Niekatorych mužčyn u Biełarusi zaprašajuć zdać adbitki palcaŭ. Navošta?
Čytačy devby raspaviali vydańniu pra toje, što ich zaprašajuć u RAUS, kab zrabić daktyłaskapiju.
15 kastryčnika žurnalisty devby apublikavali historyju biełarusa, jakija ciapier žyvie ŭ Polščy i, niahledziačy na heta, atrymaŭ na svoj biełaruski adras zaprašeńnie zrabić adbitki palcaŭ.
U paviedamleńni nie havaryłasia pra pryčyny takoj cikavaści da jaho, zatoje była spasyłka na zakon № 236‑3 ad 4 listapada 2003 hoda «Ab dziaržaŭnaj daktyłaskapičnaj rehistracyi». Dla vizitu jamu dali termin u paŭtara tydnia, papiaredzili, što ŭ vypadku niajaŭki jaho mohuć pryvieści prymusova.
Ciapier vydańnie ad čytačoŭ atrymała jašče niekalki paviedamleńniaŭ pra zaprašeńni da daktyłaskapiju:
«Na moj adras u Biełarusi taksama pryjšoŭ listok z patrabavańniem na praciahu dvuch tydniaŭ źjavicca na daktyłaskapiju. U paviedamleńni spasyłka na zakon ab dziaržaŭnaj daktyłaskapičnaj rehistracyi, biez padrabiaznaściej. Žyvu ŭ inšaj krainie, VNŽ majecca, ale śpiecyjalnych paviedamleńniaŭ ab im ja nikudy nie słaŭ. Praŭda hod tamu pakazvaŭ jaho pry pierasiačeńni biełaruskaj miažy».
Takoje ž zaprašeńnie atrymaŭ jaho znajomy, jaki žyvie ŭ Biełarusi i VNŽ inšych krain nie maje.
«I ŭžo schadziŭ u RAUS. Tam jamu raskazali, što vyjšaŭ niejki zakon, jaki abaviazvaje prajści daktyłaskapiju ŭsich vajennaabaviazanych (hety zakon vyjšaŭ jašče ŭ 2003 hodzie — devby). Navat tych, chto nie słužyŭ i ŭ kaho vajenny bilet na rukach (heta jakraz moj vypadak).
Znajomy spytaŭ, a što budzie z tymi, da kaho nie dazvoniacca/nie dapišucca. Jamu adkazali, što, maŭlaŭ, buduć šukać, ale nijakich abmiežavańniaŭ dla tych, chto nie prajšoŭ daktyłaskapiju, nibyta niama», — raspavioŭ jon.
Dakładna takoje ž paviedamleńnie pryjšło i svajaku inšaha čytača. Jon taksama žyvie ŭ Biełarusi, nie słužyŭ i maje vajenny bilet na rukach, pracuje miedykam. To bok usie try kiejsy abjadnoŭvaje status vajennaabaviazanaha biez słužby ŭ armii, zaŭvažaje devby.
Druhi čytač žyvie za miažoj. Vyklik na daktyłaskapiju jon atrymaŭ praź blizkaha svajaka — tamu patelefanavali na mabilny.
«Prosta paprasili mianie pryjści na adbitki. Padstaŭ nie nazyvali, terminaŭ taksama, tamu što svajak skazaŭ, što mianie niama ŭ krainie. VNŽ u mianie jość, ale dziaržava pra jaho ničoha nie viedaje. I ja nie vajennaabaviazany: u mianie na rukach vajeńnik z vyzvaleńniem pa miedycynskich padstavach».
Mužčyna miarkuje, što vyklik źviazany z tym, što jon znachodzicca ŭ statusie padazravanaha pa «narodnym artykule». Raniej jaho vyklikali na dopyt.
Kamientary
Fašyscki zakon, pryhonny.