«Zialenski apuściŭ Trampa». Hirkin daŭ intervju ŭ turmie, jaho acenki razychodziacca z Pucinavymi i Łukašenkavymi
Adzin z arhanizataraŭ zachopu Kryma i Danbasa ŭ 2014 hodzie, pałkoŭnik FSB u adstaŭcy Ihar Strałkoŭ-Hirkin adbyvaje turemnaje źniavoleńnie za svaju krytyku Pucina i rasijskaj armii. Ale i ŭ turmie jon praciahvaje vykazvacca — z raniejšych nacyjanalistyčnych pazicyj. Za apošnija tydni jon dasłaŭ na volu niekalki listoŭ i navat daŭ z turmy intervju telekanału RTVI. U im jon acaniŭ situacyju na froncie i apošnija padziei ŭ mižnarodnaj palitycy.
Hirkin: Rasijskaj armii nie ŭdałosia dasiahnuć praryvu
Ihar Hirkin razychodzicca ŭ acenkach z Uładzimiram Pucinym i rasijskaj prapahandaj. Situacyju na froncie jon nazyvaje stabilnaj, a ŭkrainskuju abaronu — paśladoŭnaj i paśpiachovaj.
«Vorah praciahvaje svaju stratehičnuju abaronnuju apieracyju (i, na žal, u cełym paśpiachova). Za zimovuju kampaniju našym vojskam znoŭ udałosia dasiahnuć tolki taktyčnych pośpiechaŭ i nidzie nie ŭdałosia prarvać front abo raźbić złučeńni Uzbrojenych sił Ukrainy. Front voraha zastaŭsia, u cełym, całkam ustojlivym, a bai za najbolš važnyja (u taktyčnym płanie) punkty, jak išli vosieńniu, tak i praciahvajucca ciapier (Tareck, Časaŭ Jar, navakolli Pakroŭska, rajon Kupianska, Vaŭčansk i h.d.)», — kaža Hirkin.
«Mahčyma, našym vojskam nieŭzabavie ŭdasca zaniać Sudžu — USU advodziać svaje častki z utvoranaha «miaška», — pradkazvaŭ jon na pačatku sakavika. Tak i zdaryłasia.
«Zialenski apuściŭ Trampa»
Što tyčycca hieapalityčnaha aśpiektu, to «Tramp pasprabuje vyrašyć rasijska-ŭkrainski kanflikt z vyhadaj dla ZŠA i na škodu abodvum vajujučym bakam», — miarkuje Hirkin.
«Ale Ukraina — heta nie maryjanietka», — kaža jon.
Na jaho dumku, Zachad krytyčna zaležyć ad ukrainskaj armii, bo ŭ Jeŭropie niama inšaj siły, zdolnaj supraćstajać Rasii.
«Zialenski heta razumieje, tamu zusim niadaŭna ŭ Vašynhtonie mienavita jon u žorstkaj formie «apuściŭ» Trampa, a nie naadvarot, jak ličać mnohija kamientatary».
Hirkin nie zhodny z Łukašenkam nakont Zialenskaha
Hirkin taksama kateharyčna nie zhodny z acenkami, jakija raniej ahučvaŭ Alaksandr Łukašenka, nakont nibyta niepapularnaści Zialenskaha abo mahčymaści jaho źmieny hienierałami.
«Dla nas jaho zamiena na jakoha-niebudź Załužnaha — tolki paharšeńnie situacyi», — zajaŭlaje Hirkin.
Hirkin prahnazuje novuju eskałacyju
«Nas čakaje jašče (minimum) 6—9 miesiacaŭ aktyŭnych bajavych dziejańniaŭ», — prahnazuje jon.
Kali za hety čas rasijskaja armija nie zmoža dasiahnuć vyrašalnaha pośpiechu, va Ukrainu buduć uviedzieny albo vojski, albo, prynamsi, avijacyja kaalicyi zachodnich dziaržaŭ, što zrobić dalejšaje prasoŭvańnie rasijan niemahčymym, dapuskaje Hirkin.
Hirkin rezka krytykuje ideju spynieńnia ahniu na 30 dzion, ličyć jaho pastkaj dla Rasii. Rasijskija nacyjanalisty, jak i Hirkin, imavierna, buduć rezka krytykavać Kreml, kali toj pojdzie na zamireńnie z Ukrainaj.
Rasijskija prapahandysty vydumali ŭdar drona pa turystyčnym aŭtobusie. Ale ŭ historyi jość zahadkavyja fury6
Kamientary
"Hovoriť, nie mieški pieriedvihať".
Hirkin, kak i vsie ich nacionalisty, mohut skolko uhodno kritikovať putina za to, čto iz nieho połučiłsia krajnie karikaturnyj Stalin, ili Hitler, no sami oni s nim ničieho nie sdiełajut. U nich dažie pod pivom nie voźnikajet mysl o "Pivnom putčie".
Caŕ nienastojaŝij, no on Caŕ.