Niekatorych mužčyn nazyvajuć «kastrulščykami». Chto heta?

Mužčyn, jakija nie ŭkładajucca ŭ adnosiny i nie dapamahajuć žančynie, a tolki karystajucca jaje kłopatam i bytavymi vyhodami sumiesnaha žyćcia, nazyvajuć «kastrulščykami» (pa anałohii z «taleračnicami» — tak źniavažliva kažuć pra žančyn, jakija chodziać na spatkańni tolki dziela biaspłatnaj viačery). Jak ich raspaznać? Psichołah Iałanta Vaškievič nazvała niekalki prykmiet, piša Tochka.

Kłopat u adzin bok

Ujavicie: mužčyna pryjazdžaje da žančyny ŭ hości, jaho sustrakajuć u pryhožaj sukiency, z chatniaj viačeraj i atmaśfieraj utulnaści. Heta moža być vydatnym spatkańniem, kali pra heta pakłapociacca aboje.

Ale časam kłopat stanovicca adnabakovym. Jon prychodzić, zadavalniaje patreby, jeść smačnuju viačeru, a sam ni praduktami, ni znakam padziaki nakštałt kvietak nie adkazvaje.

«U mianie byli siabroŭki, jakija miesiacami karmili mužčyn, a tyja navat prasłavutuju palicu nie prybili, kali ŭžo kazać pra bytavyja zadačy, padzielenyja pa hiendarnaj prykmiecie», — zaŭvažaje psichołah.

Roŭnaść — da pary

Taki mužčyna moža šmat kazać pra partniorstva i sučasnyja adnosiny, asabliva kali havorka zachodzić pra rachunki ŭ restaranie, jakija treba padzialić napałovu.

Ale kali sprava dachodzić da inicyjatyvy abo patreb žančyny, taki mužčyna chutka ŭspaminaje zručnyja tradycyjnyja paterny.

«Heta jašče nazyvajecca nieapatryjarchatam: kali chočaš atrymlivać kłopat jak raniej, ale pry hetym nie dahladać svoj luboŭny vybar i nie ŭkładvacca ŭ adnosiny», — tłumačyć Iałanta.

Niama ničoha drennaha ŭ padziele abaviazacielstvaŭ tak, jak vam zručna ŭ pary. Ale heta pavinny być mienavita padzieł.

Padarunki jak manipulacyja

Kali raptam taki mužčyna ŭsio ž robić pryhožy žest (naprykład, doryć kvietki), to jon abaviazkova pra heta nahadaje paźniej i budzie vykarystoŭvać u sprečcy: «Ja tabie kvietki daryŭ, a ty…».

I vaša ščyraja radaść ad padarunka chutka sastupić miesca pačućciu abaviazku i viny. Bo siurpryz zrobleny nie dla taho, kab žančynie było pryjemna, a kab zarabić ački i skarystacca hetym.

Budźcie hatovyja, što takija mužčyny paśla razvodu dzielać videlcy i ździrajuć štory. Abo prosiać viarnuć kapieječny piarścionak, padorany vosiem hadoŭ tamu.

Nijakaj inicyjatyvy

Užo na starcie adnosin zamiest zaprašeńniaŭ na spatkańni i siurpryzaŭ, zdolnych vyklikać prychilnaść da jaho, mužčyna budzie kazać pra mierkantylnaść žančyn.

Jon čakaje cudoŭnuju pryncesu vahoj 45 kh i dahledžanuju ad hałavy da piatak, jakaja zrazumieje, vyratuje, budzie lubić biezumoŭna — a jašče i sama padydzie ci napiša.

Takim čynam, mužčyna-«kastrulščyk» — toj, chto choča «hatovuju stravu» ŭ adnosinach (kłopat, ciapło, pryhažość, natchnieńnie), ale nie hatovy ni pracavać sam, ni stvarać heta razam, ličyć Iałanta Vaškievič.

Adnosiny dla jaho — jak biaspłatnaja stałoŭka, dzie ŭsio ŭžo nakryta, zastałosia tolki pryjści i pajeści.

Adnak varta adznačyć, što jak mužčyny, tak i žančyny mohuć vieści siabie ŭ adnosinach biezadkazna.

«Samaje važnaje — kab aboje partniory pavažali adno adnaho i ščyra zadumvalisia: a što ja sam(a) mahu pryŭnieści ŭ hetyja adnosiny?» — kaža psichołah.

• 6
• 4
• 6
• 3
• 0
• 0
• 0
• 0