŭ dvuch vajskoŭcaŭ, jakija išli z kramy z pakietami praduktaŭ i ałkaholu, užo budučy napadpitku.
Baradzinu prysudzili «sutki» i paśla ich adbyćcia vypuścili na volu. Praź niekalki dzion jon užo byŭ u Hruzii, kudy vyjechaŭ praz Rasiju i Armieniju. U Homieli zastaŭsia biznes, a siamja zmahła vyjechać tolki praź niejki čas.
«U nas u Biełarusi była svaja meblevaja firma. I ŭ Hruzii ja praz čatyry miesiacy paśla ŭładkavańnia staŭ vykanaŭčym dyrektaram meblevaha pradpryjemstva. Možna było žyć u Hruzii, bo i hrošaj chapała, i niejkija suviazi źjavilisia, ale tam vielmi prarasijski režym. Taksama ja nie moh tam adkryć bankaŭski rachunak, patrebny dla atrymańnia časovaha dazvołu na žycharstva», — raskazvaŭ Aleh Baradzin «Radyjo Svaboda».
Paśla pierajezdu ŭ Izrail Aleh Baradzin uładkavaŭsia cieślarom, zajmaŭsia vytvorčaściu draŭlanych vyrabaŭ. Kali ŭ Izraili pačalisia poŭnamaštabnyja bajavyja dziejańni suprać hrupoŭki CHAMAS, pajšoŭ u vałanciory. Dapamahaŭ paciarpiełym i izrailskim vajskoŭcam.
Jak raskazaŭ «Radyjo Svaboda» Aleh, jahonaja dačka Marta pačała zajmacca mastackaj himnastykaj davoli daŭno, jašče ŭ Homieli.
«My z žonkaj addali Martu ŭ SDIUŠAR №4 u Homieli — śpiecyjalizavanuju dziciača-junackuju škołu alimpijskaha reziervu na vulicy Karpoviča, — raskazvaje Aleh Baradzin. — Navučańnie ŭ hetym uzroście ŭ Biełarusi płatnaje. U 2020 hodzie zaniatki kaštavali kala 50 rubloŭ u miesiac. Paśla piaci hadoŭ spartyŭnyja škoły pieravodziać płatnyja hrupy na biudžetnaje finansavańnie, i zaniatki stanoviacca biaspłatnymi dla dziaciej».
Baradziny addali dačku na himnastyku, bo paličyli hety vid sportu aptymalnym dla dziaŭčynki. Na ich dumku, heta idealnaja startavaja placoŭka, jakaja raźvivaje fizična i ŭmacoŭvaje ŭpeŭnienaść u sabie.
Trenierka z Tadžykistana
Paŭnavartasnyja zaniatki himnastykaj Marta adnaviła ŭžo paśla pierajezdu Baradzinych u Izrail u sakaviku 2024 hoda. Zaniatki maładaja biełaruska pačała ŭ škole «David Ełazar» u horadzie Kirjat-Hat u trenierki Rachiel Kimiaharavaj, jakaja pachodzić z Tadžykistana.
Pavodle słoŭ Aleha Baradzina, u Izraili studyi mastackaj himnastyki bolš kamiercyjnyja, čym u Biełarusi. Škoły časta prosta zarablajuć na žadańni dziaciej zajmacca sportam. Adnak Kimiaharava adroźnivałasia ad inšych u lepšy bok. Zaraz Marta zajmajecca ŭžo ŭ inšaj škole ŭ horadzie Ašdod, u kamandzie «Sechlavim Ašdod».
«Marcie było dastatkova składana, spatrebiłasia paŭhoda ciažkich trenirovak, kab atrymać miesca ŭ asnoŭnym składzie. Kalektyŭ užo skłaŭsia, dziaŭčaty prycierlisia, spracavalisia», — raskazvaje Aleh Baradzin.
Jon dadaje, što padychody da navučańnia i trenirovak u Izraili mocna adroźnivajucca ad biełaruskich. Tut usio bolš kamiercyjalizavana, mienš nakiravana mienavita na spartyŭnyja dasiahnieńni, ličyć baćka maładoj himnastki. Na jahonuju dumku, heta maje jak stanoŭčyja baki, tak i admoŭnyja.
«U Biełarusi strohaść — norma. U Izraili ž pieravažajuć usiodazvolenaść i miakkaść, jakija časam dachodziać da absurdu. Tut dzicia, jakoje zrabiła dziesiać pamyłak i adzin raz dasiahnuła pośpiechu, uschvalajuć jak hieroja», — raskazvaje Aleh Baradzin.
Baćku taki padychod krychu dzivić. Jak kaža surazmoŭca, praz brak dastatkovaj uvahi da pamyłak maładym spartsmienam ciažej demanstravać prahres. Niahledziačy na heta, Aleh Baradzin pierakanany, što Marta zmoža naroščvać svaje prafiesijnyja spartyŭnyja pośpiechi.
«Jana moža pieraskočyć praz usie pramiežkavyja etapy i adrazu vyjści na pačatkovy ŭzrovień spartyŭnaha patoku. Jość ceły śpis narmatyvaŭ, jakija dla hetaha treba vykanać. U teoryi pry naležnaj padrychtoŭcy jana zmoža pasprabavać zdać narmatyvy ŭžo da sioletniaj vosieni», — havoryć Aleh Baradzin.
Kamientary
[Zredahavana]