Źniavoleny krytyk Pucina, jaki dakładna pradkazvaŭ chod vajennych dziejańniaŭ u 2022 i 2024 hadach, ličyć, što letni nastup ukrainskaj armii moža skončycca parazaj Rasii.
Pałkoŭnik FSB Ihar Hirkin (Strałkoŭ) kamandavaŭ šturmavikami, jakija ŭ krasaviku 2014 hoda raspačali zachop Danbasa. U 2022-m jon zamiłavana vitaŭ napad Rasii na Ukrainu. Ale jon staŭ i adnym ź pieršych, što pryznaŭ, što blickryh nie ŭdaŭsia. Letam 2022-ha, kali rasijskaje hramadstva jašče kałychałasia ŭ šavinistyčnym čadzie, jon pieršy zahavaryŭ ab słabaściach rasijskaj armii i pradkazaŭ nastup ukraincaŭ. U 2024 spraŭdziŭsia jaho prahnoz pra toje, što stratehičnaha razhromu praciŭnika nie budzie i vajna zachavaje pazicyjny charaktar z prasoŭvańniami łakalnaha značeńnia.
Hetaj viasnoj 54-hadovy Hirkin u listach i praz advakataŭ praročyć adstupleńnie rasijskich vojskaŭ. Na jaho dumku, ukrainskaja armija nazapasiła reziervy, a rasijskaja vyčarpała svaje mahčymaści.
Ataku ŭkrainskaj armii na Ciotkina (Kurskaja vobłaść) Hirkin ličyć raźviedkaj bojem i adciahvańniem uvahi.
«Viadoma, praciŭniku, jaki maje pieravahu ŭ žyvoj sile, vyhadna jak maha bolš raściahnuć našu liniju frontu, kab usie našy mahčymyja reziervy byli ŭciahnutyja ŭ achovu tak zvanych «starych terytoryj» Rasijskaj Fiederacyi. A nastupać jany buduć zusim u inšym miescy, sa stratehičnymi metami. Nie vyklučaju mahčymaści naniasieńnia tam praciŭnikam mocnaj kontrataki ź vialikimi terytaryjalnymi stratami dla našych vojskaŭ», — piša Hirkin.
«Reziervy praciŭnik dla hetaha nazapasiŭ. Vykarystoŭvać asabovy skład jak «miasa» praciŭnik, jak ja razumieju, razvučyŭsia z 2023 hoda i dziejničaje bolš piśmienna i aściarožna», — adznačaje jon.
«U cełym situacyja praciahvaje horšać» — dla rasijskaj armii, miarkuje Hirkin.
«Nastupny «nakat» z boku USU pavinien pačacca «voś-voś», — piša jon. — I jon (na hety raz) budzie (choć pakul i nie nadta mocna) padtrymany vajskovaj siłaj «kaalicyi» Brytanii — Francyi — Italii».
Hirkin bačyć try najbolš imaviernyja kirunki ŭdaraŭ Ukrainy:
-
Jašče adno ŭvarvańnie na «staryja terytoryi Rasii», u Kurskaj, Branskaj ci Biełharadskaj abłaściach, kab pakpić z Kremla.
-
Taktyčnaje (pieršapačatkova, a tam — «jak pojdzie») desantavańnie na Krym abo ŭźbiarežža pamiž Krymam i vuściem Dniapra.
-
Nastup na Danieckim kirunku, dzie, pa adčuvańni Hirkina, rasijskija siły mocna asłablenyja i zmoranyja šmatmiesiačnymi bajami, vyviedzienyja na nieŭmacavanyja pieradavyja pazicyi i tamu ŭraźlivyja dla mocnaj kontrataki.
Hirkin pryznaje, što raźviedinfarmacyi ŭ jaho niama i jon hruntujecca na intuicyi, «što ja b zrabiŭ na ich miescy». Ale ŭ čym jon upeŭnieny — rasijskaja «sistema tatalnaj chłuśni… nie dazvalaje adekvatna acanić ułasnyja mahčymaści dla paśpiachovaha viadzieńnia vajennych dziejańniaŭ».
Hirkin źviartaje ŭvahu, što «tolki Jeŭrasajuz maje pastavić Ukrainie sioleta 4 miljony bieśpiłotnikaŭ. Akramia taho, ułasnaja vytvorčaść raźvivajecca ŭ samoj Ukrainie».
«Jeŭropa moža vyrablać kolki zaŭhodna ŭzbrajeńnia, kolki zaŭhodna elektroniki, jakuju budzie pastaŭlać suprać nas. I ŭ hetaj vajnie ŭsie ekanamičnyja mahčymaści i pieravahi na ich baku», — adznačaje Hirkin u svaim apošnim dopisie, 8 maja.
Ciapier čytajuć
«Paśla Novaha hoda možam apynucca na vulicy». Naviedalisia ŭ šełtar, jaki daje dach nad hałavoj palitviaźniam, vymušanym pakinuć Biełaruś1
«Paśla Novaha hoda možam apynucca na vulicy». Naviedalisia ŭ šełtar, jaki daje dach nad hałavoj palitviaźniam, vymušanym pakinuć Biełaruś
Źnikły Anatol Kotaŭ byŭ partnioram samaha vysokapastaŭlenaha biełaruskaha raźviedčyka, jaki pierajechaŭ u Polšču. Tut moža być kluč da razhadki jaho źniknieńnia7777
Źnikły Anatol Kotaŭ byŭ partnioram samaha vysokapastaŭlenaha biełaruskaha raźviedčyka, jaki pierajechaŭ u Polšču. Tut moža być kluč da razhadki jaho źniknieńnia77
Biełaruski psichijatr: Palihraf z 100 chłusaŭ nie vyjavić dvuch. A siemiarych tych, chto kaža praŭdu, abvinavacić u chłuśni — i heta pa aptymistyčnych acenkach1212
Kamientary