U EHU viarnuli studentku, jakaja paŭstała suprać charasmientu. Ale prymusili zapłacić 1300 jeŭra
Dva hady tamu ź EHU adličyli Taćcianu Barysavu, jakaja publična raskazała pra charasmient z boku vykładčyka Siarhieja Sialeckaha. Ciapier vilenski sud admianiŭ toje rašeńnie — ale ŭ vyniku Taćciana ŭsio adno akazałasia vinnaja ŭniviersitetu.
Vosieńniu 2023‑ha ŭ Vilni vybuchnuŭ skandał. Mastaka i vykładčyka EHU Siarhieja Sialeckaha, abvinavacili ŭ nieetyčnych pavodzinach u bok studentak i praź niekalki miesiacaŭ raźbiralnictva zvolnili.
Taćciana Barysava była adnoj z tych studentak, chto skardziŭsia na Sialeckaha. U adroźnieńnie ad šmatlikich inšych dziaŭčat jana vykazvałasia publična.
Taćciana raskazvała, što Sialecki źnievažaŭ jaje za nacyjanalnaść i finansavaje stanovišča (dziaŭčyna rodam z Rasii i na toj čas adna vychoŭvała maleńkaha syna), raspaŭsiudžvaŭ pra jaje čutki. Paśla jaje intervju Sialecki padaŭ na Taćcianu skarhu va ŭniviersiteckuju kamisiju pa etycy, dziaŭčyna adkazała adkrytym listom da ŭniviersiteckaj supolnaści. Dalej skarhu na jaje padaŭ sam rektar, i ŭ śniežni 2023‑ha Taćcianu adličyli.
Ciapier dziaŭčyna paviedamiła ŭ instahramie, što vilenski sud admianiŭ toje rašeńnie. Ale nie bieź niuansaŭ, piša Taćciana:
«Heta byli dva hady ŭ stresie i depresii, i napieradzie jašče dva hady biez adukacyi pa vinie EHU. Dva stračanyja hady žyćcia, za jakija vinavaty nie panios nijakaj adkaznaści.
Niahledziačy na pryznańnie zahadu ab adličeńni niezakonnym, častka isku ab kampiensacyi škody nie była zadavolenaja, tamu ja častkova pakryvaju vydatki EHU — 1300 jeŭra. Što ž, dla niekatorych rečaŭ patrebna bolš zdolnaściaŭ u składańni jurydyčnych tekstaŭ, čym maju ja».
Cikava, što ŭ minułym hodzie vilenski sud zahadaŭ adnavić Siarhieja Sialeckaha na pracy ŭ EHU. Pryčyna była faktyčna taja samaja, što ŭ Barysavaj — što zahad ab jaho zvalnieńni byŭ niapravilnym.
Ciapier studentka i vykładčyk znoŭ mohuć sustrecca va ŭniviersitecie.
«Naša Niva» — bastyjon biełaruščyny
PADTRYMAĆCiapier čytajuć
Chto z palitviaźniaŭ vyjšaŭ na svabodu 16 vieraśnia POŬNY ŚPIS18
Kamientary
Užo sabrałosia nadta šmat spraŭ z abvinavačańniami, jakija akazvalisia chłuśnioj, niaredka pad upłyvam fieministyčnaj ideałohii.