Jak ukrainskaje zbožža źnikaje z akupavanych terytoryj i jakuju rolu ŭ schiemie hraje Biełaruś. Raskazvaje «Biełpoł»

— U chodzie analizu ŭstanoŭlena funkcyjanavańnie ŭstojlivaj kamiercyjna-łahistyčnaj sietki, jakaja zabiaśpiečvaje adabrańnie sielhaspradukcyi na akupavanych terytoryjach Ukrainy, jaje dakumientalnuju lehalizacyju praz rasijskija struktury, nastupnuju pierapracoŭku i źmienu krainy pachodžańnia ŭ Biełarusi i ekspart na źniešnija rynki jak farmalna «zakonnaha» tavaru, — adznačyŭ u kamientary «Ukrinfarmu» pradstaŭnik Belpol Uładzimir Žyhar.

Pavodle jaho słoŭ, kaardynacyja klučavych aktyvaŭ i kampanij viadzie da hrupy asob, afilijavanych z byłym ministram unutranych spraŭ Biełarusi, eks-načalnikam słužby biaśpieki Alaksandra Łukašenki Uładzimiram Navumavym.

— Pa charaktary i sposabie arhanizacyi hetaja dziejnaść maje prykmiety sistemnaj, zahadzia spłanavanaj schiemy atrymańnia prybytku z resursaŭ akupavanaj terytoryi, a nie peŭnych kamiercyjnych epizodaŭ, — padkreśliŭ Žyhar.

Jak havorycca ŭ rasśledavańni, pačatkovym źvianom vystupaje stvoranaja rasijskaj akupacyjnaj administracyjaj struktura — «Dziaržaŭnaja karparacyja «Ahrarny Danbas» u Daniecku.

Adnym z asnoŭnych jaje partnioraŭ z pačatku poŭnamaštabnaha ŭvarvańnia źjaŭlajecca zarehistravanaja ŭ Rasii kampanija «Zorka Fud». Ułaśnik hetaj firmy — były kiraŭnik MUS Biełarusi Uładzimir Navumaŭ.

Na asnovie najaŭnych u Belpol dakumientaŭ nielha vyznačyć dakładnyja abjomy ahrapradukcyi, jakuju vyvieźli z akupavanych terytoryj. Paćvierdžany tolki asobnyja pastaŭki. Tak, 25 žniŭnia 2023 hoda zarehistravanaja ŭ Maskvie kampanija ździejśniła adhruzku 1400 ton pšanicy z marskoha porta Maryupala. Heta paćviardžaje prava na transpartnyja charaktarystyki i siertyfikat, vydadzienyja rasijskim AT «CNIIMF».

A 8 lutaha 2023 hoda «Zorka Fud» adhruziła 20 ton nasieńnia słaniečniku ŭradžaju 2021 hoda biełaruskamu TAA «Źviezda Farmacievtika DD». Va ŭpakovačnym liście vytvorca prama pakazaŭ «HK «Ahrarny Danbas»», a ŭmovy pastaŭki — «FCA-DNR, pht. Vaładarskaje» (akupavanaja terytoryja Danieckaj vobłaści). Farmalnym adpraŭnikom vystupiła rasijskaje TAA «Ahrainviest» (Smalensk).

Zhadanaja vyšej kampanija «Źviezda Farmacievtika DD» źjaviłasia tut nie vypadkova.

Jak śćviardžajecca ŭ rasśledavańni, siarod zasnavalnikaŭ hetaj firmy — dzieci eks-ministra Nastaśsia i Zachar Navumavy.

U rasśledavańni taksama paviedamlajecca, što ŭkrainskaje zbožža albo pierapracoŭvajecca ŭ Biełarusi, albo napramuju reekspartujecca.

A alej pastaŭlajecca, naprykład, u Izrail, Abjadnanyja Arabskija Emiraty i navat ES.

— My nie budziem pakul što raskryvać padrabiaznaści, kudy mienavita jano idzie. Majem na ŭvazie kankretnyja krainy. Heta praca nie publičnaja. Z časam my pra heta raskažam, kali dabjomsia vyniku, — kažuć u Belpol.

Pa danych arhanizacyi, na handli prysvojenym zbožžam fihuranty rasśledavańnia zarabili «sotni miljonaŭ dołaraŭ».

• 1
• 0
• 0
• 1
• 1
• 0
• 3
• 0