Hierchard Šroder znoŭ zaklikaŭ nie «demanizavać» Rasiju. Jamu rezka adkazali
Jeŭrapiejskija palityki i ŚMI žorstka raskrytykavali byłoha fiederalnaha kanclera Hiermanii Hiercharda Šrodera paśla jaho zaklikaŭ «nie demanizavać Rasiju» i adnavić pastaŭki rasijskich enierharesursaŭ. Svaju pazicyju Šroder vykłaŭ u artykule dla haziety Berliner Zeitung, prapanavaŭšy źmianšać kanfrantacyju z Maskvoj, piša Euronews.
Šroder nazvaŭ poŭnamaštabnuju vajnu Rasii suprać Ukrainy parušeńniem mižnarodnaha prava i zajaviŭ, što kanflikt nieabchodna zaviaršać dypłamatyčnym šlacham. Pry hetym jon padkreśliŭ, što i siońnia ličyć pravilnaj palityku zbližeńnia z Rasijaj, jakuju pravodziŭ, kali znachodziŭsia na pasadzie kanclera.
Takija vykazvańni vyklikali rezkuju reakcyju ŭ Hiermanii. Ekśpiert Sacyjał-demakratyčnaj partyi pa źniešniaj palitycy Michael Rot zajaviŭ, što Rasiju nichto nie «demanizuje», bo jana sama pastaviła siabie ŭ izalacyju, ahresiŭna parušajučy mižnarodnaje prava. Jon nazvaŭ Kreml najbujniejšaj pahrozaj biaśpiecy i miru ŭ Jeŭropie i papiaredziŭ pra niebiaśpieku zvykłych dziełavych adnosin ź impieryjalistyčnaj dyktaturaj.
Krytyka prahučała i z boku inšych niamieckich palitykaŭ. Pradstaŭnik CHDS Tomas Roviekamp adznačyŭ, što słovy Šrodera nie adpaviadajuć rečaisnaści vajny i što siońnia patrebnaja vyraznaja pazicyja, a nie spačuvańnie ahresaru. Palityk CHSS Rajnchard Brandl nazvaŭ artykuł Šrodera typovym naboram arhumientaŭ «siabroŭ Pucina», padkreśliŭšy, što nie Zachad napaŭ na Rasiju, a Rasija — na Ukrainu.
Dyskusija chutka vyjšła za miežy Hiermanii. Ministr zamiežnych spraŭ Estonii Marhus Cachkna rezka adreahavaŭ na zakliki nie «demanizavać» krainu, jakaja viadzie samuju žorstkuju vajnu ŭ Jeŭropie z časoŭ Druhoj suśvietnaj. Jon adznačyŭ, što hety kanflikt staŭ vynikam šmathadovaj pamyłkovaj palityki załahodžvańnia i viery ŭ toje, što handal zdolny strymać ahresara.
Asabliva rezka na zajavy Šrodera adreahavali va Ukrainie. Pres-sakratar MZS Hieorhij Cichi abvinavaciŭ byłoha kanclera ŭ tym, što jon dapamoh «pasadzić» Hiermaniju i Jeŭropu na rasijskuju hazavuju zaležnaść i takim čynam sadziejničaŭ padrychtoŭcy vajny. U emacyjnaj formie jon zajaviŭ, što adkaznaść za nastupstvy hetaj palityki lažyć i na Šroderu.
Hierchard Šroder uznačalvaŭ urad Hiermanii z 1998 pa 2005 hod. Paśla sychodu z palityki jon udzielničaŭ u rasijskich enierhietyčnych prajektach, u tym liku ŭ «Paŭnočnym patoku», a z 2007 hoda kiravaŭ radaj dyrektaraŭ «Rasnafty». Jon pakinuŭ hetuju pasadu tolki ŭ mai 2022 hoda, užo paśla pačatku poŭnamaštabnaj vajny va Ukrainie, što jašče bolš uzmacniła krytyku ŭ jaho adras u Jeŭropie.
Były kancler Hiermanii prachodzić kliničnaje lačeńnie ad «emacyjanalnaha vyharańnia»
Hierchard Šroder prajhraŭ pazoŭ Bild z-za intervju Navalnaha, jaki nazvaŭ jaho «chłopčykam na pabiahuškach u Pucina»
«Kaliści ja im zachaplaŭsia… zaraz adčuvaju tolki pahardu» — redaktar Bild pra jubilej Šrodera
Žonka Šrodera raskazała, navošta maliłasia la Kramla ŭ sakaviku 2022 hoda
Adnapartyjcy admovilisia zaprašać Šrodera na jubilej jaho partyi
«Kali Šroder byŭ kancleram, Pucin razmaŭlaŭ ź im jak ź dzienščykom»
Ciapier čytajuć
Pašparty biełarusaŭ, jakija hałasujuć na vybarach u KR, apracuje kampanija, u jakoj apošniuju ŭciečku vyjavili ŭ 2026-m, a zasnavalniki — rasijanie51
Kamientary