U śviecie isnuje tolki adna kraina, zdolnaja całkam zabiaśpiečvać siabie ježaj
Navukoŭcy z Hiermanii i Vialikabrytanii praviali daśledavańnie i vyśvietlili, što tolki adna kraina sa 186 moža całkam zabiaśpiečyć siabie ŭsimi siamiu asnoŭnymi hrupami praduktaŭ charčavańnia vyklučna za košt ułasnaj vytvorčaści. Vyniki apublikavanyja ŭ časopisie Nature Food.
Adzinaj krainaj, jakaja zdolnaja całkam prakarmić svajo nasielnictva navat u vypadku zryvu mižnarodnych pastavak (jak heta było padčas pandemii Covid-19), akazałasia Hajana — nievialikaja kraina ŭ Paŭdniovaj Amierycy.
Na druhim i trecim miescach — Kitaj i Vjetnam, jakija mohuć zabiaśpiečyć šeść ź siami hrup praduktaŭ.
U toj ža čas šeść krain nie mohuć samastojna zabiaśpiečvać siabie navat adnoj-adzinaj hrupaj praduktaŭ — heta Afhanistan, Abjadnanyja Arabskija Emiraty, Irak, Makaa (śpiecyjalny administracyjny rajon Kitaja), Katar i Jemien.
Bolš za tracinu krain mohuć zabiaśpiečyć siabie tolki dźviuma abo mienš hrupami praduktaŭ, pryčym bolšaja častka takich krain znachodzicca ŭ Afrycy. Kožnaja siomaja kraina ŭ śviecie dasiahaje samadastatkovaści pa piaci abo bolš hrupach, i hetyja krainy pieravažna raźmieščanyja ŭ Jeŭropie i Paŭdniovaj Amierycy.
Navukoŭcy taksama adznačyli, što prykładna 65% krain mohuć samastojna zabiaśpiečvać siabie žyviołahadoŭčaj pradukcyjaj, ale ŭ paŭdniovaj Afrycy i Akijanii nazirajecca deficyt małaka. Jeŭrapiejskija krainy, naadvarot, całkam zabiaśpiečvajuć siabie małočnymi praduktami. Rybaj i morapraduktami zabiaśpiečvajuć siabie tolki 25% krain, siarod jakich Rasija i krainy Cichaakijanskaha rehijona. Adnak u 60% krain uzrovień zabieśpiačeńnia morapraduktami nie dasiahaje i pałovy ad patreby.
Kala pałovy krain zabiaśpiečvajuć siabie kruchmalistymi praduktami (45%), babovymi, arechami i nasieńniem (46%), a taksama sadavinoj (47%). Tolki 24% krain dasiahajuć samadastatkovaści pa aharodninie. Vysoki ŭzrovień zabieśpiačeńnia harodninaj nazirajecca ŭ krainach Mižziemnamorja i Centralnaj Azii, a voś 91% krain Afryki na poŭdzień ad Sachary majuć surjozny deficyt. Prablemy z aharodninaj jość taksama ŭ Paŭnočnaj Jeŭropie, Paŭdniovaj Amierycy i krainach Karybskaha basiejna.
Što da Biełarusi, to, zhodna z apublikavanymi kartami, jana całkam zabiaśpiečvaje siabie małočnymi i miasnymi praduktami, harodninaj i kruchmalistymi praduktami charčavańnia (daśledavańnie pravodziłasia raniej za sioletniuju viasnu). Najhoršaja ž u nas situacyja z rybaj i babovymi, arechami i nasieńniem.
Na zakančeńnie daśledčyki adznačyli, što raniejšyja raboty aceńvali charčovuju situacyju tolki pa kolkaści kałoryj, a ciapier uličvajecca i zbałansavanaść charčavańnia. Jany vykarystoŭvali danyja AAN i dyjetu Livewell ad Suśvietnaha fondu dzikaj pryrody (WWF), dzie pradukty padzielenyja na siem hrup: sadavina, harodnina, babovyja/arechi/nasieńnie, kruchmalistyja pradukty, ryba/morapradukty, miasa i małočnyja pradukty.
Ciapier čytajuć
Babaryka try chviliny adkazvaŭ na pytańnie, čyj Krym. Tak i nie adkazaŭ150
Kamientary