Paplečnik Zialenskaha pra pieramovy: Damova budzie abo drennaja, abo vielmi drennaja, abo jaje nie budzie
Mahčymaść zaklučyć dobruju mirnuju damovu z Rasijaj na siońniašni dzień adsutničaje: havorka idzie pra drennuju damovu abo jaje adsutnaść i praciah vajny da źjaŭleńnia novaha akna dla pieramovaŭ, ličyć kiraŭnik praŭładnaj frakcyi partyi «Słuha naroda» David Arachamija, piša «Interfaks-Ukraina».
«My razumiejem: usie ludzi, jakija myślać (chacia jość šmat tych, chto dahetul ličyć, što my pavinny nastojvać na niejkich fantastyčnych umovach damovy), — jana (damova) budzie abo drennaja, abo vielmi drennaja, abo jaje nie budzie», — skazaŭ jon na mierapryjemstvie, arhanizavanym vydańniem NV, «Ukraina i śviet napieradzie 2026», jakoje prajšło ŭ Kijevie ŭ čaćvier.
Adkazvajučy na pytańnie pra vierahodnaść zaklučeńnia damovy na hetym etapie pieramovaŭ, Arachamija adznačyŭ, što pry ciapierašnim cisku z boku amierykancaŭ, chacia jon i bolšy na Ukrainu, čym na RF, šaniec jość. U toj ža čas biez udziełu ZŠA šancaŭ na damovu nie budzie — zastaniecca tolki vajenny šlach vyrašeńnia prablemy.
«Faktyčna zastajecca adno vialikaje pytańnie, dakładniej — dva. Nam patrebnyja harantyi biaśpieki, kab była stopracentnaja harantyja, što vajna znoŭ nie pryjdzie da nas. Heta było jašče z časoŭ Stambuła: harantyi biaśpieki — pytańnie numar adzin, jakoje patrebna Ukrainie. A im patrebny Danbas. I tut u nas čyrvonaja linija — my nie možam addać naš Danbas», — apisaŭ svajo bačańnie situacyi kiraŭnik frakcyi «Słuha naroda».
Na jaho dumku, navat kali b znajšlisia palityki, jakija prapanavali b addać Danbas, heta niemahčyma realizavać. «Nielha navat niejkija zakony prasoŭvać, tym bolš za ich hałasavać. Heta niemahčymy scenar z punktu hledžańnia realizacyi», — rastłumačyŭ jon.
«Tady adziny šlach, jakim možna ruchacca, kali heta adzinaje pytańnie nie vyrašana, — heta rabić niešta vakoł Danbasu, niejkija hibrydnyja madeli. Ale dla hetaha treba, kab rasijanie byli da hetaha hatovyja», — adznačyŭ Arachamija, zhadaŭšy padziei kanca minułaha stahodździa na Bałkanach.
Pavodle jaho słoŭ, ciapier u rasijan rytoryka vielmi prostaja — «čorna-biełaja»: «addajcie Danbas».
«Dziarždepartamient šukaje histaryčnyja precedenty, jakija isnavali pa składanych pytańniach: Bośnija i Hiercahavina paśla raspadu Juhasłavii i inšaje. Ludzi šukajuć roznyja varyjanty, jak mirnym šlacham znajści farmat, jaki zadavolić abodva baki. A dla nas u hety ž čas važna, pakul hetyja abmierkavańni iduć, nastojliva pracavać nad harantyjami biaśpieki», — padkreśliŭ kiraŭnik frakcyi «Słuha naroda».
Na jaho dumku, anałah artykuła 5 NATA słaby, bo jon praduhledžvaje, što ŭ vypadku vajennaj ahresii krainy NATA na praciahu 72 hadzin pavinny sabracca i pravieści kansultacyi.
«Prabačcie, ale 24 lutaha za 72 hadziny my amal stracili krainu. Nas heta nie zadavalniaje. Tamu pavinna być kankretyka: kolki zbroi, jakoj zbroi, jakoj budzie naša armija, jak jana budzie finansavacca, jakija ŭ nas jość tak zvanyja pakiety strymlivańnia — rakiety i inšaje», — rastłumačyŭ Arachamija.
«Ja spadziajusia, što ŭ takoj razvažlivaj aŭdytoryi, jakaja siońnia sabrałasia ŭ hetaj zale, niama ludziej, jakija nie razumiejuć, što za ŭkraincaŭ va Ukrainie nichto nie budzie vajavać čužymi sałdatami, što tolki my sami možam być sabie harantami, a nam patrebna tolki dapamoha i mocnaja armija», — dadaŭ kiraŭnik frakcyi «Słuha naroda».
Ciapier čytajuć
20‑hadovuju dziaŭčynu z ahraharadka Makrany na miažy z Ukrainaj asudzili za Hajuna4
20‑hadovuju dziaŭčynu z ahraharadka Makrany na miažy z Ukrainaj asudzili za Hajuna
Biełaruś užo nie tolki pra palitviaźniaŭ. Z čym Śviatłana Cichanoŭskaja pajechała na adzin z hałoŭnych forumaŭ pa biaśpiecy ŭ ZŠA i što tam rabiŭ Siarhiej Cichanoŭski1818
Kamientary
Tak i jość, što 5 artykuł, što jaho anałah heta pryhožaja kazka, ale ž chtości da hetaha časa maryć, što 5 artykuł heta mara našaj budučyni.