«Strajk pakupnikoŭ». Čały sprahnazavaŭ źnižeńnie cenaŭ na kvatery
Analityk u efiry «Biełsata» zajaviŭ, što ceny na žytło ŭ Biełarusi dasiahnuli stoli i voś-voś pačnuć źnižacca.
Jon zaŭvažyŭ na rynku «strajk pakupnikoŭ», praź jaki pradaŭcy kvater i pojduć na sastupki.
Košt kvadratnaha mietra žytła ŭ Miensku vyras za hod (sa studzienia 2025 hoda pa studzień 2026-ha) z $1636 da $ 2030, heta źviestki na asnovie realnych ździełak biez uliku pakojaŭ i dolej, a taksama ździełak ź niarynkavymi cenami.
Pry hetym sioleta ŭ studzieni rezka ŭpała kolkaść nabytych kvater — u paraŭnańni jak sa śniežniem, tak i sa studzieniem minułaha hoda.
Inšaja asablivaść minskaha rynku nieruchomaści apošnich miesiacaŭ — źnižeńnie prapanovy. Kali ŭ pačatku kastryčnika na prodaž było vystaŭlena bolš za 17 tysiač kvater, to ciapier, u pačatku sakavika, — tolki 7 tysiač.
Siarhiej Čały nazvaŭ zacišša na rynku «strajkam pakupnikoŭ», jaki adbyŭsia razam sa skaračeńniem prapanovy:
«Toje, što my zaraz nazirajem, voś hety maksimum — chutčej za ŭsio, heta pieršyja prykmiety taho, što hety rynak pierahrety. Całkam mahčyma, što my ŭbačym źnižeńnie nie na adzinki, a, moža być, navat na dvuchznačnyja ličby adsotkaŭ».
Ekśpiert źviarnuŭ uvahu, što kvatery daloka nie zaŭsiody sychodziać pa canie, vystaŭlenaj pradaŭcom. Adna sprava, kali nieruchomaść biaruć dla siabie, a inšaja — kali ŭ žytło prosta ŭkładajuć hrošy, to bok ździełka, hruba kažučy, nie haryć. Mienavita takija inviestycyjnyja pakupniki i mohuć źbić ceny.
Łohika takaja: u vypadku, kali vystaŭlenaja na prodaž kvatera doŭha nie pradajecca, pradaviec źnižaje canu. Jak skazaŭ Čały, dastatkova niekalkich ździełak, kab vyklikać łancuhovuju reakcyju. Pytańnie tolki ŭ tym, u kaho pieršaha zdaduć niervy: u pradaŭcoŭ, jakija zachočuć chutčej zakryć ździełku, ci ŭ pakupnikoŭ, jakija zatojacca ŭ nadziei na źnižeńnie cen.
«Kali ja maju racyju, to paśla taho, jak ceny pačnuć źnižacca, vy pakupnikoŭ ubačycie jašče mienš, bo navošta kuplać siońnia toje, što zaŭtra budzie jašče tańniejšaje? Heta pracuje sapraŭdy hetak ža, jak i pry roście, tolki ŭ advarotny bok», — padsumavaŭ Čały.
Ciapier čytajuć
Prosty biełarus ździviŭ ludziej, kali ŭ Hiermanii pryznavaŭsia ŭ lubovi da Łukašenki. Ale akazałasia, što jon niaprosty7
Kamientary