Pientahon zdoleŭ zdabyć sakretnuju rasijskuju zbroju, jakaja vyklikaje «havanski sindrom», i pratestavaŭ na žyviołach

Amierykanskija ahienty pad prykryćciom nabyli praz rasijskuju kryminalnuju sietku mikrachvalevuju zbroju, zdolnuju vyklikać paškodžańni mozhu. Pra heta amierykanskamu telekanału CBS News paviedamili try niezaležnyja krynicy z roznych dziaržaŭnych viedamstvaŭ.

15 miljonaŭ dalaraŭ na zakupku vydzieliŭ Pientahon.

Choć kankretnaja pryłada, jakuju jany nabyli, nie była niepasredna źviazanaja ź jakoj-niebudź asobnaj atakaj, što pryviała da anamalnych incydentaŭ sa zdaroŭjem, jana vykarystoŭvaje technałohiju pulsavaha mikrachvalevaha vypramieńvańnia. Mienavita jano, pavodle słoŭ krynic, patencyjna moža vyklikać simptomy «havanskaha sindromu».

Jak śćviardžaje adna z krynic, raniej u CRU panavała dumka, što aparat, zdolny vyklikać takija paškodžańni mozhu, pavinien być pamieram z hruzavik. Heta dazvalała skieptykam nastojvać, što šmatlikija vypadki, što byli zafiksavanyja ŭ roznych krainach śvietu, nie mohuć być vynikam naŭmysnych atak.

Sakretnaja zbroja

Adnak zdabyty ŭzor abvierh hetyja teoryi. Pavodle źviestak krynic, mikrachvalevaja zbroja, atrymanaja ahientami ŭ 2024 hodzie, partatyŭnaja. Jaje lohka schavać, i jana spažyvaje adnosna mała enierhii.

Pryłada zusim nie nahadvaje zbroju pa svaim vyhladzie. Jana pracuje biasšumna i nie vypracoŭvaje ciapła tak, jak heta robić zvyčajnaja mikrachvalevaja piečka. Pa sutnaści, heta chutčej elektronnaje abstalavańnie, čym zbroja. Jano moža kiravacca dystancyjna i prabivać chvalami ścieny ci vokny na adlehłaści da 100 mietraŭ.

Pavodle słoŭ krynic, klučom da efiektyŭnaści hetaj pryłady źjaŭlajecca nie stolki aparatnaja častka, kolki prahramnaje zabieśpiačeńnie. Śpiecyjalny soft farmuje unikalnuju elektramahnitnuju chvalu, jakaja rezka ŭzdymajecca i padaje, utvarajučy chutkija impulsy. Mienavita takaja pulsacyja ŭździejničaje na miakkija tkanki mozhu, vyklikajučy ciažkija nieŭrałahičnyja simptomy.

Prafiesar Stenfardskaha ŭniviersiteta Devid Rełman, jakoha ŭrad ZŠA pryciahvaŭ da rasśledavańnia, adznačyŭ, što rasijskija navukoŭcy dziesiacihodździami ŭdaskanalvali hetuju kancepcyju. Jašče savieckija daśledčyki ŭstanavili, što pulsacyja enierhii dazvalaje elektryčna stymulavać tkanki mozhu i navat serca, imitujučy naturalnyja sihnały arhanizma, ale naviazvajučy ich zvonku. Čałaviek pry hetym adčuvaje, što niešta adbyvajecca niepasredna ŭ jaho ŭ hałavie.

Historyja «havanskaha sindromu»

Z 2016 hoda sotni amierykanskich supracoŭnikaŭ paviedamlali pra zahadkavyja prystupy: hałaŭny bol, hałavakružeńnie, stratu słychu i kahnityŭnyja parušeńni. Hety fienomien atrymaŭ nazvu «havanski sindrom», bo jaho pieršyja vypadki byli zafiksavanyja ŭ pasolstvie ZŠA na Kubie.

Isnujuć videazapisy z kamier nazirańnia, na jakich zafiksavanyja mahčymyja ataki. Na adnym zapisie, zroblenym u Stambule, vidać, jak dvoje ahientaŭ FBR, jakija abiedali ŭ restaranie ź siemjami, adnačasova chapajucca za hałovy ad bolu paśla taho, jak u zału zajšoŭ mužčyna z zaplečnikam. Inšaje videa ź Vieny pakazvaje supracoŭnikaŭ, jakija raptoŭna padajuć na leśvicy kala abjekta, jaki achoŭvajecca.

Pra mahčymyja ataki raskazaŭ i adstaŭny padpałkoŭnik VPS ZŠA Krys, jaki pracavaŭ nad sakretnymi prahramami spadarožnikaŭ-špijonaŭ. U 2020 hodzie ŭ svaim domie ŭ Paŭnočnaj Virdžynii jon niekalki razoŭ na praciahu piaci miesiacaŭ adčuŭ raptoŭnyja simptomy.

Pa jaho słovach, adčuvańnie było takoje, nibyta jaho ŭdaryli pad dych. U mužčyny zakłała levaje vucha, a pa levaj ruce pajšli vostryja bolevyja impulsy. Paśla hetaha Krysu daviałosia štodnia prymać nieŭrałahičnyja leki.

Surjoznyja prablemy sa zdaroŭjem źjavilisia i ŭ jaho žonki Chajdzi. Jana raskazała, što ŭ studzieni raptam pračnułasia z mocnymi bolami ŭ sustavach. Paźniej daktary dyjahnastavali astealiz — razbureńnie kaściavoj tkanki ŭ plačach, što patrabavała chirurhičnaha ŭmiašańnia.

Pavodle krynic «60 Minutes», zasakrečanuju zbroju bolš za hod vypraboŭvajuć u amierykanskaj vajskovaj łabaratoryi. Ekśpierymienty na pacukach i aviečkach pakazali paškodžańni, padobnyja da tych, jakija vyjaŭlajuć u ludziej ź simptomami «havanskaha sindromu».

Niahledziačy na šmatlikaść padobnych vypadkaŭ, urad ZŠA doŭhi čas sumniavaŭsia, što havorka idzie pra naŭmysnyja ataki. U 2023 hodzie aficyjnaja acenka raźviedki pryjšła da vysnovy, što «vielmi małaimavierna», kab za «havanskim sindromam» stajała zamiežnaja dziaržava.

Adnak byłyja aficery CRU śćviardžajuć, što rasśledavańnie naŭmysna tarmaziłasia, kab «źbić hradus» napružanaści.

Krynicy papiaredžvajuć: toje, što ahienty pad prykryćciom zmahli kupić takuju zbroju ŭ kryminalnikaŭ, śviedčyć pra toje, što Rasija albo straciła kantrol nad technałohijaj, albo naŭmysna raspaŭsiudžvaje jaje. Ciapier niebiaśpiečnaja pryłada moža apynucca ŭ rukach kaho zaŭhodna. Ofis dyrektara nacyjanalnaj raźviedki ZŠA zajaviŭ, što rasśledavańnie budzie daviedziena da kanca, kab vyśvietlić usiu praŭdu.

• 3
• 0
• 1
• 3
• 12
• 0
• 9
• 1