Lehienda Halivuda raniej zajaviŭ: «Historyja — heta naša kraina, i Tramp jaje razburaje, i chto viedaje, jakija ŭ jaho pryčyny dla hetaha, ale heta baluča».
Prezident ZŠA abłajaŭ lehiendu Halivuda paśla jaho zakliku da «supracivu», piša Bild
Na svajoj płatformie Truth Social respublikaniec napisaŭ pra akciora Robierta De Nira: «Paražany sindromam varjactva na Trampie Robiert De Nira, jašče adzin chvory i varjat čałaviek z, jak ja miarkuju, nadzvyčaj nizkim IQ, absalutna nie razumieje, što jon robić abo havoryć — pry hetym niešta z hetaha nasamreč kryminalnaje».
Vyrazam «sindrom varjactva na Trampie» prezident ZŠA i mnohija jaho prychilniki nazyvajuć, na ich dumku, naviaźlivaje nieprymańnie Trampa z boku palityčnych apanientaŭ.
Padstavaj dla tyrady Trampa stała vystupleńnie De Nira ŭ padkaście The Best with Nicole Wallace, u jakim aktor zaklikaŭ amierykancaŭ da supracivu suprać dziejučaha prezidenta i skazaŭ, što heta «adziny šlach».
«Historyja — heta naša kraina, i Tramp jaje razburaje, i chto viedaje, jakija ŭ jaho pryčyny dla hetaha, ale heta baluča. […] Usie pavinny trymacca razam, kab pazbavicca ad jaho», — skazaŭ De Nira, źviartajučysia da hramadzian ZŠA.
Robiert De Nira jašče ź pieršaha terminu Trampa vyrazna pazicyjanuje siabie jak jaho apanient. Jon nieadnarazova publična krytykavaŭ prezidenta. Letaś zorka filmaŭ «Taksist», «Palaŭničy na aleniaŭ», «Adnojčy ŭ Amierycy» i «Chrosny baćka 2» u svajoj pramovie paśla ŭručeńnia ŭznaharody za žyćciovyja dasiahnieńni na Kanskim kinafiestyvali nazvaŭ Trampa «abmiežavanym».
U 2016 hodzie De Nira zajaviŭ, što Tramp — śvinčo i sabaka, i što jamu «chaciełasia b udaryć jaho ŭ tvar».
Kamientary