Chłopiec kupiŭ za svoj košt navahodniuju jalinku i pastaviŭ jaje ŭ centry pasiołka
U vioscy Zarečča pad Smalavičami miascovy žychar Anton Ihnatovič nadumaŭ zładzić śviata dla ŭsich. Dla hetaha jon kupiŭ vialikuju jalinku ŭ lashasie i pastaviŭ jaje kala miascovaj kramy. Razam ź blizkimi ŭpryhožyŭ cackami i hirlandami.
— Zachaciełasia zrabić śviata. Darosłyja chodziać u kramu, dzieci — u sadok, zirnuć — a tut jalinka. Dy i samim pryjemna padyści da jaje ŭ navahodniuju noč. Vyrašyli ciapier kožny hod stavić. Hałoŭnaje, cacak pabolš kupić, — raskazaŭ surazmoŭca vydańniu smolevichi-24.by.
Žychary vioski sa ździŭleńniem i radaściu ŭspryniali inicyjatyvu. Mnohija dumali, što ŭstanoŭka jełki — sprava ŽKH, i byli ździŭleny, daviedaŭšysia, što heta sprava ruk viaskoŭca.
Miascovaja žycharka Kaciaryna Rachmańko padzialiłasia ŭražańniami:
— Vielmi pryjemna, što jalinka viarnułasia. U dziacinstvie ŭ nas taksama stavili, ale potym tradycyja źnikła. A ciapier znoŭ jość śviata — i dreva pryhožaje, pušystaje, z cackami i hirlandami. Nastroj adrazu palepšyŭsia. U asnoŭnym usie śviatočnyja mierapryjemstvy prachodziać u Akciabrskim, ale ciapier i ŭ nas prysutničaje atmaśfiera čaraŭnictva.
— Hirlandaj upryhožvali ŭ minułuju niadzielu. Kali zaharajucca ahni na jalincy, stanovicca pa-sapraŭdnamu śviatočna. Navat bieź śniehu adčuvajecca Novy hod, — kaža jašče adna miascovaja žycharka Natalla Izuit. — Moža, u noč z 31 śniežnia na 1 studzienia chto-niebudź pryjedzie siudy na aŭtamabili, uklučyć muzyku, tady i ludzi, ja dumaju, źbiarucca kala jełki.
Jak raspaviała staršynia Pliskaha sielvykankama Natalla Sakovič, ustanoŭka žyvoj jalinki ŭ centry Zarečča stała sapraŭdnym padarunkam dla žycharoŭ:
— Heta cudoŭnaja inicyjatyva zmahła padaryć śviata 1263 žycharam vioski — mienavita stolki čałaviek było zarehistravana tut na pačatku hoda. Chočacca padziakavać Antonu Alaksandraviču za hetuju cudoŭnuju ideju, a taksama pradpryjemstvu «Łantoryja», jakoje zabiaśpiečyła punkt dostupu da elektraenierhii, kab hirlanda mahła hareć, i ŽKH — jana aharadziła jalinku ŭ metach biaśpieki.
Kamientary