Махляры запалохалі школьніка і прымусілі перавесці бацькоўскія чатыры тысячы даляраў у крыптавалюту
У Першамайскае РУУС Мінска звярнуліся бацькі 15‑гадовага школьніка, які стаў ахвярай ашуканцаў, паведамляе «Міліцыя Мінска».
Падлетак адказаў на званок ад «дамафоннай службы» і прадыктаваў код з SMS-паведамлення. Пасля гэтага зламыснікі патэлефанавалі яму другі раз і ўжо прадставіліся супрацоўнікамі Беларускай дзяржаўнай інспекцыі па электрасувязі. Яны паведамілі, што падлетак толькі што быў уцягнуты ў злачынства.
Каб унікнуць вобшуку і пакарання, яго прымусілі напісаць распіску аб супрацоўніцтве, трымалі на сувязі на працягу чатырох дзён і забаранялі абмяркоўваць тое, што адбываецца, з бацькамі.
Пад кіраўніцтвам ашуканцаў дзевяцікласнік усталяваў на смартфон крыптакашалёк. А калі бацькі пайшлі на працу, ён узяў у іх 4 тысячы даляраў, якія па парадзе куратараў перадаў крыптаабнальшчыку.
Школьніку паабяцалі, што пасля праверкі наяўныя сродкі будуць вернутыя. Але праз некаторы час замест грошай куратары пачалі даваць яму новыя заданні, а крыптакашалёк аказаўся пустым. Тады падлетак зразумеў, што стаў ахвярай ашуканцаў, і расказаў пра ўсё бацькам.
Аператыўнікі ўстанавілі асобу крыптаабнальшчыка. Ён не здагадваўся, што непаўналетні перадаваў грошы пад ціскам ашуканцаў. Наяўныя сродкі канфіскаваны і будуць вернуты сям’і. У дачыненні да мужчыны складзены адміністрацыйны пратакол за незаконную прадпрымальніцкую дзейнасць.
Міліцыя заклікае бацькоў і педагогаў расказаць дзецям пра новую схему ашуканцаў. Падлеткі павінны ведаць, што могуць звярнуцца да вас у любой складанай сітуацыі, нават калі гаворка ідзе пра злачынства.
Зяленскі: Рэтранслятары на мяжы Беларусі прыпынілі працу69
Каментары