U Minsku pierajmienavali amal paŭsotni prypynkaŭ — niekatoryja ŭ abychod zakona

Adpaviednaje rašeńnie Minskaha haradskoha vykanaŭčaha kamiteta było apublikavana na partale pravo.by.

Minharvykankam vyrašyŭ prysvoić nazvy 42 prypynkam hramadskaha transpartu, u tym liku imiony Viktara Turava, Arkadzia Smoliča, Stanisłava Maniuški — suprać jakich biespaśpiachova zmahalisia «bondaraŭcy», — a taksama pierajmienavać jašče 46 isnujučych prypynkaŭ.

Bolšaść pierajmienavańniaŭ fiksuje źmieny, što adbylisia ŭ haradskim asiarodździ za apošni čas. Tak, prypynak «Dom kino» staŭ prypynkam «Dom moładzi», a prypynak «Aŭtavakzał Uschodni» pierajmienavany ŭ «Centr techničnaj tvorčaści».

Adnak značnaja častka źmien u nazvach prypynkaŭ źviazanaja ź ich rusifikacyjaj, što supiarečyć Zakonu «Ab najmieńni hieahrafičnych abjektaŭ».

Pavodle hetaha zakona, u Biełarusi najmieńni hieahrafičnym abjektam prysvojvajucca na biełaruskaj movie, ź jakoj sposabam tranślitaracyi pieradajucca na ruskuju movu. Rašeńniem ža Minharvykankama šerah nazvaŭ, jakija byli zhodna z zakonam tranślitaravanyja, ciapier pierakładzieny dasłoŭna na ruskuju movu.

Tak užo zhadany prypynak «Centr techničnaj tvorčaści» byŭ dasłoŭna pierakładzieny jak «Cientr tiechničieskoho tvorčiestva», a «Dom moładzi» — jak «Dom mołodioži».

«Park 60‑hodździa Vialikaha Kastryčnika» zamiest tranślitaracyi — «Park 60‑letija Vielikoho Kostričnika», jakaja musiła być pavodle zakona, byŭ pierakładzieny jak «Park 60‑letija Vielikoho Oktiabria».

«Handlovy centr «Ždanovičy» («Handlovyj cientr «Ždanoviči») pierajmienavali tolki ŭ ruskim varyjancie: «Torhovyj cientr «Ždanoviči». Hetak ža «Čirvonaja» na praśpiekcie Mašerava atrymała nazvu «Krasnaja», «Viesiołkavaja» — «Radužnaja», «50 let Pieramohi» — «50 let Pobiedy», «Čihunočnaja stancija «Ozieriŝie» — «Žieleznodorožnaja stancija «Ozieriŝie», «Mohiłki «Lesnyje» — «Kładbiŝie «Lesnoje», «Pierieułok Promysłovyj» — «Pierieułok Promyšlennyj». 

Hetyja źmieny mohuć zdavacca łahičnymi, ale jany nie adpaviadajuć dziejučamu zakanadaŭstvu. Adpaviednaje pałažeńnie było ŭniesiena ŭ zakon nie vypadkova — jaho meta palahaje ŭ tym, kab vyrašyć błytaninu z hieahrafičnymi nazvami, što ŭźnikła ŭ saviecki čas praz vykarystańnie roznych moŭ dla najmieńniaŭ, i nie dać uźniknuć novaj. 

Heta norma pavinna była strymać čynoŭnikaŭ ad nadańnia abjektam biessensoŭnych i ideałahičnych nazvaŭ i zaachvocić vykarystańnie histaryčnych hieahrafičnych nazvaŭ i imionaŭ słavutych dziejačaŭ, ź jakimi takich kazusaŭ by nie adbyłosia.

Adnak miascovyja ŭłady z zajzdrosnaj upartaściu praciahvajuć stvarać «vulicy Budaŭnikoŭ», jakija, zhodna z zakonam, u ruskaj movie pieratvarajucca ŭ «ulicu Budavnikov». A ciapier, vidać, vyrašyli ŭvohule ihnaravać zakon. 

• 2
• 1
• 1
• 24
• 4
• 1
• 19
• 0