Načalnik kryminalnaha vyšuku MUS bačyŭ prahułačny dvoryk SIZA KDB z akna svajho kabinieta, a potym sam staŭ viaźniem

Apisanyja padziei adbyvalisia ŭ 2024 hodzie, kali zakruciłasia sprava «Hipa». Alaksandr Łukašenka aburyŭsia zarobkami top-mieniedžaraŭ rytejłavych kampanij, siłaviki pajšli pa ofisach z pahromami. U pryvatnaści, byŭ zatrymany ŭłaśnik «Biełvilesdena» Vasil Varfałamiejeŭ. Pra zatrymańnie mienavita Savickaha infarmacyi raniej nie było. 

Čytajcie taksama: Aryštavany biełaruski naftavy mahnat i saŭładalnik «Hipa» Vasil Varfałamiejeŭ

«U kamieru zajšoŭ niemałady mužčyna, užo sivy. Kaža: «Nu, dobry viečar!» Miescaŭ nie było, to jamu prapanavali raźmiaścicca pad nižniaj naraj. A tam nizkavata, miesca mała — prosta nie ŭłazić tudy. To my rečy svaje niejak raśpichali, kab jaho pakłaści. Jašče ž treba, kab i nie hałavoj da parašy. (Majecca na ŭvazie viadro — u SIZA KDB nie va ŭsich kamierach jość kanalizacyja, adpaviedna, viaźni chodziać u viadro, jakoje raz na sutki vynosicca ŭ supravadžeńni aficera KDB. — NN).

Jon ulohsia, na nastupnyja dni razhavarylisia, to jon pryznaŭsia, što były aficer milicyi. I nie prosta aficer, a načalnik Upraŭleńnia kryminalnaha vyšuku Ministerstva ŭnutranych spraŭ Anatol Savicki. I vokny jaho kolišniaha kabinietu vychodzili prosta na prahułačny dvoryk Amierykanki, SIZA KDB. «Raniej hladzieŭ uniz, bačyŭ ludziej, dumaŭ: a chto jany i čaho tudy trapili?», — kazaŭ Savicki.

A pra bijahrafiju svaju adrazu nie pryznavaŭsia, bo chacieŭ razabracca, chto ź im u kamiery.

My jašče śmiajalisia: niaŭžo dumaŭ, što my ciabie padrežam? Jon nasamreč byŭ napałochany, ujaŭlaŭ što ŭ SIZA KDB publika takaja, što moža trapicca realny bandyt, jaki łyžku zatočyć i ŭvatknie. Ale ŭ nas u kamiery byli tolki intelihienty.

Raskazvaŭ, maŭlaŭ, pamiatajecie vybuch na stele ŭ Minsku ŭ 2008? Voś za jaho mianie i źniali, bo nie praduchiliŭ.

I jon pajšoŭ pracavać da pryvatnikaŭ, u vyniku staŭ vykanaŭcam abaviazkaŭ dyrektara «Biełvilesdena» — heta sietka kramaŭ «Hipa», — skazaŭ nam surazmoŭca.

Savicki tłumačyŭ sutnaść zaviedzienaj kryminalnaj spravy. Pa jaho słovach, siłaviki znajšli niejkuju afilijavanuju firmu, jakaja akazvała pasłuhi asnoŭnaj jurydyčnaj asobie. Na heta pahladzieli jak na sprobu sychodu ad padatkaŭ i aryštavali kuču ludziej i z «Hipa», i z toj kampanii.

«A ŭ jaho pazicyja była: «Dyk firma zasnavana da taho, jak ja pryjšoŭ na rabotu. Ja nie viedaŭ, što tam niešta jość». A jamu kazali, što ŭsio ty viedaŭ, padła. Ahułam pytańnie tam było ŭ tym, kab zapłacić. Pry hetym naličanaja suma škody była pa jahonym razumieńni mizernaja, i jon hatovy byŭ pahadzicca i kampiensavać jaje choć adrazu. Ale tam užo pačalisia niejkija hulni z dadatkovymi patrabavańniami da ŭłaśnikaŭ, i siabie jon razhladaŭ jak zakładnika z metaj akazańnia na ich cisku.

Potym niekatorych mienš značnych ludziej pačali vypuskać —buchhałtarak, naprykład. 

Savicki paličyŭ, što jaho taksama voś-voś vypuściać, z usim raźbiarucca i abaviazkova vypuściać, što jon ni pry čym.

Heta pieršaja nadzieja luboha čałavieka, jaki trapiŭ u SIZA. Śledčyja hetuju iluziju nie raźviejvajuć, i my taksama jaho nie adhavorvali. Nu vieryć, što vyjdzie nie siońnia dyk zaŭtra, chaj.

Heta jamu ŭ vyniku vyjšła bokam, bo ŭ niejki dzień u akienca praraŭli: «Savicki, na vychad!». Jon uzradavaŭsia, što voś jana, svaboda. Z usimi sardečna raźvitaŭsia, pakinuŭ nam usie svaje rečy. Našy dźviery zamknulisia, ale čujem — susiednija bracnuli. Jaho prosta ŭ inšuju kamieru pieraviali. A jon tudy zusim pusty pryjšoŭ, bieź ničoha, navat zubnuju ščotku pakinuŭ», — dadaŭ surazmoŭca. 

Imavierna, nieŭzabavie Savicki ŭsio ž vyjšaŭ na svabodu i viarnuŭsia na tuju ž samuju rabotu. U internecie možna znajści dakumienty «Biełvilesdena» za 2025 hod, padpisanyja «v.a. hienieralnaha dyrektara A.I. Savickim».

***

Pavialičyć

Anatol Savicki naradziŭsia ŭ vioscy Siakierka Białynickaha rajona. Pačynaŭ słužbu ŭ adździele pa raskryćci kradziažoŭ aŭtatranspartu ŭpraŭleńnia kryminalnaha vyšuku UUS Minharvykankama ŭ 1995 hodzie. Zajmaŭ pasadu staršaha opierupaŭnavažanaha pa asabliva važnych spravach.

U 2001 hodzie staŭ namieśnikam načalnika ŭpraŭleńnia kryminalnaha vyšuku. U 2003 hodzie byŭ pryznačany načalnikam upraŭleńnia kryminalnaha vyšuku. U 2008 hodzie zvolnieny pa ŭzroście. Zvańnie — padpałkoŭnik milicyi.

U 2009 hodzie Savicki trapiŭ u dakład tahačasnaha hienprakurora Ryhora Vasileviča, jaki abvinavaciŭ šerah dziaržsłužačych u niezakonnym atrymańni ziamielnych učastkaŭ. Savicki adkazvaŭ, što ŭžo na piensii i ličyć traplańnie svajho proźvišča ŭ śpis Vasileviča pamyłkaj.

• 0
• 1
• 2
• 3
• 2
• 2
• 1
• 1