Śpiecyjalisty patłumačyli, čamu dzikim koniam było tak miodam namazana na aŭtobusnym prypynku ŭ Vałožynskim rajonie
U Nalibockaj puščy niekalki tarpanapadobnych koniej stali rehularna vychodzić da aŭtobusnaha prypynku i kantaktavać ź ludźmi. Fota i videa z žyviołami nieadnarazova źjaŭlalisia ŭ internecie. Ciapier hetych koniej źmiaścili na karancin, a paśla płanujuć pierasialić na inšaje miesca, piša BiełTA.
Jak raskazali ŭ Ministerstvie lasnoj haspadarki, tarpanapadobnyja koni daŭno całkam źnikli ź dzikaj pryrody Biełarusi. U 2019 hodzie ich pačali viartać u krainu dla adnaŭleńnia papulacyi i naturalnych pracesaŭ u ekasistemach. Tady ź Niderłandaŭ u Biełaruś pryvieźli 151 žyviolinu.
Paśla vyvučeńnia roznych terytoryj dla ich pasialeńnia najbolš prydatnaj była pryznanaja Nalibockaja pušča. Koni dobra pryžylisia tam i pačali razmnažacca. Ciapier u puščy naličvajecca kala 250 tarpanapadobnych koniej.
Častku žyvioł užo pierasialili ŭ inšyja miescy. Takija prajekty realizoŭvalisia ŭ Biełaviežskaj puščy, Sporaŭskim zakaźniku, a taksama ŭ inšaj častcy Nalibockaj puščy — u rajonie pojmy Zachodniaj Biareziny. Sioleta jašče 15 koniej pierajechali ŭ rasijski Tatarstan.
Śpiecyjalisty adznačajuć, što hetyja žyvioły davoli achvotna iduć na kantakt ź ludźmi, časta ź cikaŭnaści. Adnak hałoŭnaj pryčynaj ich nabližeńnia da nasielenych miescaŭ stanovicca lohkaja ježa, jakuju im prapanujuć ludzi.
Niekatoryja «dobrazyčliŭcy» padkormlivajuć koniej chlebam, sadavinoj, sałodkimi praduktami i navat čypsami. Takaja ježa moža škodzić stravavańniu žyvioł, a rehularnaje padkormlivańnie źmianiaje ich naturalnyja pavodziny. Pasprabavaŭšy łasunak niekalki razoŭ, koni zapaminajuć miesca i viartajucca tudy ŭ pošukach ježy.
Mienavita tak niekalki koniej pačali prychodzić da aŭtobusnaha prypynku. Heta stvarała niebiaśpieku nie tolki dla samich žyvioł, ale i dla pasažyraŭ, a taksama dla transpartu, jaki ruchajecca pa susiedniaj darozie.
Akramia taho, kantakt dzikich koniej ź ludźmi i vychad za miežy naturalnaha asiarodździa pavialičvajuć ryzyku zaražeńnia virusami dy inšymi zachvorvańniami. Kali infiekcyja trapić u papulacyju, jana moža raspaŭsiudzicca siarod vialikaj kolkaści žyvioł i navat pryvieści da ich masavaj hibieli.
Kab nie dapuścić takoha raźvićcia padziej, koniej, jakija prychodzili da prypynku, źmiaścili na karancin. Paśla jaho zakančeńnia ich płanujuć pierasialić na novuju terytoryju. Kudy mienavita adpraviać žyvioł, pakul nie vyrašana.
Śpiecyjalisty zaklikajuć ludziej nie karmić dzikich koniej. Za imi možna nazirać i fatahrafavać ich, ale nie varta pryvučać žyvioł da čałaviečaj ježy. U Nalibockaj puščy dla ich dastatkova naturalnaha kormu, nieabchodnaha dla zdarovaha žyćcia.
«U pašparcie babuli staić data naradžeńnia 00.00.1945» — «A ŭ majoj XX.XX.1940». Jak takoje moža być?2
Kamientary