Uładalnikaŭ zamiežnych DNŽ i Kartaŭ palaka abaviažuć zdavać adbitki palcaŭ
Saviet Ministraŭ prapanavaŭ papraŭki ŭ zakon «Ab dziaržaŭnaj daktyłaskapičnaj rehistracyi», jakija mohuć zakranuć tysiačy hramadzian Biełarusi. Imi praduhledžvajecca ŭviadzieńnie abaviazkovaj daktyłaskopii — zdačy adbitkaŭ palcaŭ — dla tych biełarusaŭ, chto atrymaŭ zamiežnaje hramadzianstva ci dazvoł na žycharstva za miažoj.
Kali zakonaprajekt budzie pryniaty, ludzi pavinny buduć prachodzić daktyłaskapičnuju rehistracyju pry afarmleńni ci abmienie dakumientaŭ, a taksama pry pastanoŭcy na konsulski ŭlik za miažoj. Vyklučeńni zroblenyja tolki dla dziaciej da 14 hadoŭ i pažyłych ludziej, starejšych za 75 hadoŭ.
U tekście zakonaprajekta havorycca, što hetyja pałažeńni tyčycca tych, chto:
- atrymaŭ hramadzianstva inšaj dziaržavy;
- atrymaŭ dazvoł na žycharstva ci inšy dakumient, jaki daje peŭnyja lhoty ci pieravahi z-za palityčnych, relihijnych pohladaŭ ci nacyjanalnaj prynaležnaści;
- prainfarmavaŭ pra heta orhany ŭnutranych spraŭ abo dypłamatyčnyja pradstaŭnictvy Biełarusi.
Miarkujučy pa farmuloŭcy, novaje praviła moža zakranuć i ŭładalnikaŭ «Karty palaka».
Ułady patłumačyli, što takaja miera nieabchodnaja dla ŭzmacnieńnia kantrolu, pavyšeńnia biaśpieki i bolš efiektyŭnaha vyjaŭleńnia ekstremisckaj dziejnaści ci złačynstvaŭ. Faktyčna heta značyć stvareńnie bolš poŭnaha rejestru bijamietryčnych danych tych, chto maje suviaź ź Biełaruśsiu, ale žyvie za jaje miežami abo maje zamiežnyja dakumienty.
Na hety momant prajekt zakona jašče abmiarkoŭvajecca. Kali jon ustupić u siłu, novyja praviły stanuć abaviazkovymi dla ŭsich asob, paznačanych u dakumiencie.
Kamientary