Biełaruska prasiła blizkich patrochu pieravozić u Polšču jaje źbieražeńni. A potym kupiła kvateru — i bank zabłakavaŭ 250 tysiač jeŭra

Chutčej za ŭsio, u banka ŭźnikli sumnievy ŭ ich lehalnaści: žančyna pradała majomaść u Biełarusi, pierajechała ŭ Polšču, a hrošy prasiła pryvozić joj najaŭnymi patrochu. Tak usio i sabrała. Jana raskazała Most, jak akazałasia ŭ takoj situacyi.

U 2022 hodzie siamja Viktoryi (imia źmieniena) vyrašyła pakinuć Biełaruś z-za bojazi palityčnaha pieraśledu. Na radzimie ŭ jaje byŭ biznes i nieruchomaść. Pierad adjezdam jana paśpieła štości pradać i aformić davieranaść. Paśla taho jak usio było pradadziena, jana prasiła blizkich pieravozić hrošy sumami, jakija nie pieravyšajuć 10 tysiač dalaraŭ za raz. Heta, jak viadoma, limit, jaki možna nie dekłaravać pry pierasiačeńni miažy.

— Hrošy kłali na bankaŭski rachunak taksama častkami — pa 30—50 tys. złotych (7—11 tysiač jeŭra ŭ ekvivalencie). Nijakich pytańniaŭ z boku banka nie ŭźnikała, — raskazvaje Viktoryja.

Žančyna atrymała polskaje hramadzianstva. Niadaŭna siamja vyrašyła kupić kvateru ŭ Varšavie. Viktoryja pryjšła ŭ adździaleńnie banka, kab pieravieści hrošy deviełapieru — 870 tys. złotych (kala 200 tysiač jeŭra). Jana pradstaviła supracoŭniku banka dahavor kupli-prodažu i inšyja dakumienty.

Pieravod byŭ ažyćcioŭleny, hrošy, zdavałasia, syšli z rachunku, ale da deviełapiera tak i nie dajšli. Paśla apłaty na rachunku ŭsio jašče pavinna było zastavacca bolš za 100 tys. złotych (47 tysiač jeŭra), ale i da ich žančyna nieŭzabavie straciła dostup. Ahułam zabłakavana akazałasia bolš za 1 miljon złotych.

Na rachunku Viktoryi byli nie tolki biełaruskija źbieražeńni. Jana atrymlivała dapamohu na dzicia 800+, zarpłatu, viartańnie padachodnaha padatku. Zaraz niedastupnyja ŭsie hrošy.

Na kolki ŭ Polščy mohuć zabłakavać rachunak

Zhodna z polskim zakanadaŭstvam, kali ŭ finansavaj arhanizacyi ŭźnikajuć padazreńni z nahody pachodžańnia hrošaj, jana abaviazana zapuścić pravierku pa zakonie ab supraćdziejańni admyvańniu srodkaŭ (AML). Na hetym etapie rachunak mohuć zabłakavać maksimum na 96 hadzin, heta značyć, na čaćviora sutak. Za hety čas bank paviedamlaje finansavy nahlad (GIIF). Kali spravu nie pieradajuć dalej, rachunak pavinny razbłakavać aŭtamatyčna.

Srodki Viktoryi zabłakavany ŭžo amal dva tydni. Značyć, chutčej za ŭsio, sprava pajšła ŭ prakuraturu.

Kali materyjały traplajuć u prakuraturu i tam ličać padazreńni abhruntavanymi, pačynajecca druhi etap. Prakuror maje prava zabłakavać rachunak užo ŭ ramkach kryminalnaj vytvorčaści — spačatku da šaści miesiacaŭ, a ŭ vyklučnych vypadkach padoŭžyć błakiroŭku jašče na šeść. U vyniku maksimalny termin moža dasiahać hoda.

Dziciačyja dapamohi błakiravacca nie pavinny, pakolki jany tolki pieraličvajucca baćkam, a vyłučajucca na dziaciej.

Jak paćvierdzić lehalnaść srodkaŭ

U biełastockim adździaleńni banka Viktoryju paprasili pradstavić dakumienty ab prodažy majomaści ŭ Biełarusi i daviedki ab usich dachodach.

— Ja pradstaviła daviedku ab dachodach za apošnija dziesiać hadoŭ i dahavor ab prodažy majomaści. Ale ŭ banku ŭsio roŭna zadali pytańni: čamu hrošy nie byli zadekłaravany pry pierasiačeńni miažy abo nie pieraniesieny naŭprost z rachunku biełaruskaha na polski? Pieravieści z rachunku ja nie mahła, tamu što ŭ hety momant u Biełarusi ŭžo nie znachodziłasia. A kali b hrošy dekłaravali ludzi, jakija pieravozili ich praź miažu, da ich byli b pytańni z boku biełaruskaj padatkovaj słužby: adkul u ich hrošy? Tamu byŭ adziny lehalny sposab — pieravozić ich častkami, nie dekłarujučy.

Viktoryja sprabavała vyśvietlić los svajoj spravy praź infaliniju banka i napisaŭšy list, ale pakul kankretnaj infarmacyi nie atrymała. Jana nie viedaje, ci zaviała prakuratura niejkuju spravu suprać jaje, a kali tak, to za što, pa jakim artykule i jakaja mienavita prakuratura.

Los damovy z deviełapieram pakul nieviadomy. Žančynie ŭžo telefanavała ryełtar z pytańniem, ci budzie jana płacić i kali.

• 0
• 1
• 4
• 17
• 4
• 11
• 13
• 0