«Łukašenka sakretna vyzvaliŭ «firmu» syna ad padatkaŭ». Belpol vypuściŭ rasśledvańnie pra Prezidencki spartyŭny kłub
Belpol vypuściŭ novaje rasśledavańnie, hetym razam — pra dziejnaść Prezidenckaha spartyŭnaha kłuba (PSK). U arhanizacyi byłych siłavikoŭ zajavili, što hetaja struktura słužyć dla lehalizacyi chabaraŭ, uchileńnia ad vypłaty padatkaŭ, a taksama patranatu nad blizkimi da ŭłady «čornymi» i «šerymi» biznesami. «Lusterka» vybrała asnoŭnaje ź filma.
Prezidencki spartyŭny kłub isnuje z 2005 hoda. Uznačalvaje jaho siaredni syn Alaksandra Łukašenki Dźmitryj. Na sajcie arhanizacyi skazana, što jaje meta — papularyzacyja aktyŭnaha ładu žyćcia, raźvićcio fizkultury i sportu.
Pa dadzienych Belpol, krynicy finansavańnia PSK nie afišujucca, tamu infarmacyju im «daviałosia źbirać pa krupinach». Pieršy dakumient, jaki trapiŭ u ruki eks-siłavikoŭ, — aŭdyt Prezidenckaha spartyŭnaha kłuba za 2012−2014 hady, jaki byŭ praviedzieny ŭ 2015-m. Dakumientu 10 hadoŭ, adnak, jak śćviardžajuć rasśledavalniki, u im jany znajšli cikavyja momanty, «jakija pralivajuć śviatło na dziejnaść PSK».
«Pieršaje, što kinułasia ŭ vočy, heta najaŭnaść na momant praviadzieńnia aŭdytu nie mienš za 14 depazitnych rachunkaŭ, adkrytych u «Biełarusbanku» i «Bielinviestbanku», — kaža ŭ filmie pradstaŭnik Belpol Uładzimir Žyhar. — Što takoje depazitny rachunak? Pa sutnaści, heta arenda vašych hrošaj bankam. Bank imi karystajecca i płacić vam [za heta] peŭnyja hrašovyja srodki».
U arhanizacyi byłych siłavikoŭ zajavili, što jany vałodajuć peŭnymi źviestkami ab sumach, jakija PSK zaličvaŭ na svaje depazitnyja rachunki. Tak, 20 lipienia 2020 hoda kłub zaklučyŭ dźvie damovy z «Biełarusbankam». Adna na raźmiaščeńnie 1,45 miljona jeŭra, druhaja — na 26 miljonaŭ dołaraŭ.
«I heta ŭsiaho tolki dva depazity. Nahadajem, ich było jak minimum 14», — adznačaje Uładzimir Žyhar i ŭdakładniaje «Lusterku», što k 2020-mu viadomyja im układy ŭ PSK zachavalisia, ale dadzienych pa kožnym ź ich u BELPOL niama.
Druhoje, na što źviarnuli ŭvahu ŭ aŭdytarskim dakumiencie byłyja siłaviki, — padatak na prybytak. Za try hady ŭ Prezidenckaha spartyŭnaha kłuba ŭ biełaruskich rublach jon skłaŭ:
- u 2012-m — 19,8 miljarda,
- u 2013-m — 16,7 miljarda,
- u 2014-m — 17,6 miljarda.
Pakul ža eks-siłavik prosić źviarnuć uvahu na treciuju detal u dakumiencie i cytuje: «Zhodna z rasparadžeńniem prezidenta Respubliki Biełaruś, Prezidencki spartyŭny kłub vyzvaleny ad vypłaty padatkaŭ. Sumy naličanych padatkaŭ zastajucca ŭ rasparadžeńni arhanizacyi dla rašeńnia svaich statutnych zadač».
«Značyć usie hetyja naličanyja PSK padatki naličvajucca kłubu farmalna, pakolki ni adnu kapiejku, ni adzin rubiel kłub u vyhladzie padatkaŭ nie zapłaciŭ. Jak vam takoje? — zadajecca pytańniem Uładzimir Žyhar. — Tata svaim sakretnym rasparadžeńniem vyzvalaje «firmu» syna ad vypłaty padatkaŭ. Karupcyja? U čystym vyhladzie karupcyja».
Adkul u PSK dachod?
Pa słovach Uładzimira Žyhara, padčas rasśledavańnia jany znajšli nie tolki «farmalna lehalnyja dachody spartyŭnaha kłuba», ale i «čornyja» schiemy. Takim čynam, adkul, pa viersii eks-siłavikoŭ, u Prezidenckaha spartyŭnaha kłuba dachody?
Pieršym — va ŭłasnaści PSK znachodzicca šerah budynkaŭ i zbudavańniaŭ u Minsku. U Belpol śćviardžajuć, što ich arhanizacyja atrymała ad dziaržavy na biezzvarotnaj padstavie. Siarod abjektaŭ, jakija ŭvachodziać u hety śpis, Uładzimir Žyhar nazyvaje:
- budynak na Kalcova, 112 płoščaj bolš za 2000 «kvadrataŭ» (jaho aranduje «Kłub tenisa», zasnavalnikam i ŭłaśnikam jakoha źjaŭlajecca PSK)
- budynak na Varanianskaha, 35 płoščaj 513 «kvadrataŭ» (pamiaškańnie śpiecyjalizavanaje, dzie raźmiaščajucca, naprykład, składy),
- płoščy ŭ «Minsk-Arenie»,
- kryty ladovy katok Pałaca sportu.
«Hetymi pamiaškańniami PSK rasparadžajecca, jak choča, sprytna atrymlivajučy prybytak ad arendy, i nie tolki», — zajaŭlaje pradstaŭnik Belpol i tłumačyć, što maje na ŭvazie.
Tak, pa dadzienych abjadnańnia byłych siłavikoŭ, da asnoŭnych arandataraŭ płoščaŭ PSK adnosiacca:
- «Sport Hrup»,
- «ATV-TECH»,
- «Pieršaja ŭzornaja typahrafija».
«My vałodajem źviestkami ab sumach arendnych płaciažoŭ, vypłačanych [dźviuma apošnimi arhanizacyjami] na adras PSK u studzieni 2022 hoda. Dyk voś, «Pieršaja ŭzornaja typahrafija» zapłaciła 25 tysiač rubloŭ, a «ATV-TECH» — bolš za 82 tysiačy. U vyniku zvyš sta tysiač rubloŭ štomiesiac tolki z dvuch firm», — ahučvaje Uładzimir Žyhar dadzienyja za 2022 hod.
Pry hetym, što cikava, adznačaje jon, zasnavalnik hetych arhanizacyj — Prezidencki spartyŭny kłub.
«Značyć jany pierakłali hrošy z adnoj kišeni — svajoj, u inšuju — taksama svaju, tym samym, pavialičyŭšy na papiery vydatki ŭkazanych dvuch firm i źniziŭšy padatkovuju bazu, — tłumačyć pradstaŭnik Belpol. — A z hrošaj, jakija pastupili na rachunki PSK u vyhladzie prybytkaŭ ad arendy, jany naohuł ni kapiejki padatkaŭ nie zapłacili, pakolki, jak my viedajem, PSK rašeńniem Łukašenki ad hetaha vyzvaleny».
Druhi radok u śpisie zarabotku Prezidenckaha spartyŭnaha kłuba — dyvidendy, jakija jon atrymlivaje ad niekalkich stvoranych im kamiercyjnych arhanizacyj i nie płacić z hetaha padatki, raskazvajuć rasśledavalniki.
Što heta za firmy?
Adna ź ich — užo ŭzhadanaja «Pieršaja ŭzornaja typahrafija». Sa spasyłkaj na dadzienyja Adzinaha dziaržrejestra, eks-siłaviki paviedamlajuć, što z 2013 hoda jaje adzinym ułaśnikam, zasnavalnikam i bienieficyjaram źjaŭlajecca PSK. U asnoŭnym pradpryjemstva zajmajecca vytvorčaściu etykietak i skryń. Siarod ich klijentaŭ — «Kamunarka», «Spartak», «Słodyč» i inšyja.
«Kožny rubiel prybytku, atrymany ŭ vyhladzie dyvidendaŭ, budzie vyviedzieny na rachunki spartyŭnaha kłuba. Adpaviedna, padatkaŭ z hetaha prybytku nie budzie vypłačana. Anivodnaj kapiejki, — padkreślivaje Uładzimir Žyhar. — Heta karupcyja ŭ čystym jaje vyhladzie».
Pradstaŭnik Belpol kaža, što prykładna pa takoj ža schiemie pracujuć i inšyja biznesy, jakija zasnavaŭ PSK. U arhanizacyi byłych siłavikoŭ ich pieraličyli jašče piać.
Treci punkt u hrafie dachodaŭ PSK, jaki vydzialaje Belpol, — sponsarskaja dapamoha. U jakaści adnaho z prykładaŭ takoj dabračynnaści arhanizacyja byłych siłavikoŭ nazyvaje hrupu kampanij «TAPAS».
Na što traciać hrošy z rachunkaŭ PSK?
«PSK robić vyhlad, što hrošy vydatkoŭvajucca na statutnyja mety. Isnuje stypiendyjalnaja prahrama padtrymki talenavitaj moładzi, adkryta niekalki spartyŭnych placovak. Ale ŭsio heta tolki fikcyja dla zamylvańnia vačej, — ličać u arhanizacyi byłych siłavikoŭ. — Sumy, vydzielenyja na padtrymku moładzi, prosta śmiechatvornyja».
Dla prykładu Belpol pryvodzić damovu davańnia biezzvarotnaj, sponsarskaj dapamohi ad 15 lutaha 2021-ha. U dakumiencie pakazana, što kłub vydzieliŭ 900 rubloŭ adździełu pa adukacyi administracyi Leninskaha rajona Mahilova. Hetyja hrošy pryznačalisia dla padrychtoŭki da spartyŭnych mierapryjemstvaŭ dźviuch dziaŭčat-padletkaŭ, jakija pakazali vysokija vyniki na respublikanskich spabornictvach pa bijatłonie.
Dla paraŭnańnia, darečy, eks-siłaviki pakazali dakumient pra sponsarskuju dapamohu PSK u adras «Biełteleradyjokampanii». U lutym 2021 hoda jana skłała 40 tysiač rubloŭ, a ŭ 2022-m — 55 tysiač.
«Viadoma ž, [pradstaŭniki kłuba] nie raskažuć pra nabyćcio piśmovaha naboru za 300 tysiač rasijskich rubloŭ (na momant zaklučeńnia damovy — 9 lutaha 2023-ha, heta kala 4 tysiač dołaraŭ pa kursie Banka RF. — Prym. red.) <…>, — adznačaje Uładzimir Žyhar, pieraličvajučy jašče šerah pradmietaŭ. — Toje ž samaje nichto nie raskaža vam pra toje, što ŭ 2022 hodzie [PSK] nabyŭ za 182,9 tysiačy jeŭra premijalny aŭtamabil Mercedes-Benz V300D <…>. My ŭžo maŭčym pra pajezdki ŭ AAE i adpačynak u premijalnych hatelach».
«Pry hetym Prezidencki spartyŭny kłub pazicyjanujecca jak vyklučna spartyŭnaja struktura, jakaja stvorana dla padtrymańnia sportu na terytoryi Biełarusi, — padsumoŭvaje pradstaŭnik Belpol. — I źjaŭlajecca niekamiercyjnaj».
Ciapier čytajuć
Stała viadoma imia jašče adnaho pałkoŭnika DFR, aryštavanaha KDB. Jon raskazvaŭ sukamiernikam, jak jaho katavali3
Kamientary
S učiotom toho, čto riehulatorom v śfierie diejatielnosti kazino i elektronnych łotieriej vystupajet Opierativno-analitičieskij cientr pri Łukašienko (OAC), kotoryj nieposriedstvienno vozhłavlajet byvšij oficier i načalnik SBP, a takžie sriedi ličnoho sostava mnoho vychodciev iz ochrany Łukašienko, to ja niskolko nie udivlon vsiem tiem faktam otmyva priestupnych dochodov čieriez biełorusskije kazino i otstavnych siłovikov Łukašienko, kotoryje v načale hoda obnarodovali žurnalisty, a obnarodovavšieho ich finansista na dniach ubili...