U žniŭni 2024 hoda kampanija «Lihmaton», jakoj raniej vałodali Hieorhij Tapuzidzis i jahonaja maci Halina Piatrovič, była pieraaformlenaja na Alenu Kazak. Dziakujučy «Kibierpartyzanam» «Biuro» vyśvietliła, što asabistaja doktarka Łukašenki pracaŭładkavanaja ŭ kampanii ź lipienia 2024 hoda.
Alena Kazak (krajniaja źleva) na viečaryncy Antiage Clinic, fota instahram
Hieorhij Tapuzidzis — syn bujnoha biełaruskaha biznesoŭca i «kašalka» Łukašenki Paŭła Tapuzidzisa. Pavieł Tapuzidzis razam sa svaim biznes-partnioram Viktaram Piatrovičam kantraluje «Tytuń-Inviest», raźvivaje sietku handlovych centraŭ i hipiermarkietaŭ «Karona», a taksama źviazany z tytuniovaj vytvorčaściu i inšymi bujnymi biznes-aktyvami ŭ Biełarusi.
Pieršapačatkova novaja ŭładalnica była paznačanaja ŭ dadzienych kampanii jak Alena Uładzimiraŭna Kazak. Ci było heta zroblena naŭmysna abo pamyłkova, adnak paźniej imia pa baćku pamianiali.
Niedzie ŭ pieryjad pamiž lutym 2025 hoda i žniŭniem 2026 hoda Alena Kazak pieratvaryłasia z Uładzimiraŭny ŭ Hieorhijeŭnu. Pry hetym zapis pra strukturnyja źmieny kampanii nie ŭnosiŭsia, a miarkujučy pa aktualnaj vypiscy, mienavita asabistaja doktarka Łukašenki vałodaje aptekami «Lihmaton» sa žniŭnia 2024 hoda. Dyrektarkaj firmy, jak i raniej, zastałasia Halina Piatrovič, maci Hieorhija Tapuzidzisa.
Kampanija «Lihmaton» vałodaje sietkaj aptek va ŭsioj Biełarusi, a taksama ŭdzielničaje ŭ dziaržaŭnych tendarach na pastaŭku raznastajnych miedykamientaŭ. Vyručka kampanii ŭ 2025 hodzie skłała 83,6 miljona rubloŭ, a čysty prybytak 2,79 miljona.
Raniej paviedamlałasia, što jašče adna favarytka Alaksandra Łukašenki źviazanaja z kampanijaj «Lihmaton». Ź lipienia 2024 hoda Maryja Vasilevič, byłaja deputatka, ličycca tam viadučaj śpiecyjalistkaj pa kamiercyjnaj dziejnaści.
Kamientary
[Zredahavana]