Pucin hatovy na spynieńnie vajny, kali jamu padorać reštu Danieckaj vobłaści — Słaviansk, Kramatorsk i Pakroŭsk

Uładzimir Pucin na hetym tydni paviedamiŭ administracyi Donalda Trampa pra hatoŭnaść spynić vajnu ŭ vypadku pieradačy pad kantrol Rasii ŭsioj Danieckaj vobłaści. Prapanovu pieradaŭ praz Styviena Uitkafa, i jana pryviała da «dypłamatyčnaj lichamanki» ŭ Vašynhtonie, piša «Ahienctva» sa spasyłkaj na The Wall Street Journal.

Materyjał vydańnia ŭdakładniaje raniejšuju ŭciečku, jakaja źjaviłasia ŭ Bloomberg. Sustreča, na jakoj budzie abmiarkoŭvacca prapanova Pucina, adbudziecca 15 žniŭnia na Alascy, paviedamiŭ uviečary ŭ piatnicu Tramp.

Ab prapanovie Pucina stała viadoma ad jeŭrapiejskich i ŭkrainskich aficyjnych asob. Čynoŭniki ź ES i Ukrainy apynulisia ŭciahnutymi ŭ telefonnyja pieramovy z administracyjaj Trampa paśla taho, jak jana atrymała prapanovu z Kramla.

Publična kiraŭnik Biełaha doma skazaŭ u sieradu, što prapanova rasijskaha lidara nie źjaŭlajecca «praryvam», ale dastatkova pryvabnaja, kab pasprabavać arhanizavać jaho sustreču z Pucinym užo na nastupnym tydni.

Prapanovu Kramla možna ličyć adychodam ad raniejšych patrabavańniaŭ Rasii pra poŭny kantrol nad čatyrma anieksavanymi rehijonami.

Pavodle krynic haziety, prainfarmavanych pra telefonnuju razmovu, Pucin zajaviŭ Uitkafu, što pahodzicca na poŭnaje spynieńnie ahniu, kali Ukraina vyviedzie vojski z Danieckaj vobłaści.

U hetym vypadku Rasija budzie kantralavać Danieckuju i Łuhanskuju vobłaści, a taksama Krym, udakładniaje vydańnie.

U sieryi telefonnych razmoŭ na hetym tydni jeŭrapiejskija pradstaŭniki sprabavali ŭdakładnić klučavy aśpiekt prapanovy — što adbudziecca ŭ Zaparožskaj i Chiersonskaj abłaściach, dzie rasijskija vojski taksama kantralujuć tolki častku terytoryi.

Čynoŭniki, prainfarmavanyja administracyjaj Trampa pra telefonnyja razmovy, vykazali supiarečlivyja mierkavańni nakont taho, ci maje namier Pucin zamarozić ciapierašniuju liniju frontu.

Zhodna z zajavaj Pucina ŭ červieni minułaha hoda, Maskva maje namier damahacca pierachodu hetych rehijonaŭ całkam pad kantrol Rasii.

Padčas telefonnaj razmovy ŭ piatnicu Uitkaf paviedamiŭ aficyjnym pradstaŭnikam ES, što rasijskaja prapanova ŭklučaje dva etapy, paviedamili dźvie jeŭrapiejskija krynicy haziety.

Na pieršym etapie Ukraina vyviedzie vojski z Danieckaj vobłaści, a linija frontu budzie zamarožanaja.

Zatym adbudziecca druhi etap, u chodzie jakoha Pucin i Tramp uzhodniać kančatkovy mirny płan, jaki paśla buduć abmiarkoŭvać z prezidentam Ukrainy Uładzimiram Zialenskim, paviedamili surazmoŭcy WSJ.

Za niekalki hadzin da hetaha Bloomberg paviedamiŭ sa spasyłkaj na infarmavanyja krynicy, što ZŠA i Rasija pracujuć nad pahadnieńniem napiaredadni zapłanavanaj na nastupny tydzień sustrečy Trampa i Pucina.

Jak pisała ahienctva, Pucin patrabuje, kab Maskva atrymała pad svoj kantrol uvieś Danbas, a taksama Krym, a Rasija ŭ svaju čarhu zamarozić liniju frontu ŭ Zaparožskaj i Chiersonskaj abłaściach.

Pavodle krynic Bloomberg, pahadnieńnie pa sutnaści nakiravana na zamarozku vajny i stvareńnie ŭmoŭ dla spynieńnia ahniu, a taksama pieramovaŭ pa kančatkovym mirnym urehulavańni.

U piatnicu Tramp pryznaŭ, što mahčymaja ździełka pa Ukrainie budzie praduhledžvać abmien terytoryjami.

Paźniej jon napisaŭ u svajoj sacyjalnaj sietcy Truth Social, što sustreča z Pucinym adbudziecca 15 žniŭnia na Alascy.

Pamočnik Pucina Juryj Ušakoŭ paćvierdziŭ, što sustreča adbudziecca na Alascy.

Jeŭrapiejskija i ŭkrainskija aficyjnyja asoby, ź jakimi na hetym tydni razmaŭlali prezident Tramp i Uitkaf, paviedamili haziecie, što zaniepakojenyja tym, što Pucin prosta vykarystoŭvaje svaju prapanovu jak chitraść, kab paźbiehnuć pakarańnia ŭ vyhladzie novych sankcyj i pošlin z boku ZŠA i adnačasova praciahvać vajnu.

U piatnicu skančaŭsia termin ultymatumu Trampa, na praciahu jakoha Kreml pavinien byŭ pahadzicca na pieramirje va Ukrainie abo sutyknucca z surjoznymi dziejańniami z boku Trampa.

Uciečki WSJ i Bloomberg śviedčać ab tym, što Kreml u apošni momant zrabiŭ Vašynhtonu prapanovu, jakaja jaho zacikaviła.

• 0
• 7
• 0
• 1
• 0
• 0
• 11
• 0