«Biaru ŭsio, što pa źnižkach». Biełaruskaja piensijanierka raspaviała, što moža sabie dazvolić u emihracyi ŭ Varšavie

Halina [imia źmieniena] vyjšła na piensiju jašče ŭ Biełarusi, piać hadoŭ tamu. Ad biełaruskaj dziaržavy jana štomiesiac atrymlivaje piensiju ŭ pamiery 800 rubloŭ — heta prykładna 1 tysiača złotych, abo 235 jeŭra pa siońniašnim kursie. Akramia hetaha, piensijanierka pracuje nianiaj u siamji, dzie zarablaje 4 tysiačy złotych [935 jeŭra]. Pry luboj mahčymaści jana biare i dadatkovyja padpracoŭki.

U vyniku ahulny štomiesiačny dachod, na jaki moža raźličvać Halina, składaje kala 5 tysiač złotych [1170 jeŭra].

Na zdym žytła idzie pałova dachodaŭ

U Varšavie Halina aranduje maleńkuju kvateru płoščaj 27 kv. mietraŭ. Jana abychodzicca piensijaniercy ŭ 2,5 tys. złotych [585 jeŭra], uklučajučy kamunalnyja.

— Mebla ledź dychaje, nieabchodny ramont. Ale ja žyvu vielmi akuratna, — kaža žančyna. — [Zaraz] viadu pieramovy z haspadyniaj, jakaja choča padniać mnie płatu za arendu.

Internet i mabilnaja suviaź abychodziacca Halinie jašče prykładna ŭ 200 złotych.

Na prajezd biełaruska štomiesiac tracić 55 złotych [13 jeŭra] — kuplaje prajazny bilet na ŭsie vidy transpartu pa lhotnym taryfie dla piensijanieraŭ.

«Kuplaju małako, kašy, niešta miasnoje, frukty i harodninu»

U praduktovyja kramy Halina chodzić niačasta. Ulik vydatkaŭ na pradukty nie viadzie. Kaža, časam za raz vychodzić 20 złotych, časam — 50 [4,6 — 11,7 jeŭra]. Ale heta z ulikam taho, što žančynie davodzicca ekanomić.

— Kuplaju samaje tannaje, biaru ŭsio, što pa źnižkach. Zvyčajna — małako, kašy, niešta miasnoje, sadavinu i harodninu. Uvohule, biaru nie toje, što chaču, a toje, što mahu sabie dazvolić, — raspaviadaje jana. — A ŭ kafe i restarany nie chadžu ŭvohule.

«U adnym sekand-chendzie palito budzie kaštavać adzin złoty, a ŭ inšym — 20»

Harderob piensijanierka taksama abnaŭlaje nie časta. A kali treba heta zrabić, addaje pieravahu sekand-chendam, dzie adzieńnie tańniejšaje.

— Suma [u čeku] zaležyć ad sekand-chenda: u adnym palito budzie kaštavać adzin złoty, a ŭ inšym — 20 [4,6 jeŭra], — kaža jana. — Voś takija sumy atrymlivajucca.

Kaśmietyku i srodki hihijeny žančyna kuplaje pa nieabchodnaści i taksama pa akcyjach.

Za abśledavańni davodzicca dapłačvać

U Haliny jość bazavy pakiet u miedycynskim centry LuxMed, jaki abychodzicca ŭ 266 złotych u miesiac [62 jeŭra]. Adnak jon pakryvaje nie ŭsie analizy i pracedury, tamu piensijaniercy niaredka davodzicca dadatkova apłačvać abśledavańni.

Akramia taho, u jaje jość prablemy sa zdaroŭjem, jakija možna vyrašyć tolki z dapamohaj darahoj apieracyi. Na jaje ŭ Haliny pakul niama srodkaŭ.

— Naprykład, mnie nie ŭzialisia pa NFZ (dziaržaŭnaj strachoŭcy.) vydalić žoŭtyja plamki (plamy) z voka. I heta budzie kaštavać ad 2,5 tys. da 10 tys. złotych za adzin ukoł [585 — 2340 jeŭra], — kaža jana. — Ja nie hatova takija sumy razdavać.

Zumba, bačata i biaspłatnaje kino

Navat pry abmiežavanych finansach Halina starajecca znachodzić mahčymaści dla adpačynku ŭ polskaj stalicy, vybirajučy biaspłatnyja zabavy i mierapryjemstvy.

— Šmat biaspłatnych muziejaŭ u roznyja dni tydnia, biaspłatnaja muzyka ŭ roznych miescach Varšavy i zimoj, i letam. Tancy — zumba, bačata — pa niadzielach, — kaža jana. — Učora była ŭ kino, dzie oskaraŭskija filmy [pakazvajuć] biaspłatna. Nastupny sieans budzie 25 sakavika. A pamiž imi biaspłatna možna hladzieć polskija filmy ŭ Dom Sztuki (Domie mastactvaŭ) u [varšaŭskim rajonie] Ursynaŭ.

• 11
• 0
• 0
• 1
• 0
• 7
• 0
• 4