«Бяру ўсё, што па зніжках». Беларуская пенсіянерка распавяла, што можа сабе дазволіць у эміграцыі ў Варшаве
Галіне 63 гады. У Польшчу яна пераехала ў 2021 годзе. Сёння жанчына жыве ў Варшаве, працуе і атрымлівае пенсію. Яна распавяла Most пра свае даходы, пра тое, што можа дазволіць сабе на гэтыя грошы і ад чаго даводзіцца адмаўляцца.
Галіна [імя зменена] выйшла на пенсію яшчэ ў Беларусі, пяць гадоў таму. Ад беларускай дзяржавы яна штомесяц атрымлівае пенсію ў памеры 800 рублёў — гэта прыкладна 1 тысяча злотых, або 235 еўра па сённяшнім курсе. Акрамя гэтага, пенсіянерка працуе няняй у сям'і, дзе зарабляе 4 тысячы злотых [935 еўра]. Пры любой магчымасці яна бярэ і дадатковыя падпрацоўкі.
У выніку агульны штомесячны даход, на які можа разлічваць Галіна, складае каля 5 тысяч злотых [1170 еўра].
На здым жытла ідзе палова даходаў
У Варшаве Галіна арандуе маленькую кватэру плошчай 27 кв. метраў. Яна абыходзіцца пенсіянерцы ў 2,5 тыс. злотых [585 еўра], уключаючы камунальныя.
— Мэбля ледзь дыхае, неабходны рамонт. Але я жыву вельмі акуратна, — кажа жанчына. — [Зараз] вяду перамовы з гаспадыняй, якая хоча падняць мне плату за арэнду.
Інтэрнэт і мабільная сувязь абыходзяцца Галіне яшчэ прыкладна ў 200 злотых.
На праезд беларуска штомесяц траціць 55 злотых [13 еўра] — купляе праязны білет на ўсе віды транспарту па льготным тарыфе для пенсіянераў.
«Купляю малако, кашы, нешта мясное, фрукты і гародніну»
У прадуктовыя крамы Галіна ходзіць нячаста. Улік выдаткаў на прадукты не вядзе. Кажа, часам за раз выходзіць 20 злотых, часам — 50 [4,6 — 11,7 еўра]. Але гэта з улікам таго, што жанчыне даводзіцца эканоміць.
— Купляю самае таннае, бяру ўсё, што па зніжках. Звычайна — малако, кашы, нешта мясное, садавіну і гародніну. Увогуле, бяру не тое, што хачу, а тое, што магу сабе дазволіць, — распавядае яна. — А ў кафэ і рэстараны не хаджу ўвогуле.
«У адным сэканд-хэндзе паліто будзе каштаваць адзін злоты, а ў іншым — 20»
Гардэроб пенсіянерка таксама абнаўляе не часта. А калі трэба гэта зрабіць, аддае перавагу сэканд-хэндам, дзе адзенне таннейшае.
— Сума [у чэку] залежыць ад сэканд-хэнда: у адным паліто будзе каштаваць адзін злоты, а ў іншым — 20 [4,6 еўра], — кажа яна. — Вось такія сумы атрымліваюцца.
Касметыку і сродкі гігіены жанчына купляе па неабходнасці і таксама па акцыях.
За абследаванні даводзіцца даплачваць
У Галіны ёсць базавы пакет у медыцынскім цэнтры LuxMed, які абыходзіцца ў 266 злотых у месяц [62 еўра]. Аднак ён пакрывае не ўсе аналізы і працэдуры, таму пенсіянерцы нярэдка даводзіцца дадаткова аплачваць абследаванні.
Акрамя таго, у яе ёсць праблемы са здароўем, якія можна вырашыць толькі з дапамогай дарагой аперацыі. На яе ў Галіны пакуль няма сродкаў.
— Напрыклад, мне не ўзяліся па NFZ (дзяржаўнай страхоўцы.) выдаліць жоўтыя плямкі (плямы) з вока. І гэта будзе каштаваць ад 2,5 тыс. да 10 тыс. злотых за адзін укол [585 — 2340 еўра], — кажа яна. — Я не гатова такія сумы раздаваць.
Зумба, бачата і бясплатнае кіно
Нават пры абмежаваных фінансах Галіна стараецца знаходзіць магчымасці для адпачынку ў польскай сталіцы, выбіраючы бясплатныя забавы і мерапрыемствы.
— Шмат бясплатных музеяў у розныя дні тыдня, бясплатная музыка ў розных месцах Варшавы і зімой, і летам. Танцы — зумба, бачата — па нядзелях, — кажа яна. — Учора была ў кіно, дзе оскараўскія фільмы [паказваюць] бясплатна. Наступны сеанс будзе 25 сакавіка. А паміж імі бясплатна можна глядзець польскія фільмы ў Dom Sztuki (Доме мастацтваў) у [варшаўскім раёне] Урсынаў.
Цяпер чытаюць
У дзень, калі памілавалі палітвязня Дароніна, ягонай жонцы прысудзілі 8,5 гадоў калоніі за ўдзел у дваровым чаце4
Каментары
Palityki prychodziać, ščyra robiać na narod, jak i abiacajuć ( usio česna, kamar nosa nie padtočyć), i sychodziać. Uzrovień žyćcia efiektyŭna i sa śvistam liacić adpaviedna dołu.
Takoje ŭražannie, što niejdzie ŭžo dali kamandu, "ratujsia, chto moža", prosta nia ŭsie jaje poki pačuli...