«Kaliści ja im zachaplaŭsia… zaraz adčuvaju tolki pahardu» — redaktar Bild pra jubilej Šrodera
U niadzielu eks-kancleru FRH Hierchardu Šroderu spoŭniłasia 80 hadoŭ. Adnym ź pieršych jaho pavinšavała pasolstva RF. Namieśnik hałoŭnaha redaktara Bild Paŭl Roncchajmier napisaŭ pra heta kałonku.
«U noč, kali Hierchardu Šroderu spoŭniłasia 80 hadoŭ, ja pračnuŭsia ad huku dronaŭ nad našym domam u Charkavie, adkul my viadziem repartaž ab vajnie. Jany trapili ŭ žyły dom niepadalok.
Mirnyja žychary kožny dzień hinuć tut ad pucinskich rakiet, bomb i bieśpiłotnikaŭ. Šrodera, padobna, heta nie chvaluje.
Jon praciahvaje ličyć siabie siabram Pucina i nikoli nie staviŭ pad sumnieŭ hetaje siabroŭstva, niahledziačy na vajennyja złačynstvy. <…> Ja, viadoma, vielmi emacyjny, bo viadu repartažy z Ukrainy z 2014 hoda. Ale ja nijak nie mahu zrazumieć usich tych, chto abialaje Šrodera, chto siońnia vinšuje «darahoha Hierda» i ŭspaminaje jaho dasiahnieńni. Choć tak, jany sapraŭdy charakternyja (akramia siabroŭstva ź sieryjnym zabojcam).
Usio roŭna, jakija jaho minułyja palityčnyja zasłuhi: «Hazavy Hierd» praciahvaje pracavać na taho, chto kidaje bomby ŭ maich siabroŭ, čyje napady zabili maich kaleh-žurnalistaŭ, u tym liku apieratara Fox News Pjera Zakšeŭskaha, chto pasłaŭ sałdat, kab zabivać, hvałtavać i katavać. Jak možna da hetaha času apraŭdvać siabroŭstva z takim, jak rasijski dyktatar, i kazać «dy heta prosta Hierd»?
Nie chaču mieć ničoha ahulnaha z tymi, chto ŭ kancy miesiaca budzie pić šampanskaje z kramloŭskim łabistam Hierchardam Šroderam. Kaliści ŭ maładości ja im zachaplaŭsia. Šroder byŭ palitykam, jaki prajšoŭ šlach z samych nizoŭ na samy vierch i mužna pravioŭ reformy. Ciapier adčuvaju tolki pahardu da siabra vajennaha złačyncy. I dziŭlusia tamu miakkamu tonu, jaki raptam znoŭ paŭstaŭ u adnosinach da jaho ŭ Niamieččynie. <…>
Žadaju jamu adnojčy pieražyć u Charkavie, jak jaho siabar Pucin zabivaje biez usialakich abmiežavańniaŭ», — napisaŭ Paŭl Roncchajmier.
Hierchard Šroder byŭ kancleram Hiermanii ŭ 1998 — 2005 hadach, u 2017—2022 hadach byŭ staršynioj savieta dyrektaraŭ kampanii «Rasnafta».
Łukašenka znajšoŭ niezvyčajnyja słovy dla spačuvańnia Chamieniei: «vierałomnaja ataka»27
Kamientary