Ci zmohuć samaloty «Biełavija» paśla źniaćcia sankcyj ZŠA znoŭ lotać u Jeŭropu?
11 vieraśnia ZŠA źniali sankcyi z avijakampanii «Biełavija». Pra heta na sustrečy z Alaksandram Łukašenkam paviedamiŭ pradstaŭnik prezidenta ZŠA Džon Koŭł. ZŠA ŭviali sankcyi suprać «Biełavija» 9 žniŭnia 2023 hoda. Pad sankcyjami Jeŭrasajuza avijakampanija znachodzicca ź śniežnia 2021 hoda. «Radyjo Svaboda» raspytała byłoha supracoŭnika kampanii, jaki zajmaŭsia techničnym absłuhoŭvańniem, što daje admiena amierykanskich sankcyj.
Siarhiej (imia źmienienaje na prośbu surazmoŭcy — RS) padkreślivaje, što «Biełavija» usio jašče pad sankcyjami ES, a ŭ ZŠA samaloty avijakampanii nie lotali i raniej. Na jahonuju dumku, najpierš źniaćcie abmiežavańniaŭ zakranie techničnyja i reputacyjnyja pytańni dla kampanii.
«Najpierš razbłakujecca mahčymaść pramych zakupak kamplektujučych. Taksama razmarožvajecca mahčymaść abnaŭlać prahramnaje zabieśpiačeńnie, navihacyjnyja bazy danych. Heta taksama mahčymaść zakupak samalotaŭ, tych ža Boeing. Mahčyma, raniej zamarožanyja pastaŭki dajeduć da kampanii. Moža adkrycca šlach dla navučańnia piłotaŭ, bo raniej piłoty jeździli navučacca ŭ Jeŭropu. Mahčyma, ciapier jany zmohuć navučacca ŭ ZŠA», — havoryć surazmoŭca.
Były supracoŭnik «Biełavija» pryvodzić prykład, jak raniej kampanija nabyła samaloty Airbus praz pasiarednikaŭ, a navučańnie piłotaŭ z-za sankcyj pravodzili rasijanie. Paśla źniaćcia sankcyj, na dumku surazmoŭcy, takoje navučańnie moža być dasiahalnaje i ŭ ZŠA.
Adnak źniaćcie sankcyj nie pryviadzie da ŭviadzieńnia pramych rejsaŭ z ZŠA, dadaje śpiecyjalist. Na heta niama techničnych mahčymaściaŭ. Ale heta dobra dla reputacyi kampanii, adznačaje surazmoŭca. Havorka pra adnaŭleńnie rejsaŭ ź Minska ŭ Jeŭropu taksama pakul nie moža vieścisia, Jeŭrasajuz svaje sankcyi ŭ dačynieńni da «Biełavija» nie admianiaŭ.
«Reputacyjna «Biełavija» šmat atrymlivaje. Pazityŭ taksama ŭ tym, što avijakampanija sychodzić ad rasijskaj zaležnaści. Rasija ciapier prapahanduje impartazamiaščeńnie ŭ halinie avijabudaŭnictva. Źniaćcie abmiežavańniaŭ daje mahčymaść pazbavicca prymusovaha nabyćcia rasijskich łajnieraŭ i detalaŭ», — havoryć surazmoŭca.
Siłaviki śćviardžajuć, što zatrymali dvuch mužčyn za hałasavańnie na vybarach u KR. Ale ci možna hetamu vieryć?15
Kamientary
Biaśpieka biełaruskaj moładzi, jakuju vy chočacie začynić žaleznaj zasłonaj ad Jeŭropy, vam pa-barabanu?