Češski dypłamat abvieščany piersonaj non hrata i pavinien pakinuć Biełaruś
Češski dypłamat abvieščany piersonaj non hrata i ciaham 72 hadzin pavinien pakinuć Biełaruś. Pra heta zajaviŭ žurnalistam pres-sakratar Ministerstva zamiežnych spraŭ Biełarusi Rusłan Varankoŭ, piša BiełTA
Aficyjny pradstaŭnik biełaruskaha źniešniepalityčnaha viedamstva padkreśliŭ: «Jak vam užo viadoma, niadaŭna ŭłady Respubliki Polšča i Češskaj Respubliki pa absalutna nadumanych i biespadstaŭnych padstavach prapanavali pakinuć terytoryju svaich dziaržaŭ biełaruskim dypłamatam u ranhu daradcy».
«Siońnia ŭ Ministerstva zamiežnych spraŭ Biełarusi byŭ vyklikany časova vykonvajučy abaviazki kiraŭnika dypłamatyčnaj misii Čechii ŭ Biełarusi Tomaš Krył. Jamu ŭ jakaści miery ŭ adkaz było zajaŭlena ab abviaščeńni piersonaj non hrata češskaha dypłamata (daradcy), jakomu nieabchodna ciaham 72 hadzin pakinuć terytoryju Biełarusi», — padkreśliŭ Rusłan Varankoŭ.
8 vieraśnia češskija ŭłady paviedamili, što ŭ Jeŭropie była vykryta špijonskaja sietka, jakuju sprabavaŭ stvaryć biełaruski KDB. U rasśledavańni hetaj spravy ŭdzielničali EUROJUST i śpiecsłužby Rumynii, Čechii i Vienhryi. Mienavita ŭ suviazi z hetym supracoŭnik pasolstva, jakoha, vierahodna, zavuć Mikałaj Dukšta, byŭ abjaŭleny piersanaj non hrata.
Akramia taho, u Rumynii zatrymali byłoha namieśnika kiraŭnika Słužby infarmacyi i biaśpieki Małdovy Alaksandra Bałana za dziaržaŭnuju zdradu i pieradaču dziaržaŭnych sakretaŭ biełaruskim śpiecsłužbam.
Pavodle vienhierskich ŚMI, da spravy taksama moža być datyčny biełaruski apazicyjny aktyvist, jaki pracuje taksistam i žyvie ŭ Polščy na miažy ź Biełaruśsiu. 9 vieraśnia premjer-ministr Polščy Donald Tusk paviedamiŭ, što na jaje terytoryi zatrymali ahienta biełaruskich śpiecsłužbaŭ, ale jaho imia pakul nieviadomaje. Taksama Polšča vysyłaje adnaho z dypłamataŭ.
Ciapier čytajuć
Kiraŭnika śledčaj hrupy pa spravie Tut.by pasadzili na 14 hadoŭ3
Kamientary
[Zredahavana]