Vydaviectva «Januškievič» padzialiłasia statystykaj za pieršuju pałovu 2026 hoda. Jana sumnaja

Za pieršaje paŭhodździe 2026 hoda placoŭkami pry vydaviectvie było vykanana 2829 zakazaŭ. Adznačajecca, što heta na 28 pracentaŭ mienš, čym u druhim paŭhodździ 2025 hoda.

Najbolš knih zakazvali ŭ Polščy, na druhim miescy apynułasia Hiermanija, na trecim — Litva.

1 miesca — Habryjel Harsija Markies «Vosień patryjarcha» — 342 pradadzienyja ekzemplaraŭ na sumu 16755 złotych.

2 miesca — 3 tom «Silva Rerum» Kryściny Sabalaŭskajcie — 164 ekzemplaraŭ na sumu 10900 złotych. Navinka vyjšła ŭ studzieni 2026 hoda.

3 miesca — 4 tom «Silva Rerum» Kryściny Sabalaŭskajcie — 157 ekzemplaraŭ na sumu 10373 złotych.

4 miesca — «Sabaki Eŭropy» — 154 ekzemplaraŭ na sumu 10628 złotych. Heta kniha stabilna pradajecca ŭ kniharni ŭžo piać hadoŭ.

5 miesca — 1 tom «Silva Rerum» Kryściny Sabalaŭskajcie — 151 ekzemplar na sumu 9832 złotych. Kniha pradajecca z kastryčnika 2025 hoda.

Nastupnaja piaciorka vyhladaje tak:

6. Kamiła Cień «Nastupny prypynak — śmierć»

7. Chorchie Łuis Borchies «Tvory. Tom I»

8. Kamiła Cień «Ja prydu za taboj u aŭhuście»

9. Džon Tołkin «Vaładar Piarścionkaŭ. Bractva Piarścionka»

10. Džon Tołkin «Vaładar Piarścionkaŭ. Viartańnie karala».

Bližejšaja kniha vydaviectva «Pflaŭmbaŭm» — 11‑ie miesca («Pieramiena miescaŭ» Juhasi Kalady), vydaviectva «Łohvinaŭ» — 25‑ie miesca («Nichto dabrom nie daść zbaŭleńnia» Siarhieja Piasieckaha), vydaviectva «Hutenbierh» — 28‑ie miesca («Šlach drobnaj svołačy» Jevy Viežnaviec), vydaviectva «Mianie niama» — 60‑ie miesca («Sini dom» Aleny Piatrovič).

Kali brać udzielnyja doli vydaviectvaŭ u prodažach kniharni pa kolkaści pradadzienych ekziemplaraŭ, to sprava vyhladaje tak:

• «Januškievič» — 51 %;
• «Viasna» — 10 %;
• «Pflaŭmbaŭm» — 7,5 %;
• «Hutenbierh» — 7 %;
• «Knihaŭka» — 6,5 %
• «Łohvinaŭ» — 5 %;
• «Kamunikat» — 3%;
• «Mianie niama» — 1,5 %.

Što tyčycca vydavieckaj dziejnaści, to ciapier, pa słovach Andreja Januškieviča, hałoŭnaja ŭvaha nadajecca skaračeńniu vydatkaŭ, zachavańniu najaŭnaj aŭdytoryi i prodažu knih, jakija ŭžo byli vydadzienyja raniej. Takim čynam u vydaviectvie spadziajucca nazapasić srodki dla vypusku novych vydańniaŭ, adnak pakul zrabić heta atrymlivajecca nie ŭ poŭnaj miery.

Za šeść miesiacaŭ vydaviectvam «Januškievič» było vydadziena tolki try novyja knihi, pryčym dźvie ź ich vyjšli bieź finansavaha ŭdziełu samoha vydaviectva. Adnačasova staŭka była zroblena i na raspaŭsiudžvańnie knih inšych biełaruskich vydaviectvaŭ pry dapamozie stvoranaj raniej infrastruktury, a taksama prodažu praź mižnarodnyja markietpłejsy.

Pavodle acenki vydaviectva, novaja stratehija pakul prynosić tolki častkovy vynik. Za apošnija paŭhoda nivodnaja biełaruskaja knižnaja navinka nie stała sapraŭdnym biestsieleram. Heta tyčycca jak mastackaj litaratury, tak i pierakładnych dy dakumientalnych vydańniaŭ. 

U vydaviectvie adznačajuć, što ŭsio bolš prykmietnym stanovicca ahulnaje źmianšeńnie cikavaści da knih i skaračeńnie kolkaści čytačoŭ. Heta, na ich dumku, adpaviadaje ahulnamu kryzisu biełaruskich supolnaściaŭ. Kab pryciahnuć novych kupcoŭ, vykarystoŭvajucca rekłama ŭ sacyjalnych sietkach i bolš aktyŭnaja praca z aŭdytoryjaj, adnak biez zapatrabavanych navinak istotna źmianić situacyju składana. 

Asobna ŭ spravazdačy adznačajecca ŭpłyŭ pryznańnia vydaviectva «ekstremisckim». Za čatyry miesiacy paśla hetaha, jak śćviardžajuć u kampanii, značna źniziłasia kolkaść zakazaŭ ź Biełarusi, bo mnohija pakupniki bajacca nabyvać knihi. Heta, u svaju čarhu, pryvodzić da nazapašvańnia vialikich składskich zapasaŭ, što stvaraje dadatkovyja finansavyja ciažkaści.

• 0
• 0
• 0
• 2
• 2
• 24
• 1
• 3