U Minsku budujuć novaje «Akreścina» ŭ hłuchoj pramzonie. A što budzie sa starym?
Na miescy byłoha vajennaha haradka ŭ Ściapiancy ŭzvodziać novy kompleks dla Centra izalacyi pravaparušalnikaŭ (CIP). Siońnia jon raźmiaščajecca na zavułku Akreścina i paśla padziej 2020 hoda staŭ simvałam katavańniaŭ i nievynosnych umoŭ utrymańnia. Adnak i na stary budynak va ŭładaŭ jość płany: imavierna, chutka jon zakryjecca na maštabny ramont.
Zhodna z pašpartam abjekta, raźmieščanym na budaŭničym płocie pa adrasie vulica Karvata, 74, ź vieraśnia 2025 hoda tut viadziecca rekanstrukcyja budynka pad raźmiaščeńnie CIP. Prajekt raspracavaŭ instytut «Biełdziaržprajekt», zakazčykam vystupaje Upraŭleńnie kapitalnaha budaŭnictva (UKB) Minharvykankama, a padradčykam — Budaŭničaje ŭpraŭleńnie №94 Budtresta №1. Budaŭnictva finansujecca ź biudžetu Minska i pavinna zaviaršycca praz hod, u studzieni 2027 hoda.
Raniej na hetym miescy znachodziŭsia trochpaviarchovy budynak z šeraj silikatnaj cehły, pabudavany ŭ kancy 1960‑ch hadoŭ jak kazarma asobnaha navučalnaha bataljona suviazi VPS (v/č 40858). U 1997 hodzie čaść była rasfarmiravana, i apošnija hady budynak stajaŭ zakinutym, jak i mnohija inšyja abjekty byłoha vajennaha haradka ŭ Ściapiancy.
Padrychtoŭka da budaŭnictva pačałasia jašče letam 2023 hoda, a ŭžo ŭ červieni 2024‑ha byŭ hatovy prajekt. Apošnija źmieny pa zaŭvahach dziaržekśpiertyzy ŭ jaho ŭnieśli ŭ mai 2025 hoda.
Što budzie ŭnutry novaha izalatara?
Zhodna z prajektam, novy CIP HUUS Minharvykankama — heta ceły kompleks budynkaŭ. Niahledziačy na toje, što raboty aficyjna nazyvajucca rekanstrukcyjaj, staruju kazarmu znosiać amal całkam, da padmurka, na jakim uźviaduć novy dvuchpaviarchovy administracyjny korpus.
Cokalny pavierch administracyjnaha budynka addadzieny pad sport: tut raźmieściacca trenažornaja zała i zała rukapašnaha boju. Cikavaja detal: miarkujučy pa pamierach raździavałak, mužčyn siarod piersanału budzie ŭtraja bolš, čym žančyn.
Na druhim paviersie raźmieściacca kabiniety načalstva z dyvanovym pakryćciom zamiest kieramahranitnaj plitki, jakoj vykanany padłohi astatnich pamiaškańniaŭ, pakoi adpačynku, harderoby, dušavyja dla supracoŭnikaŭ, buchhałteryja, archiŭ i inšaje.
Da paŭnočnaha tarca administracyjnaha korpusa prymykaje ŭłasna izalatar — trochpaviarchovy budynak z padziemnym uzroŭniem dla archivaŭ i techničnych pamiaškańniaŭ.
Łahistyka pryjomu zatrymanych pradumana da drobiaziaŭ. Aŭtazak zajazdžaje prosta ŭnutr budynka praz padjomnyja varoty. Adtul zatrymany traplaje ŭ kalidor, dzie jaho čakajuć pakoj raźbiralnictva i pamiaškańnie dla vobšuku z dvanaccaćciu «stakanami» (vuzkimi boksami pamieram 1,3ch1 m). Dalej — abo dušavyja biez vyraznaha padziełu pavodle połu, abo dezynfiekcyja.
Na pieršym paviersie taksama raźmiaščajucca pakoi adpačynku piersanału, pryjomu ježy, zachoŭvańnia śpiecsrodkaŭ, bufietnaja i techničnyja pamiaškańni.
Ź pieršaha pavierchu pačynajucca i kamiery dla ŭtrymańnia aryštavanych. Ich tut usiaho šeść: dźvie kamiery na dva čałavieki (kožnaja płoščaj 15 m2), pa kamiery na čatyry čałavieki (18 m2), na šeść čałaviek (26 m2) i na vosiem čałaviek (34 m2), a taksama karcar.
Karcary ŭjaŭlajuć saboj vyciahnutyja pamiaškańni płoščaj 12 m² z maleńkim akiencam pad samaj stollu i tualetam bieź pieraharodki.
Da budynka prymykajuć čatyry zakrytyja prahułačnyja dvoryki pamieram 7ch7 m.
Na druhim paviersie raźmieščany čatyry pakoi dla razhladu administracyjnych materyjałaŭ, niekatoryja bytavyja pamiaškańni, a taksama 16 kamier: dźvie na dvuch čałaviek, adzinaccać na čatyroch čałaviek, vosiem kamier na šeść čałaviek i adna kamiera na vosiem čałaviek, a taksama karcar (pamiery kamier anałahičnyja tym, što raźmiaščajucca na pieršym paviersie).
Treci pavierch u cełym anałahičny druhomu i maje stolki ž kamier taho ž pamieru.
U kamierach na pieršym paviersie mohuć raźmiaścicca 22 čałavieki, na druhim i trecim — pa 104 čałavieki. Ahulnaja ŭmiaščalnaść novaha izalatara składzie 230 čałaviek (pry minimalnym patrabavańni ŭ zadańni na prajektavańnie — 221 miesca). Ahulnaja płošča kamier u novym izalatary składaje kala 1084 m².
Umovy naŭrad ci možna nazvać kamfortnymi: ścieny i stoli buduć pafarbavany akryłavaj farbaj prosta pa bietonie, ścieny buduć zmročnaha šeraha koleru (Grau 50) pieraharodki ŭ sanvuzłach zrobiać ź mietaličnaha prafilavanaha naściłu. Praŭda, padłohi ŭ kamierach abiacajuć zrabić draŭlanymi — značyć, budzie trochi ciaplej.
Pa-za kamierami kudy bolš utulnaja atmaśfiera: padviesnyja stoli i ścieny, pamalavanyja ŭ śvietły bež (Palazzo 55) u kalidorach i karamielny (Caramel 55) — u pamiaškańniach dla piersanału.
Źniešnie budynak architektary pasprabavali zrabić bolš sučasnym i mienš zmročnym: vientylavany fasad budzie azdobleny pad kieramičnuju cehłu, čornuju na cokali i čyrvonuju na astatnich pavierachach, z dapamohaj naniasieńnia na tynkoŭku trafaretu «Łondanskaja cehła», što nahadvaje styl łoft u modnych žyłych kvartałach.
Terytoryju abniasuć trochmietrovym płotam z tryma radami kalučaha drotu «Hareza» (Jehoza).
Na terytoryi taksama raźmieściacca kantrolna-prapuskny punkt, anhar dla zachoŭvańnia transpartu, pažarnaja pompavaja stancyja, transfarmatarnaja padstancyja i dyziel-hienieratarnaja ŭstanoŭka dla reziervovaha elektrazabieśpiačeńnia budynkaŭ.
Cikava, što z prajekta prybrali elemienty biezbarjernaha asiarodździa — taktylnuju plitku i piktahramy sa šryftam Brajla. Načalstva vyrašyła, što ludzi z parušeńniem zroku ŭ CIP traplać nie buduć, choć praktyka pakazvaje advarotnaje: za kraty kidajuć i invalidaŭ, i starych ludziej.
Varta adznačyć, što novy CIP byccam naŭmysna raźmieščany ŭ adnym z samych addalenych i ciažkadastupnych miescaŭ horada, dzie niama anijakaj žyłoj zabudovy, a tolki zakinuty vajenny haradok, pramzona i hłuchi lesapark abapał. U žniŭni 2020 hoda zapisy z žyłych damoŭ taho, što adbyvałasia na terytoryi Akreścina i jak kryčali ludzi za jaho aharodžaj, paćvierdzili žorstkaje katavańnie pratestoŭcaŭ.
Što čakaje Akreścina?
Paralelna z budaŭnictvam novaha kompleksu ułady rychtujucca da maštabnych rabot na starym miescy. Zhodna z dakumientacyjaj, z 2 sakavika pa 30 červienia 2026 hoda ŭ budynku CIP na 1‑m zavułku Akreścina zapłanavany «biahučy ramont».
Adnak śpis rabot vyhladaje bolš čym surjozna dla zvyčajnaha kaśmietyčnaha ramontu. Zhodna z kaštarysam, u kamierach płanujecca razabrać 387 m² daščanych padłoh.
Treba adznačyć, što my nie viedajem dakładnuju kolkaść kamier u CIP na Akreścina. Mierkavać pra toje, što ramont zakranie ŭsie ci bolšaść kamier, možna tolki pa ŭskosnych źviestkach.
U płanie budynak maje pamiery prykładna 33 m ch 13,5 m, što daje prykładnuju płošču adnaho paviercha kala 445 m². U prajekcie novaha CIP na vulicy Karvata płošča ŭsich kamier na adnym paviersie składaje blizu 60% ahulnaj płoščy paviercha, možna mierkavać, što i stary budynak uładkavanym padobnym čynam. Tady heta aznačaje, što mianiać padłohi buduć u kamierach na niekalkich pavierchach.
Zamiest došak tam zaljuć palimiernaje pakryćcio pa bietonie. Heta značyć, što ŭmovy dla «palityčnych», jakim časta davodzicca spać na padłozie ŭ pierapoŭnienych kamierach, mohuć stać jašče bolš žorstkimi — lažać na tonkim palimiery budzie chaładniej i ćviardziej, čym na drevie.
Taksama na toje, što raboty zakranuć usie kamiery, moža ŭkazvać toje, što ŭ kaštarysie prapisana zamiena 100 m² akonnych prajomaŭ i krataŭ. Uličvajučy nievialiki pamier turemnych voknaŭ (1,5-2,2 m² u kamierach na vuł. Karvata), heta moža aznačać zamienu škłopakietaŭ praktyčna va ŭsim budynku.
Praviadzieńnie takich rabot niemahčyma biez poŭnaha vysialeńnia ŭtrymancaŭ. Kudy pieraviaduć ludziej na čas ramontu, pakul nieviadoma. Aficyjna pra zakryćcio staroha izalatara nie paviedamlałasia.
«Naša Niva» — bastyjon biełaruščyny
PADTRYMAĆCiapier čytajuć
U Minsku budujuć novaje «Akreścina» ŭ hłuchoj pramzonie. A što budzie sa starym?8
Kamientary