U minskim restaranie ź bieźlimitam visiać abjavy ab štrafach za niedajedzienuju ježu. Uładalnik kaža, što tak vychoŭvaje klijentaŭ
Novyja praviły ŭ restaranie ź bieźlimitnaj ježaj ździvili naviedvalnikaŭ, bo hučać jany nie zusim zakonna.
Restaran ź bieźlimitnaj azijackaj ježaj UMI adkryŭsia ŭ HC «Červieński» ŭ mai i adrazu trapiŭ u naviny. U dzień adkryćcia kala ŭstanovy vystraiłasia vializnaja čarha, natoŭp raźmioŭ usiu ježu za niekalki hadzin. Niekatoryja navat prychodzili z kantejnierami dla ssabojek.
Z napłyvam klijentaŭ restaran spraviŭsia, ale ciapier, vidać, źjaviłasia inšaja prablema. U siecivie aktyŭna abmiarkoŭvajuć novaje i nie zusim zvyčajnaje praviła, jakoje ŭviali va ŭstanovie. Tam raźviesili abjavu ab štrafach za niedajedzienuju ježu, piša «Anłajnier».
«U našym restaranie padtrymlivajecca pryncyp: «Biary stolki, kolki źjasi». Pry pakidańni ježy bolš za 300 hramaŭ spahaniajecca płata za 1 porcyju kompleksnaha mieniu (z raźliku kožnyja 300 h): abied (12:00—15:30) — 35 rub / 300 h, viačera (17:30—22:00) — 49 rub / 300 h. Prykład: kali rešta 600 h — apłačvajecca 2 porcyi pa ciapierašnim taryfie», — havorycca ŭ abjavie.
Papiera vyklikała ŭ naviedvalnikaŭ niamała pytańniaŭ. Naprykład, jak ježu ŭzvažvajuć, ci sapraŭdy buduć brać hrošy za niedajedzienaje i što rabić, kali ježa prosta nie spadabałasia? Uźnikli pytańni i pra zakonnaść takich novaŭviadzieńniaŭ — bo hość užo apłaciŭ uvachod i moža vybirać ježu na svoj hust.
Akazałasia, u realnaści nijakich štrafaŭ niama. Uładalnik restarana Arciom Stryhin rastłumačyŭ, što hetaja abjava — pierš za ŭsio vychavaŭčy momant.
«My nikoha nie štrafujem — ni z adnaho čałavieka nie ŭziali ni kapiejki. Hetuju abjavu paviesili chutčej jak vychavaŭčuju mieru. Kab hości nie brali bolš, čym mahli źjeści.
Z punktu hledžańnia zakona spahaniać płatu za niedajedzienuju ježu niepravamierna, i my heta dobra razumiejem. Paśla taho jak my paviesili hetuju abjavu, naviedvalniki stali bolš śviadoma padychodzić da vybaru i pamieru ježy. Kolkaść charčovych adkidaŭ značna źniziłasia — z 30 miachoŭ śmiećcia ŭ dzień da prykładna 10», — pachvaliŭsia vynikami akcyi restaratar.
Uładalnik ustanovy paabiacaŭ, što ŭ chutkim časie źjavicca sistema matyvacyi. Naprykład, kali za stałom u haściej zastaniecca mienš za 300 hramaŭ ježy na čałavieka, to jany atrymajuć źnižku 10 rubloŭ.
Kamientary