Na słuchańniach KR Prakopjeŭ vyśviatlaŭ, čamu Cichanoŭskaja sieła tam, dzie sieła

Siońnia ŭ Varšavie adbyvajucca słuchańni Kaardynacyjnaj rady. Biez chalivaru nie abyšłosia.

Vadzim Prakopjeŭ vyrašyŭ pačać błok pytańniaŭ i adkazaŭ ź ironii. Jon padziakavaŭ za toje, što Śviatłana Cichanoŭskaja pryjšła na słuchańni ŭ Kaardynacyjnuju radu — maŭlaŭ, demakratyčnuju lidarku tam čakali piać z pałovaj hadoŭ.

Dadaŭ i kamplimient, na jaki Cichanoŭskaja adreahavała spakojnym kiŭkom, a vice-śpikierka Liza Prakopčyk zakaciła vočy i ź ciažkaściu starałasia strymać śmiašok.

A paśla spytaŭ, čamu Cichanoŭskaja sieła tam, dzie sieła.

— My, kali rychtavali słuchańni, vyrašyli zrabić usio pa kanonach, prosta jak u amierykanskim Kanhresie. Vy taksama vystupali ŭ amierykanskim Kanhresie, jak ja pamiataju, i viedajecie hetuju kulturu słuchańniaŭ. Pa kanonach było zroblena ŭsio, u tym liku i rasstanoŭka mebli dla hledačoŭ i maderataraŭ. Dla vas, jak dla palityka, zaprošanaha adkazvać na słuchańniach, my praduhledzieli asobny stoł nasuprać prezidyuma. Iznoŭ ža, roŭna jak u Kanhresie ZŠA. Siońnia vy pamianiali kazualna praviły i zvykła raźmiaścilisia ŭ prezidyumie, što krychu parušaje etykiet i niekalki abiasceńvaje pracu našaj techkamandy. Ja pravilna vas razumieju, Śviatłana, vam niekamfortna być za asobnym stałom pobač z prezidyumam, vy adčuli siabie adkazčykam, moža, padspravazdačnym palitykam? U čym pryčyna adnabakovaj źmieny etykietu?

Śviatłana Cichanoŭskaja takomu techničnamu pytańniu ździviłasia.

— Tut u zale prysutničajuć takija ž čalcy Kaardynacyjnaj rady, jak i vy. I mnie pryjemna hladzieć na ludziej pierad saboj. Heta techničnyja momanty, jakija absalutna nie źviazanyja z maim žadańniem ci niežadańniem i z tym, jak ja siabie adčuvaju.

U hety momant u zale razdalisia apładysmienty. Ale Prakopjeŭ praciahnuŭ hnuć svaju liniju:

— Ale vy byli b nie suprać raźmiaścicca tak, jak heta pryniata ŭ Kanhresie ZŠA na padobnych słuchańniach?

Liza Prakopčyk dramatyčna ŭzmachnuła rukami i adkinułasia na śpinku kresła.

Cichanoŭskaja ž adstupać nie płanavała:

— Dziakuj, ja ŭžo raźmiaściłasia.

Arciom Bruchan zaličyŭ hetaje pytańnie Prakopjeva ŭ ahulnyja pytańni ad frakcyi «Biełarusy», z čym Vadzim nie pahadziŭsia.

Na kanflikt adreahavaŭ fiłosaf Uładzimir Mackievič. Jon napisaŭ u čacie «Tolki refarmatary i refarmatarki»:

— Pieršaje pytańnie Prakopjeva zusim nie durnoje. Nie viedaju, chto prydumaŭ pierasadzić Śviatłanu ź miesca adkazčyka pierad KR, u prezidyum. Ale heta tonki i chitry manipulatyŭny chod. Śviatłana złučyłasia z KR vizualna, faktyčna vyhladaje jak kiraŭnik KR. Poŭnaja prafanacyja słuchańniaŭ.

Franak Viačorka z takim mierkavańniem nie pahadziŭsia:

— Łuchta. U balšyni vypadkaŭ vysoki hość ci asnoŭny dakładčyk vystupaje z prezidyuma ci siadzić u prezidyumie.

• 4
• 0
• 16
• 32
• 0
• 0
• 1
• 0