Jarasłaŭ Ramančuk daje prahnoz, kali skončycca vajna. I raskazvaje, čym ciapier zajmajecca i jak jaho šakavali zajavy Babaryki
Pahutaryli z ekanamistam, kandydatam u prezidenty 2010 hoda Jarasłavam Ramančukom pra apošnija hučnyja padziei i jaho žyćcio va Ukrainie padčas vajny.
Čym ciapier zajmajecca Ramančuk
Jarasłavu Ramančuku 59 hadoŭ. Jon byŭ adnym ź dziesiaci kandydataŭ na prezidenckich vybarach u 2010 hodzie. Tady CVK daŭ jamu treciaje miesca, namalavaŭšy 1,98%. Biełaruski palityk i ekanamist z 2021 hoda žyvie va Ukrainie.
Padčas razmovy z «Našaj Nivaj» (jana adbyłasia 19 śniežnia ŭ 15‑iu hadavinu Płoščy) Ramančuk znachodziŭsia ŭ siabie doma ŭ Kijevie biez elektryčnaści, što było chutčej normaj, čym vyklučeńniem. Biez elektryčnaści ŭ Kijevie ciapier davodzicca pravodzić ad 8 da 16 hadzin u sutki.
Ale za stolki hadoŭ vajny ludzi ŭžo adaptavalisia da ciažkich bytavych umoŭ, kaža Ramančuk, choć u hramadstvie isnuje razdražnionaść, jakuju vyklikaje ŭnutranaja karupcyja.
Ramančuk raskazvaje, čym ciapier zajmajecca.
«Ja źjaŭlajusia prezidentam Mižnarodnaha instytuta svabody. Heta mazhavy centr, jaki stvaryli biznesmieny i intelektuały Ukrainy, jakija aryjentujucca na prasoŭvańnie idei, teoryi i praktyki svabodnaha rynku i kapitalizmu. Hruba kažučy, heta toje, čym ja zajmaŭsia ŭ Biełarusi apošnija 30 hadoŭ u ramkach navukova-daśledčaha centra Mizesa. Takoha rodu mazhavoha centra va Ukrainie raniej nie było», — adznačaje Ramančuk.
Ekanamist tłumačyć, što heta praca źviazana z napisańniem navukovych materyjałaŭ, raspracoŭkaj roznych dakumientaŭ i prahram pa ekanamičnaj palitycy. Dośvied praviadzieńnia sistemnych ekanamičnych reformaŭ va Ukrainie budzie vielmi kaštoŭnym dla postłukašenkaŭskaj svabodnaj Biełarusi, miarkuje Ramančuk.
Adnačasova z pracaj u instytucie Jarasłaŭ Ramančuk zaprošany lektar Ukrainskaha katalickaha ŭniviersiteta.
«Heta adzin z najlepšych pryvatnych univiersitetaŭ Ukrainy. Ja čytaju tam dla studentaŭ kurs makraekanomiki na anhlijskaj movie. Adnačasova ja byŭ daradcam Rady nacyjanalnaj biaśpieki i abarony, my tam pracavali nad ekanamičnaj daktrynaj Ukrainy», — raspaviadaje Ramančuk.
Taksama jon źjaŭlajecca hałoŭnym ekanamistam i ideołaham u hramadzianskim abjadnańni «Vilna nacija».
U lutym 2026 hoda Ramančuk źbirajecca prezientavać čarhovuju knihu, jakaja nazyvajecca «Ukrainskaja płatforma biznesu». Svaju pieršuju knihu va Ukrainie Ramančuk vydaŭ jašče letam 2023 hoda (jana nazyvałasia «Novy Zachad. Ukrainskaja mara»).
Praz zahruzku palityk užo amal hod nie vykładvaje novych videa na svaim jutub-kanale (na im 21 tysiača padpisčykaŭ), dzie raniej analizavaŭ ekanomiku Biełarusi. Ale štotydzień vystupaje ekśpiertam na kanale «Zvyčajnaja ranica».
Kali skončycca vajna?
U minułym intervju «Našaj Nivie» ŭ pačatku sakavika 2024 hoda Ramančuk razvažaŭ, što vajna budzie zaciažnoj. Tady jon spasyłaŭsia na punkt hledžańnia palityka Andreja Iłaryjonava, jaki jašče ŭ pačatku kanfliktu skazaŭ, što vajna ŭ lepšym vypadku skončycca ŭ druhoj pałovie 2025 hoda.
«Ciapier situacyja pamianiałasia, źjaviŭsia mahutny, absalutna niepradkazalny faktar, «čorny lebiedź» u vyhladzie rudaha Trampa», — kaža Jarasłaŭ Ramančuk.
Jon prahnazuje, što vajna, chutčej za ŭsio, praciahniecca jašče kala dvuch hadoŭ. «Heta nie acenka, heta prosta adčuvańnie. Pa tych trendach, jakija jość, chutčej za ŭsio, 2027 hod stanie hodam, kali varta čakać u toj ci inšaj stupieni zakančeńnia abo, skažam tak, paŭzy hetaha kanfliktu», — ličyć ekanamist.
Ramančuk adznačaje, što, niahledziačy na niehatyŭnyja źniešnija i ŭnutranyja faktary, va ŭkrainskim hramadstvie niama apatyi, zasmučeńnia i nastrojaŭ «davajcie zdavacca».
«Duch ukraincaŭ — heta absalutna fienamienalnaja reč, jakaja zaradžaje luboha čałavieka, jaki siudy traplaje. Da hetaha času apytańni pakazvajuć, što 65-70% ukraincaŭ vierać u pieramohu i poŭnaje vyzvaleńnie krainy».
Skandał ź Mindzičam i rejtynh Zialenskaha
Kamientujučy niadaŭni karupcyjny skandał vakoł «Enierhaatama» (adzin z hałoŭnych jaho fihurantaŭ — Cimur Mindzič, saŭładalnik studyi «Kvartał 95» i paplečnik Uładzimira Zialenskaha), Ramančuk kanstatuje, što ŭnutranaja karupcyja, na žal, padčas vajny nikudy nie dziełasia, a tolki prycichła na pieršyja paŭhoda.
«Heta byŭ absalutna idealny čas dla praviadzieńnia hłybokich sistemnych reformaŭ, jaki ŭkrainskija ŭłady ŭpuścili. Choć my — i ja asabista — rychtavali prapanovy, była hatovaja prahrama, ale voś ukrainskaja «hłybinnaja dziaržava», na žal, mabilizavałasia i viarnułasia nazad.
Tamu my čujem pra ŭsie hetyja skandały z «Mindzičhiejtam», z byłym ministram enierhietyki [Hiermanam] Hałuščankam, a kali pamiatajecie, usio pačynałasia ź jajek pa 17 hryŭniaŭ za štuku — tady heta była ŭ razy zavyšanaja cana na zvyčajnyja jajki dla vojska».
Ramančuk miarkuje, što baraćba z karupcyjaj — heta nie stolki vynik pracy siłavych struktur, kolki žurnalistaŭ-rasśledavalnikaŭ i toj častki antykarupcyjnaj infrastruktury, jakaja dosyć daŭno pracuje va Ukrainie.
«Ale čaho, treba pryznać, nie robiać ukraincy — jany nie likvidujuć krynicy karupcyi, jany prosta sprabujuć znajści ludziej, jakija na hetych pasadach u hetaj sistemie buduć pracavać pa-inšamu. A jano tak nie pracuje.
Tamu isnuje razdražnieńnie ŭ hramadstvie, užo byŭ «kardonny» majdan u abaronu SAP i NABU.
Potym na majdan vychodzili ŭ padtrymku pieraraźmierkavańnia resursaŭ na USU, a nie na vydatki miascovych uładaŭ, jakija, na moj pohlad, taksama źjaŭlajucca vielizarnymi, razdźmutymi. Kali pajšoŭ «Mindzičhiejt», naturalna, źjaviłasia šmat pytańniaŭ adnosna taho, jak Zialenski ŭciahnuty ci nie ŭciahnuty, što jon robić ci nie robić», — tłumačyć ekanamist.
Pa słovach Ramančuka, usie hetyja skandały, asabliva apošni, paŭpłyvali na rejtynh Zialenskaha i na davier da ŭłady.
«Ale jak tolki heta zdaryłasia, na hetym fonie znoŭ pajšli zajavy Trampa, cisk na Zialenskaha — i jahony rejtynh znoŭ pavysiŭsia da 61%. Padobnaja situacyja była paśla kanfliktu Trampa ź Zialenskim u Avalnym kabiniecie.
U takija momanty narod abjadnoŭvajecca vakoł prezidenta. Bo Zialenski — heta nie stolki mieniedžar abo kiraŭnik, jaki pavinien adkazvać za stan unutranych sistem, kolki čałaviek, jaki ŭvasablaje abaronu krainy ŭ pieramovach sa źniešnim śvietam».
Pry hetym, adznačaje ekanamist, kali źniešniaha cisku niama, ludzi adrazu ž bolš uvahi źviartajuć na ŭnutranyja prablemy, jakija tarmoziać ekanomiku.
Adnak Ramančuk upeŭnieny, što, niahledziačy na prablemy, bolšaja častka ŭkrainskaha hramadstva nie hatovaja zdavacca i iści na sastupki Rasii — u pryvatnaści, u płanie zdačy terytoryj u abmien na mahčymaje spynieńnie vajny.
«Prychilniki takoha padychodu jość, ale jany ŭ mienšaści. Dumaju, što kali b tearetyčna adbyŭsia refierendum, to za zdaču terytoryj prahałasavali b 10-15% ukraincaŭ», — ličyć Ramančuk.
Vysyłka biełaruskich palitviaźniaŭ i nieadnaznačnyja vykazvańni Babaryki
Va Ukrainu niadaŭna byli vypravadžanyja bolš za 100 palitviaźniaŭ, siarod jakich akazalisia Viktar Babaryka i Maryja Kaleśnikava. Heta vielmi važnaja dla Biełarusi padzieja, pa nazirańniach palityka, była małaprykmietnaj va ŭkrainskim hramadstvie.
«Ukrainski narod u cełym uspryniaŭ dobra toj fakt, što kraina pryniała palitviaźniaŭ ź Biełarusi. Usie razumiejuć, što heta była prymusovaja vysyłka, što Łukašenka — vorah Ukrainy i pamahaty Rasii. Ludzi, jakija źjaŭlajucca vorahami Łukašenki, naturalna, byli ŭspryniatyja pazityŭna».
Sam fakt vysyłki palitviaźniaŭ u vajujučuju Ukrainu Ramančuk nazyvaje sprobaj Łukašenki i Pucina «sutyknuć nas iłbami»: kab u vypadku admovy Ukrainy pryniać ludziej pakazać, jakija ŭkraincy «drennyja».
«Dumaju, raźličvali na pravakacyju i mienavita na taki infarmacyjny efiekt, ale ŭ ich ničoha nie vyjšła. Ukraincy ŭsich sustreli, nakarmili, abahreli.
Kali ž kazać ahułam, to dla Ukrainy vysyłka bolš za 100 biełaruskich palitviaźniaŭ nie stała topavaj padziejaj. Heta supała z amierykanskimi siužetami, abstrełami Adesy, adklučeńniami śviatła. To-bok kali navina ab biełarusach i trapiła ŭ top-10, to niedzie ŭ samym kancy śpisu», — ličyć Ramančuk.
Adpaviedna, nie vyklikali vialikaha rezanansu ŭ hramadstvie i nieadnaznačnyja vykazvańni Viktara Babaryki ab prynaležnaści Kryma i vytokach vajny.
Što tyčycca asabista Jarasłava Ramančuka, to jaho zajavy Babaryki šakavali.
«Babaryka byŭ i zastajecca čałaviekam, jaki nie ŭśviadomiŭ zusim inšuju situacyju i status nacysckaha kramloŭskaha režymu, nie ŭśviadomiŭ pahibielnaść biełaruskaj tatalitarnaj sistemy», — aburajecca palityk.
Ramančuk dadaje, što i ŭ 2020‑m Viktar Babaryka nie byŭ jahonym kandydatam. Palityk ličyć: kali ŭ bližejšy čas Babaryka i Kaleśnikava nie źmieniać i vyrazna nie ahučać svaju pazicyju, to da ich treba budzie stavicca adpaviednym čynam.
«Kali jany ŭ bližejšy tydzień-dva nie zrobiać vyraznych zajavaŭ u dačynieńni da złačynnaj vajny Rasii suprać Ukrainy, nie vykažucca adnaznačna adnosna ahresara Łukašenki, tady ź imi niama pra što razmaŭlać.
Što tyčycca Ukrainy, to tut ich vykazvańni asabliva nie abmiarkoŭvajucca. Na ščaście, Biełaruś tut asacyjujecca ź Cichanoŭskaj, z kalinoŭcami i inšymi biełarusami, jakija znachodziacca tut», — miarkuje Ramančuk.
Ciažkaści ź lehalizacyjaj i ŭkrainskaja biurakratyja
Ramančuk pryznajecca, što jamu davodzicca štohod zmahacca z ukrainskaj biurakratyjaj, kali prychodzić čas abnaŭlać časovy DNŽ.
«Ja žyvu va Ukrainie z 2021 hoda, u mianie jość pastajannaje miesca pracy, ja čałaviek viadomy va ŭkrainskich uradavych i hramadskich kołach, časta vystupaju pa telebačańni, u mianie jość dakumienty ab tym, što ja źjaŭlajusia daradcam, ale ŭsio roŭna kožny hod davodzicca abnaŭlać dakumienty, a biurakratyja va Ukrainie dzikaja», — adznačaje ekanamist.
Ramančuk zaŭvažaje, što biełarusam PMŽ u hady vajny Ukraina amal nie vydavała, ale spadziajecca, što ŭ nastupnym hodzie jamu ŭdasca atrymać hety status.
«Naohuł liču, što treba stavić pytańnie ab źniaćci abmiežavańniaŭ z hramadzian Biełarusi, asabliva ŭ vypadku pastajannaha pražyvańnia va Ukrainie», — kaža jon.
«Naša Niva» — bastyjon biełaruščyny
PADTRYMAĆCiapier čytajuć
ZŠA pieradali Łukašenku najnoŭšyja amierykanskija leki dla pachudańnia10
Kamientary