Machlary zapałochali školnika i prymusili pieravieści baćkoŭskija čatyry tysiačy dalaraŭ u kryptavalutu
U Pieršamajskaje RUUS Minska źviarnulisia baćki 15‑hadovaha školnika, jaki staŭ achviaraj ašukancaŭ, paviedamlaje «Milicyja Minska».
Padletak adkazaŭ na zvanok ad «damafonnaj słužby» i pradyktavaŭ kod z SMS-paviedamleńnia. Paśla hetaha złamyśniki patelefanavali jamu druhi raz i ŭžo pradstavilisia supracoŭnikami Biełaruskaj dziaržaŭnaj inśpiekcyi pa elektrasuviazi. Jany paviedamili, što padletak tolki što byŭ uciahnuty ŭ złačynstva.
Kab uniknuć vobšuku i pakarańnia, jaho prymusili napisać raśpisku ab supracoŭnictvie, trymali na suviazi na praciahu čatyroch dzion i zabaraniali abmiarkoŭvać toje, što adbyvajecca, z baćkami.
Pad kiraŭnictvam ašukancaŭ dzieviacikłaśnik ustalavaŭ na smartfon kryptakašalok. A kali baćki pajšli na pracu, jon uziaŭ u ich 4 tysiačy dalaraŭ, jakija pa paradzie kurataraŭ pieradaŭ kryptaabnalščyku.
Školniku paabiacali, što paśla pravierki najaŭnyja srodki buduć viernutyja. Ale praź niekatory čas zamiest hrošaj kuratary pačali davać jamu novyja zadańni, a kryptakašalok akazaŭsia pustym. Tady padletak zrazumieŭ, što staŭ achviaraj ašukancaŭ, i raskazaŭ pra ŭsio baćkam.
Apieratyŭniki ŭstanavili asobu kryptaabnalščyka. Jon nie zdahadvaŭsia, što niepaŭnaletni pieradavaŭ hrošy pad ciskam ašukancaŭ. Najaŭnyja srodki kanfiskavany i buduć viernuty siamji. U dačynieńni da mužčyny składzieny administracyjny pratakoł za niezakonnuju pradprymalnickuju dziejnaść.
Milicyja zaklikaje baćkoŭ i piedahohaŭ raskazać dzieciam pra novuju schiemu ašukancaŭ. Padletki pavinny viedać, što mohuć źviarnucca da vas u luboj składanaj situacyi, navat kali havorka idzie pra złačynstva.
Ciapier čytajuć
Što viadoma pra viciebčuka, jakoha vinavaciać u sprobie padryvu samalota ŭ Hiermanii7
Kamientary