Kiraŭnica misii demsił: Za Ukrainu zahinuła kala sta biełaruskich dobraachvotnikaŭ
Pra heta zajaviła ŭ efiry radyjo KyivFM kiraŭnica misii demakratyčnych sił u Kijevie Śviatłana Šacilina, paviedamlaje «Pozirk».
«My dakładna razumiejem, što biez svabodnaj, demakratyčnaj, niezaležnaj Ukrainy niemahčymaja svabodnaja, demakratyčnaja, prajeŭrapiejskaja Biełaruś. I što asnoŭny faktar, jaki šturchaje biełarusaŭ iści ŭ dobraachvotniki, — heta ideałahičny faktar», — kaža Šacilina.
Pavodle jaje słoŭ, «kala sotni» biełarusaŭ zahinuli ŭ bajach suprać Rasii.
«I kali luby biełarus idzie vajavać za Ukrainu, jon aŭtamatyčna atrymlivaje termin jak teraryst. Heta pieršaje. I druhoje: treba razumieć, što ŭ Biełarusi nie admienienaje śmiarotnaje pakarańnie. I jaho rodnyja, jakija zastajucca ŭ Biełarusi, aŭtamatyčna źjaŭlajucca ludźmi, da jakich mohuć pryjści chłopcy ź viedamstva z troch litar», — padkreśliła kiraŭnica misii demsił.
«I, niahledziačy na ŭsio heta, biełarusy heta robiać, i tamu heta tyja, kim my hanarymsia, tyja, chto daje nam mahčymaść adčuvać siabie ludźmi», — adznačyła jana.
Šacilina padziakavała «kožnamu biełarusu, kožnaj mamie» dobraachvotnikaŭ, jakija stali na abaronu Ukrainy.
«Ja sama jak mama dobraachvotnika vyrazna razumieju, što ty adčuvaješ, jak heta enierhietyčna niaprosta čakać syna z vajny. Ale ja tut, u biaśpiečnych umovach, a što adčuvaje mama, jakaja pavinna być tam, u Biełarusi, razumiejučy, što ŭ lubuju chvilinu da jaje mohuć pryjści? Nizki pakłon, i chaciełasia b, kab ukrainskaje hramadstva voś mienavita heta razumieła, što dla nas heta niebiaśpieka ŭ kubie, napeŭna», — skazała kiraŭnica misii.
Pry hetym, pavodle jaje słoŭ, biełaruski dobraachvotnik va Ukrainie pa-raniejšamu maje prablemy pravavoha i finansavaha kštałtu, «adčuvajučy siabie ŭ roli prośbita, a nie ŭ roli bajca, jaki hodna vykonvaje svoj abaviazak». Jana vykazała nadzieju, što Viarchoŭnaja Rada Ukrainy «źmienić hetuju situacyju».
10 žniŭnia na kanfierencyi «Novaja Biełaruś» u Varšavie Śviatłana Cichanoŭskaja paviedamiła ab pryznačeńni Śviatłany Šacilinaj, jakaja zamianiła na čale misii Hienadzia Mańko. Šacilina pastajanna pražyvaje va Ukrainie.
Dakładnych źviestak ab kolkaści zahinułych va Ukrainie biełaruskich dobraachvotnikaŭ niama. Raniej ŚMI paviedamlali, što ŭ bajach suprać RF zahinuła kala 70 biełarusaŭ.
Ciapier čytajuć
62‑hadovaja biznesvumen i miljanierka Iryna Ciareščanka padzialiłasia historyjaj svajho kachańnia z mužčynam, na 20 hadoŭ małodšym za jaje6
Kamientary