«Nie vypuskaje Litva». Čamu pieravozčyki masava admianili aŭtobusy pamiž Minskam i Vilniaj?
11 i 12 žniŭnia stała viadoma, što adrazu dva bujnyja pieravozčyki — biełaruski «Minsktrans» i litoŭski Eurolines — abviaścili pra prypynieńnie bolšaści aŭtobusnych rejsaŭ pamiž Minskam i Vilniaj. Dla pasažyraŭ heta stała niepryjemnym siurpryzam. Vydańnie «Lusterka» pasprabavała vyśvietlić, što nasamreč staić za transpartnym kałapsam na adnym z samych zapatrabavanych u biełarusaŭ mižnarodnych kirunkaŭ.
«U pošcie ŭžo 456 listoŭ»
Pieršym pra admienu rejsaŭ paviedamiŭ pieravozčyk Eurolines, a nieŭzabavie da jaho dałučyŭsia i «Minsktrans». U svaim paviedamleńni biełaruskaja dziaržaŭnaja kampanija ŭdakładniła, što prypynieńnie budzie dziejničać «da atrymańnia nieabchodnych dazvolnych dakumientaŭ».
«Lusterka» pasprabavała atrymać apieratyŭny kamientar u «Minsktransa», adnak zrabić heta nie ŭdałosia. Padčas telefanavańnia na haračuju liniju aŭtaadkazčyk paviedamiŭ, što kolkaść tych, chto čakaje ŭ čarzie, «pieravysiła 20 čałaviek». Praź piać chvilin čakańnia na linii zvanok prosta abarvaŭsia.
Datelefanavacca da vilenskaha adździaleńnia Eurolines žurnalistka «Lusterka» taksama nie zmahła ciaham hadziny. U vyniku vypraviłasia na aŭtavakzał, dzie i znachodzicca vilenski ofis kampanii.
«U nas telefony razryvajucca. My časam ich uklučajem i adkazvajem, pakul chapaje niervaŭ. Potym — adklučajem, — pryznałasia adna z supracoŭnic pieravozčyka. — U pošcie ŭžo 456 listoŭ. Kali my na ich zmožam adkazać, adnamu bohu viadoma».
U ofisie Eurolines adznačajuć, što ŭ pieravozčyka zastałosia try rejsy na dzień zamiest 13 (rejsam tut nazyvajuć dźvie pajezdki: ź Vilni ŭ Minsk i nazad), jakija byli raniej. Čamu jon pačaŭ admianiać ich, supracoŭnica nie viedaje. Kaža, što aŭtobusy kampanii «nie vypuskaje Litva». Nakont pryčyn jana nie ŭ kursie.
«Kiraŭnictva skazała, što da 18 žniŭnia jano budzie raźbiracca. Nibyta niešta ŭ hety dzień tam namiačajecca. Ja voś taksama čakaju adkazu. Mnie samoj vielmi strašna, bo heta maja praca, śfiera dziejnaści», — skazała supracoŭnica.
Pa aficyjnyja kamientary jana prapanavała źviarnucca ŭ ofis kampanii Toks, jakaja pad brendam «Jeŭrałajns» vozić pasažyraŭ ź Vilni ŭ Minsk i nazad.
«Lusterka» skiravała zapyty z prośbaj rastłumačyć pryčyny masavaj admieny rejsaŭ u litoŭskuju kampaniju Toks. A taksama ŭ Ministerstva transpartu i kamunikacyj Litvy. Pakul što adkazaŭ adtul vydańnie nie atrymała.
Što ŭ inšych pieravozčykaŭ?
Kab zrazumieć, ci stała prablema sistemnaj i ci zakranaje jana ŭsich hulcoŭ na rynku, žurnalist «Lusterka» źviarnuŭsia da inšaha bujnoha pieravozčyka — Ecolines. U litoŭskim ofisie kampanii zapeŭnili, što ich praca idzie ŭ štatnym režymie:
«Prablemy z rejsami ŭźnikli tolki ŭ «Minsktransa» i Eurolines. U našaj kampanii ŭsio dobra, rejsy nie admienienyja, kožny ź ich vyjazdžaje pa raskładzie».
Jak padličyła «Lusterka», da admieny na hetyja try pieravozčyki prypadała 28 rejsaŭ štodnia (havorka pra pajezdki tudy i nazad). Pačynajučy z 14 žniŭnia ź Minska ŭ Vilniu i nazad budzie ahułam 15 rejsaŭ na dzień: pa šeść ad Ecolines i «Minsktransa» i try — ad Eurolines (Toks).
U pačatku 2024 hoda ŭrad Litvy pryniaŭ rašeńnie skaracić kolkaść dazvołaŭ na aŭtobusnyja pieravozki pamiž Litvoj i Biełaruśsiu ŭdvaja — z 58 da 29. Dazvoły vydajucca pavodle pryncypu parytetu: kab jaho atrymaŭ litoŭski pieravozčyk, anałahičny dakumient musić być i ŭ jaho biełaruskaha partniora.
Kamientary