Stała viadoma, što za «sindykat» staić za sajtam, jaki viarbuje biełarusaŭ vajavać za Rasiju

Viarboŭščyki, jakija nie chavajucca

Na sajcie pramym tekstam prapanujuć «padpisać kantrakt na SVA» biełarusam ad 18 da 58 hadoŭ. Za heta abiacajuć adnarazovuju vypłatu ŭ 2,3 miljona rasijskich rubloŭ (kala 28 tysiač dalaraŭ), a dalej — štomiesiačnaje hrašovaje zabieśpiačeńnie ŭ 260 tysiač rasijskich rubloŭ (kala 3200 dalaraŭ). Praduhledžanyja dadatkovyja vypłaty za źniščeńnie ŭkrainskaj techniki, a taksama za mahčymyja ranieńni i hibiel.

«Rekruciory», jak vyhladaje, zusim nie chavajucca:.bieł — heta aficyjny nacyjanalny damien vierchniaha ŭzroŭniu. Kupić taki adras možna tolki ŭ akredytavanych u Biełarusi rehistrataraŭ.

Pavialičyć

Pry hetym najmać biełarusaŭ na vajnu — niezakonna. Kryminalny kodeks praduhledžvaje da piaci hadoŭ pazbaŭleńnia voli za ŭdzieł biez dazvołu biełaruskaj dziaržavy va ŭzbrojenym farmavańni adnaho z bakoŭ abo vajennych dziejańniach, za viarboŭku — ad piaci da dziesiaci hadoŭ, kali nie było prykmiet najomnictva. Dla tych, chto jedzie vajavać dziela hrošaj, pakarańni bolš strohija: ad troch da siami hadoŭ — samim najomnikam, ad siami da piatnaccaci hadoŭ — viarboŭščykam.

«Vydatny šaniec prajavić siabie»

Kantakty sajta, jaki kliča biełarusaŭ vajavać za Rasiju, viaduć da viarboŭščyka, padpisanaha jak Alaksandr. Z sakavika 2026 hoda jon aktyŭna publikavaŭ u telehram-čatach pra pošuk pracy ŭ Biełarusi abjavy pra nabor na kantraktnuju słužbu ŭ rasijskim Minabarony i pošuk apierataraŭ BPŁA, kiroŭcaŭ-artylerystaŭ, suviazistaŭ i sanitaraŭ.

Pavialičyć

Mnohija paviedamleńni Alaksandra vydalenyja — vierahodna, administratary čataŭ nie byli hatovyja bačyć takuju rekłamu. U vyniku jon pierajšoŭ na zahadkavyja farmuloŭki nakštałt «tolki kankretnyja chłopcy» i «vydatny šaniec prajavić siabie».

U krasaviku 2026 hoda viarboŭščyk pierastaŭ zavalvać čaty rekłamaj, a prosta źjaviŭsia sajt zaŝitnik.bieł, dzie paznačany telehram-akaŭnt Alaksandra. Dadatkova jon zavioŭ niekalki adnatypnych supołak u «Adnakłaśnikach».

U razmovie z vydańniem «Vot Tak» Alaksandr zapeŭnivaŭ, što słužba budzie lehalnaj dla biełarusaŭ.

«Prablem [praz nas] nie było ni ŭ kaho, a biełarusaŭ dastatkovaja kolkaść vyjazdžaje. Pryjedziecie — ziemlakoŭ ź dziasiatak dakładna sustreniecie, u nas usio na patok arhanizavana», — dadaŭ jon.

Chto zarablaje na kamiercyjnaj viarboŭcy

U dakumientach aryjentavanaha na biełarusaŭ sajta paznačana, što za im staić indyvidualny pradprymalnik Daniił Alehavič Radzivonaŭ, jaki zarehistravaŭ svaju spravu ŭ 2022 hodzie. Pa asnoŭnym vidzie dziejnaści heta rekłamnaje ahienctva, dadatkova pakazany taksama «padbor piersanału».

Arhanizacyju pazicyjanujuć jak «prafiesijnaje vajskova-kadravaje ahienctva poŭnaha cykłu» pad nazvaj «Bracki sindykat». Jość navat misija: «Staranna adbirajem kandydataŭ, aceńvajučy prafiesijnyja jakaści i maralna-valavyja charaktarystyki».

Zakazčykami «sindykata» vystupajuć vajenkamaty. Im prapanujuć pakidać zajaŭku «dla acenki koštu padboru». Canu abiacajuć raźličyć indyvidualna, ale minimum za čałavieka — 600 tysiač rasijskich rubloŭ (kala 7100 dalaraŭ). Pieršy raz apłacić pryjdziecca dziesiać kandydataŭ adrazu, pracuje «ahienctva» tolki pa pieradapłacie.

Pavialičyć

Jak i dzie pracuje schiema

U sam «sindykat» najmajuć rekrucioraŭ, ich nazyvajuć «śpiecyjalistami pa masavym padbory kandydataŭ na kantraktnuju słužbu». U jakaści hanararu paznačajuć tyja ž 600 tysiač rasijskich rubloŭ za kožnaha pryciahnutaha kantraktnika. Praŭda, z pamietkaj «da» — tak što moža atrymacca i mienš.

Rekruciory dalej šukajuć achvotnych pajści na vajnu za hrošy. Na sajcie paznačana, što «ahienctva» ŭžo pracuje ŭ Maskvie i Maskoŭskaj, Varoniežskaj, Nižaharodskaj, Mahadanskaj abłaściach, Čukockaj aŭtanomnaj akruzie. Jość taksama asobnyja sajty dla Rastova-na-Donie i Nabiarežnych Čaŭnoŭ. Biełaruski sajt na «maciarynskaj» placoŭcy pakul nie paznačany.

Aŭtary sajta śćviardžajuć, što ŭ ich dadatku ŭžo jość bolš za tysiaču «aktyŭnych ahientaŭ». Kali chtości choča pracavać u novym rehijonie — nieabchodna zapłacić miljon rasijskich rubloŭ (kala 12 tysiač dalaraŭ) za «ŭkaranieńnie».

Zasnavalnik «sindykata» ź niaprostaj bijahrafijaj

Samamu Daniiłu Radzivonavu, pad imiem jakoha dziejničaje «sindykat» viarboŭščykoŭ, 32 hady. Jon hramadzianin Rasii, rodnym horadam paznačaje Brack u Irkuckaj vobłaści. U minułym Radzivonaŭ pracavaŭ u śfiery azartnych hulniaŭ, ciapier pradstaŭlajecca jak apieracyjny dyrektar ułasnaha IP.

Cikava, što mužčyna ličycca ŭ śpisach zahinułych na vajnie. Jašče ŭ 2023 hodzie pra jaho śmierć paviedamiła supołka ŭ VK «Donbass i My». Tam ža paznačyli, što jon słužyŭ u niejkaj PVK.

Pavialičyć

Možna vykazać zdahadku, što mužčyna ŭsio ž taki vyžyŭ — miarkujučy pa danych uciečak, užo paśla paviedamleńnia pra hibiel na jaho imia afarmlali anłajn-zakazy i brali pazyki.

Da ciapierašniaha momantu ŭ arhanizacyi Daniiła Radzivonava bahaty śpis sudovych razhladaŭ: pa rašeńni suda «sindykat» vinavaty bolš za 4,5 miljona rasijskich rubloŭ (53 tysiačy dalaraŭ) fondu «Sadziejańnie siemjam udzielnikaŭ SVA» za niejkija nieakazanyja pasłuhi. Mienšyja sumy — indyvidualnamu pradprymalniku i haradskim elektrasietkam. Jašče z adnoj kampanijaj razhlad praciahvajecca.

• 0
• 0
• 0
• 0
• 0
• 0
• 0
• 0