U Polščy stali razhaniać, što biełaruskija i ŭkrainskija daktary daviali pacyjenta da śmierci. Heta akazałasia fejkam
Bujnyja polskija ŚMI napisali 14 listapada pra trahičnaje zdareńnie va Urocłavie. Nibyta ŭ adnoj z pryvatnych klinik horada pamior pacyjent, bo daktary ź Biełarusi i Ukrainy nie viedali polskaj movy i nie zrazumieli jaho. Ale historyja nasamreč tut zusim inšaja, piša na «Radyjo Svaboda» Dźmitryj Hurnievič.
Impulsam da źjaŭleńnia publikacyj staŭ dopis u fejsbuku polskaj jeŭradeputatki Evy Zajančkoŭskaj.
«Piersanał, jaki składaŭsia z hramadzian Ukrainy i Biełarusi, nie zmoh zrazumieć pacyjenta i daviedacca, što ŭ jaho raniej byŭ anafiłaktyčny šok. Jamu ŭviali kantrasnaje rečyva, što pryviało da mocnaj alerhičnaj reakcyi. Miedyki nie viedali, jak akazać dapamohu i jak vyklikać chutkuju dapamohu. Pacyjent pamior…» — napisała Zajančkoŭska, jakaja pradstaŭlaje jeŭraskieptyčnuju i antymihranckuju kaalicyju «Kanfiederacyja». Heta palityčnaja siła patrabuje źmieny polskaj palityki, nakiravanaj na padtrymku Ukrainy i ŭkrainskich uciekačoŭ.
Dopis Zajančkoŭskaj staŭ vielmi papularnym. Na momant publikacyi im padzialilisia 3 tysiačy razoŭ. Absalutnaja bolšaść z tysiač kamientataraŭ aburajucca daktarami-mihrantami, jakija nie viedajuć polskaj movy, i damahajucca ich pakarańnia. U padobnym tonie napisanaja i rešta dopisu samoj Zajančkoŭskaj. Jana ŭskładaje adkaznaść na «patałahičnuju palityku lohkaha dazvołu zamiežnym lekaram pracavać u Polščy» i patrabuje, kab aŭtary takich praviłaŭ išli «preč».
Adkul Zajančkoŭska ŭziała hetuju infarmacyju?
Jana spasyłajecca na doktara Paŭła Urubleŭskaha, kiraŭnika Nižniesilezskaj miedycynskaj rady. «Radyjo Svaboda» znajšło pieršakrynicu. Na minułym tydni Urubleŭski daŭ intervju jutub-kanału z 10 padpisčykami. U im jon skazaŭ nastupnaje:
«Sprava ciapier u sudzie. Nichto nie kaža pra toje, što jana datyčyć daktaroŭ z-za miažy, bo heta palityčna niekarektna. Ale heta tak».
Ad 8.00 ranicy «Radyjo Svaboda» sprabavała skantaktavacca z Urubleŭskim pa telefonie i praz mejł. Jon nie adkazvaŭ na prośby nakont detalaŭ zdareńnia.
14 listapada ŭ šerahu bujnych polskich ŚMI źjavilisia publikacyi sa spasyłkaj na słovy Urubleŭskaha, skazanyja padčas hetaha intervju. U nivodnym z artykułaŭ niama nijakich novych detalaŭ — daty zdareńnia, nazvy kliniki, cytat svajakoŭ achviary ci pravaachoŭnych orhanaŭ. Usie teksty bazujucca vyklučna na cytacie zhadanaha Urubleŭskaha nieviadomamu jutub-kanału.
Spravu ŭ piatnicu musiła navat prakamientavać prakuratura va Urocłavie. Jana abvierhła historyju, jakuju raspavioŭ Urubleŭski i niekatoryja polskija ŚMI.
«Infarmacyja, jakaja źmiaščajecca ŭ zajavie paznačanaj asoby i paśla ŭ pres-publikacyjach, nienadziejnaja», — zajaviła ŭ intervju vydańniu Konkret24 prakurorka Karalina Štocka-Mycek, pres-sakratarka akruhovaj prakuratury va Urocłavie. Trahičnaja śmierć pacyjenta ad anafiłaktyčnaha šoku sapraŭdy zafiksavanaja va Urocłavie. Ale heta adbyłosia 3 hady tamu, i biełarusy z ukraincami nie majuć da jaje dačynieńnia.
Urocłaŭskaja prakuratura pravodzić rasśledavańnie pa fakcie nieaściarožnaha pryčynieńnia śmierci 49‑hadovamu Daminiku K. Jon pamior 24 studzienia 2023 hoda ŭ vyniku tak zvanaj miedycynskaj chałatnaści.
Prakuratura abviarhaje
Prakuratura zajaŭlaje, što infarmacyja, zhadanaja ŭ słovach Paŭła Urubleŭskaha i artykułach u presie, «nijakim čynam nie paćviardžajecca faktami, vyśvietlenymi padčas rasśledavańnia, praviedzienaha rajonnaj prakuraturaj Urocłava».
«Infarmacyja pra toje, što miedycynski piersanał paznačanaj kliniki nie vałodaŭ polskaj movaj i što heta pryviało da chałatnaści, jakaja pryviała da śmierci pacyjenta, zjaŭlajecca iłžyvaj i moža ŭvieści ŭ zman čytačoŭ publikacyj», — havorycca ŭ zajavie.
U prakuratury dadali, što bolšaść supracoŭnikaŭ kliniki — hramadzianie Polščy. Dva inšaziemcy, jakija tam pracujuć, vałodajuć polskaj movaj i nie majuć prablem z kamunikacyjaj.
Polskija žurnalisty skantaktavalisia taksama z Paŭłam Urubleŭskim. Jon śćviardžaje, što žurnalist, ź jakim jon razmaŭlaŭ, pamyłkova jaho zrazumieŭ. Kali jamu nahadali, što heta jaho poŭnaje vykazvańnie, jon spasłaŭsia na toje, što čuŭ viersiju pra adkaznaść lekaraŭ z-za miažy ad advakata. Jon dadaŭ, što nie niasie adkaznaści za interpretacyju svaich słoŭ.
Što adbyłosia nasamreč. Viersija prakuratury:
«Padčas pravierki było ŭstanoŭlena, što 24 studzienia 2023 hoda Daminik K. źviarnuŭsia ŭ kliniku va Urocłavie dla praviadzieńnia MRT brušnoj paražniny z kantrastam. Pierad abśledavańniem piersanał kliniki ŭ prysutnaści lekara pravioŭ ankietavańnie i apytaŭ pacyjenta. Pacyjent nie paviedamlaŭ pra alerhiju abo chraničnyja zachvorvańni. Abśledavańnie, praviedzienaje biez kantrastu, prajšło narmalna. Paśla ŭviadzieńnia 10 mililitraŭ kantrastu pacyjent amal adrazu nacisnuŭ knopku ekstrannaj dapamohi, paviedamiŭ pra zadyšku i zakašlaŭsia. Praz chvilinu jon straciŭ prytomnaść. Piersanał kliniki i lekar nieadkładna pačali reanimacyju pacyjenta. Uvieś hety čas technik padtrymlivaŭ pastajannuju telefonnuju suviaź z dyśpietčaram chutkaj miedycynskaj dapamohi. Praź niejki čas vyratavalnuju apieracyju praciahnuła bryhada chutkaj miedycynskaj dapamohi. Niahledziačy na miedycynskaje ŭmiašańnie, paśla transpartavańnia ŭ balnicu była kanstatavanaja śmierć pacyjenta».
«Ja znoŭ ratuju ludziej». Čempijonka muaj-taj vosiem hadoŭ pracavała na «chutkaj» u Biełarusi, a ciapier robić heta ŭ Polščy
Fienomien miedycynskaha ŭniviersiteta: kabała z raźmierkavańniem, nievialikija zarobki, ale ad abituryjentaŭ adboju niama
«Ludzi iduć u miačeci, a nie lečać psichičnyja chvaroby». Biełaruski psichijatr raskazaŭ ab pracy va Uźbiekistanie i ŭ Polščy
Ciapier čytajuć
Alimpijski čempijon Aramnaŭ: Nam vyhadnaja praciahłaja vajna, i Vova dy Saša ŭ joj pieramohuć12
Kamientary