Ekśpierty vyznačyli asobu zahinułaha alpinista, cieła jakoha lažyć na Eviereście ŭžo 30 hadoŭ
Trup alpinista, šyroka viadomaha jak «Zialonyja čaraviki», znachodzicca na Eviereście z 1996 hoda. Z taho času jon zastavaŭsia adnoj z hałoŭnych zahadak hary. Ciapier jaho asoba ŭstanoŭlena: analiz DNK pakazaŭ, zahinułym byŭ indyjski alpinist Dordže Morup, jakomu na momant hibieli było 47 hadoŭ, piša BILD.
Inda-tybieckaja pamiežnaja palicyja (ITBP) paćvierdziła asobu zahinułaha paśla atrymańnia vynikaŭ DNK-testu. Spusk cieła Morupa z tak zvanaj «zony śmierci» (na vyšyni bolš za 8000 mietraŭ) zapłanavany na hetaje leta. Zaraz ITBP šukaje kampaniju, jakaja śpiecyjalizujecca na praviadzieńni vyšynnych ratavalnych i evakuacyjnych apieracyj.
10 maja 1996 hoda Morup uvachodziŭ u skład hrupy z šaści čałaviek, jakaja rabiła ŭzychodžańnie na Evierest pa paŭnočnym schile.
Kali hrupa patrapiła ŭ mocnuju śniežnuju buru niedaloka ad viaršyni, troje ŭdzielnikaŭ paviarnuli nazad. Morup praciahnuŭ uzychodžańnie z dvuma inšymi alpinistami. Nieŭzabavie paśla hetaha ŭsie troje zahinuli na hary.
Pakolki apieracyi pa spusku cieł z takoj vyšyni ličacca vielmi niebiaśpiečnymi, cieła Morupa zastavałasia na hary kala 30 hadoŭ — śnieh i lod zachavali jaho za hetyja dziesiacihodździ.
Dla mnostva alpinistaŭ, jakija šturmujuć Evierest, hetaje cieła stała zmročnym aryjenciram na maršrucie da viaršyni pa Paŭnočna-ŭschodnim hrebni.
Na praciahu dziesiacihodździaŭ asoba zahinułaha zastavałasia pradmietam sprečak. Mnohija alpinisty ličyli, što «Zialonyja čaraviki» — heta indyjski alpinist Cevanh Pałdžor, jaki znachodziŭsia ŭ adnoj hrupie z Morupam i zahinuŭ va ŭzroście 28 hadoŭ.
Kamientary