U Biełarusi ŭpieršyniu stali vykarystoŭvać bieśpiłotnyja hruzaviki
U Biełarusi ŭpieršyniu pačali vykarystoŭvać aŭtanomnyja hruzavyja elektramabili z elemientami štučnaha intelektu dla pieravozki tavaraŭ. Novaja sistema zapracavała ŭ raźmierkavalnym centry «Pryleśsie» pad Minskam, jaki absłuhoŭvaje handlovuju sietku «Dabranom», u skład jakoj uvachodziać kramy «Kapieječka», «Majak» i supiermarkiety «Dabranom», piša vydańnie «Naš portał».
Na terytoryi łahistyčnaha kompleksu ŭžo pracujuć 11 bieśpiłotnych elektrahruzavikoŭ. Jany pieravoziać realnyja tavary pamiž składami i zonami zachoŭvańnia biez udziełu kiroŭcaŭ. Mašyny pracujuć u niekalki źmien, siem dzion na tydzień.
Zamiest čałavieka kiravańnie ažyćciaŭlaje sistema štučnaha intelektu, jakaja vykarystoŭvaje kamiery, radary i lidary dla analizu navakolnaj prastory. Aŭtamabili zdolnyja raspaznavać ludziej, techniku i inšyja pieraškody, prahnazavać ich ruch, vybirać najbolš biaśpiečny maršrut i prystasoŭvacca da roznych umoŭ, naprykład da źmieny aśviatleńnia abo stanu darožnaha pakryćcia.
Pavodle raspracoŭščyka sistemy — kampanii «EvaKarha», prahramnaje zabieśpiačeńnie było stvorana na asnovie vopytu dziasiatkaŭ padobnych prajektaŭ. U kampanii śćviardžajuć, što za ŭvieś čas ekspłuatacyi takich bieśpiłotnikaŭ nie było zafiksavana avaryj abo inšych surjoznych zdareńniaŭ.
Pakul bieśpiłotnyja hruzaviki pracujuć tolki ŭ miežach łahistyčnaha centra. Jany pieravoziać šyroki asartymient pradukcyi — ad małočnych vyrabaŭ i napojaŭ da bytavoj chimii i siezonnych tavaraŭ.
U «Dabranomie» adznačajuć, što vykarystańnie novaj techniki ŭžo dazvoliła prykładna na 35 pracentaŭ skaracić ekspłuatacyjnyja vydatki. Heta stała mahčymym dziakujučy bolš dakładnamu płanavańniu maršrutaŭ, źnižeńniu vydatkaŭ na paliva za košt elektrapryvada, a taksama tamu, što mašyny mohuć pracavać bieź pierapynkaŭ i nie zaležać ad čałaviečaha faktaru.
Pry hetym u kampanii padkreślivajuć, što aŭtamatyzacyja nie aznačaje skaračeńnia supracoŭnikaŭ. Ich praca źmianiajecca: ciapier adzin apieratar moža dystancyjna kantralavać adrazu 10—12 bieśpiłotnych mašyn, sačyć za ŭzroŭniem zaradu akumulataraŭ, techničnym stanam transpartu i pry nieabchodnaści karektavać łahistyčnyja maršruty. Takim čynam, rabotniki pierachodziać ad niepasrednaha kiravańnia transpartam da funkcyj dyśpietčaraŭ i analitykaŭ.
U pierśpiektyvie kampanija płanuje pašyryć vykarystańnie bieśpiłotnikaŭ.
Kali ekspłuatacyja na terytoryi łahistyčnaha centra paćvierdzić svaju efiektyŭnaść, nastupnym etapam moža stać arhanizacyja aŭtanomnych pieravozak pamiž raźmierkavalnymi centrami i kramami ŭ Minskim rehijonie.
Ciapier čytajuć
Biełaruś užo nie tolki pra palitviaźniaŭ. Z čym Śviatłana Cichanoŭskaja pajechała na adzin z hałoŭnych forumaŭ pa biaśpiecy ŭ ZŠA i što tam rabiŭ Siarhiej Cichanoŭski1212
Kamientary