Siarod rasijskich pieramoŭnikaŭ u Stambule — kiraŭnik złaviesnaha HRU. Chto jon, Ihar Kaściukoŭ?
Načalnik Hałoŭnaha ŭpraŭleńnia Hienštaba Uzbrojenych sił Rasii ŭjaŭlaje saboj typovaha «cichaha» dziejača rasijskaj vajskova-palityčnaj elity.
Pavodle aficyjnych źviestak, Ihar Kaściukoŭ naradziŭsia ŭ lutym 1961 hoda ŭ Amurskaj vobłaści. Paśla škoły atrymaŭ vyšejšuju vajskova-marskuju adukacyju, a zatym skončyŭ Vajskova-dypłamatyčnuju akademiju Ministerstva abarony SSSR.
Słužbu pačynaŭ u dypłamatyčnych strukturach — u jakaści vajskovaha ataše pry pasolstvie Rasii ŭ Hrecyi. Paśla hetaha praciahnuŭ karjeru ŭ Hałoŭnym raźviedvalnym upraŭleńni Hienštaba (HRU). U 2010 hodzie hetaje ŭpraŭleńnie atrymała novuju aficyjnuju nazvu — Hałoŭnaje ŭpraŭleńnie Hienštaba (HU), choć staraja abrevijatura «HRU» dahetul šyroka vykarystoŭvajecca ŭ ŚMI i prafiesijnym asiarodździ.
U 2018 hodzie Kaściukoŭ uznačaliŭ hetuju strukturu. Pryznačeńnie na hetuju pasadu čałavieka z vajskova-marskim dośviedam było znakavaj padziejaj — Kaściukoŭ staŭ pieršym vychodcam z VMF, jaki ŭznačaliŭ vajskovuju vyviedku krainy ŭ postsaviecki čas.
U ciapierašniaj struktury rasijskich uzbrojenych sił admirał Ihar Kaściukoŭ zajmaje adzin z klučavych pastoŭ. Jak načalnik HU Hienštaba i adnačasova namieśnik načalnika Hienieralnaha štaba, jon adkazvaje za ŭsiu raźviedvalnuju dziejnaść vajskovaha viedamstva i źjaŭlajecca važnym daradcam dla vyšejšaha kamandavańnia.
Na pasadzie adnaho z kiraŭnikoŭ rasijskaj vajskovaj raźviedki Ihar Kaściukoŭ adyhryvaŭ značnuju rolu ŭ kiravańni interviencyjaj Rasii ŭ Siryi, jakaja pravodziłasia pad ściaham baraćby ź mižnarodnaj terarystyčnaj arhanizacyjaj «Isłamskaja dziaržava».
U 2017 hodzie Kaściukovu «zakrytym» ukazam było prysvojena zvańnie Hieroja Rasijskaj Fiederacyi. Aficyjna — «za mužnaść i hieraizm, prajaŭlenyja pry vykanańni vajskovaha abaviazku».
Admirał Ihar Kaściukoŭ ujaŭlaje saboj typovaha «cichaha» dziejača rasijskaj vajskova-palityčnaj elity — jon nie daje publičnych intervju i mała viadomy šyrokaj hramadskaści, adnak adyhryvaje važnuju rolu ŭ farmiravańni stratehii Rasii.
Kirujučy Hałoŭnym upraŭleńniem (byłym HRU), Kaściukoŭ staić na čale vajskovaj raźviedki, što apošnim časam dziejničaje jak va ŭłasna vajskovych kanfliktach, tak i na niabačnym froncie infarmacyjnych i kibierapieracyj pa ŭsim śviecie.
Za sprobu padryvu amierykanskaj demakratyi i ŭmiašańnie ŭ vybary z 2016 hoda Kaściukoŭ trapiŭ pad sankcyi ZŠA. Paśla rasijskaha ŭvarvańnia va Ukrainu jon trapiŭ taksama pad sankcyi Kanady, Aŭstralii, Japonii, Novaj Ziełandyi — jak adzin z pradstaŭnikoŭ rasijskaha vajskova-palityčnaha kiraŭnictva, adkaznych za ahresiju.
Pravalny dla Rasii chod vajennych dziejańniaŭ, niazdolnaść Maskvy dabicca pieršapačatkovych metaŭ i šalonaja ludskaja cana, jakuju RF płacić za hetuju vajnu, pakazali kiraŭnictvu Rasii, nakolki jany pieršapačatkova niedaaceńvali Ukrainu i Zachad.
Choć aficyjna delehacyju Ukrainy ŭ Stambule ŭznačalvaje daradca Pucina, ideołah Uładzimir Miadzinski, mahčyma, mienavita Kaściukoŭ — klučavaja asoba na pieramovach u Stambule. Jak kiraŭnik raźviedki, jon vałodaje toj infarmacyjaj, jakaja budzie vyznačać sapraŭdnyja pieramoŭnyja pazicyi Maskvy.
«Adpraŭlali myć tualety i kidali ŭ ŠIZA». Susiedki raskazali pra abychodžańnie ŭ kałonii z eks-palitźniavolenaj Tamaraj Karavaj, jakaja paśla pamierła33
Kamientary