Litva źvierniecca da ZŠA ŭ spravie apošniaha vypadku ź mieteazondami
Paśla taho jak z-za mieteazondaŭ ź Biełarusi viečaram u aŭtorak była parušana praca Vilenskaha aeraporta, ministr zamiežnych spraŭ Litvy Kiastucis Budrys zajaviŭ, što ŭ dačynieńni da aficyjnaha Minska rychtujecca nota pratestu, a ŭsia aktualnaja infarmacyja pra ataku budzie pieradadzienaja sajuźnikam.
Siarod hetych partnioraŭ Złučanyja Štaty Amieryki, ź jakimi Litva i nadalej padtrymlivaje ciesnyja suviazi, paviedamlaje LRT.
«Usiu infarmacyju pra dziejańni, jakija ździajśniajucca suprać nas, my pieradadzim i amierykanskamu boku. Razam budziem šukać nie tolki toje, jak usio heta nazvać, ale i vielmi kankretnyja rašeńni. Z ZŠA ŭ nas pastajannyja kantakty. My majem vialikaje pradstaŭnictva ŭ Vašynhtonie i padtrymlivajem suviaź nie tolki praź jaho. My pieradajom infarmacyju, nazirańni, idzie pastajannaja kamunikacyja», — padkreśliŭ ministr zamiežnych spraŭ.
Pavodle słoŭ kiraŭnika litoŭskaj dypłamatyi, usia aktualnaja infarmacyja pra dziejańni režymu Alaksandra Łukašenki ŭžo peŭny čas pieradajecca partnioram za Atłantykaj, i hety praces nie spyniaŭsia.
Adkazvajučy na pytańnie, ci možna ličyć apošni napłyŭ kantrabandnych bałonaŭ dziejańniem biełaruskich uładaŭ suprać Litvy, ministr adznačyŭ, što choča dačakacca bolšaj kolkaści infarmacyi i nie vyklučyŭ nieabchodnaści razhladać roznyja viersii.
«Isnujuć roznyja mahčymyja tłumačeńni, ale my nie pavinny zabiahać napierad», — skazaŭ Budrys.
Pavodle słoŭ kiraŭnika Nacyjanalnaha centra kiravańnia kryzisami Vilmantasa Vitkaŭskasa, da ranicy sierady było vyjaŭlena vosiem bałonaŭ z kantrabandnymi cyharetami, niekalki reštkaŭ takich bałonaŭ, a taksama zatrymanyja čatyry asoby.
Padličana, što ŭviedzienyja abmiežavańni ŭ aeraporcie zakranuli bolš za 1,7 tysiačy pasažyraŭ.
Pamiatajecie Piatrušu, jaki vydziraŭ draty «dydžejam Pieramien»? Jaho pieraviali ŭ treciuju lihu čynoŭnikaŭ paśla miesiacaŭ biespracoŭja7
Pamiatajecie Piatrušu, jaki vydziraŭ draty «dydžejam Pieramien»? Jaho pieraviali ŭ treciuju lihu čynoŭnikaŭ paśla miesiacaŭ biespracoŭja
«Paśla pieršaha zabojstva ź im raźviałasia žonka». Što viadoma pra šmatdzietnaha Siarhieja sa Stolinskaha rajona, jaki paśla vyzvaleńnia z kałonii zabiŭ troch čałaviek44
Kamientary
[Zredahavana]
Lepš Pavuka paprasiŭ by, toj zatelefanuje kamu z adpraŭščykoŭ. Moža palepšaje na jaki tydzień.