«Dapamoha» Kalehavaj zapuściła novuju płatformu dla zboraŭ — z nulavoj kamisijaj. Na što źbirajuć pieršyja hrošy?
Arhanizacyja «Dapamoha», jakaja z vosieni 2020 hoda dapamahaje biełarusam u Litvie, abviaściła pra rebrendynh i zapusk ułasnaj ličbavaj płatformy. Arhanizatary abiacajuć, što 100% achviaravańniaŭ buduć traplać naŭprost da tych, kamu jany pryznačalisia. Kiraŭnica «Dapamohi» Natalla Kalehava raskazała, u čym ideja prajekta.
Aficyjny zapusk novaha servisu prymierkavali da Dnia Voli. «Dapamoha» bolš nie budzie prymać srodki na svaje ŭłasnyja rachunki abo niejak rasparadžacca imi. Usie danaty buduć iści adrasatu, što aznačaje nulavuju kamisiju z boku samoj arhanizacyi.
Karystalniki mohuć sami stvarać zbory, samastojna padklučajučy ŭłasnyja płaciežnyja instrumienty (naprykład, Stripe). Pry hetym kožnaja kampanija budzie prachodzić abaviazkovuju papiaredniuju pravierku, a ŭdzielnikaŭ buduć vieryfikavać praź sistemu Dapamoga ID.
Kiraŭnica «Dapamohi» Natalla Kalehava tłumačyć taki krok minimizacyjaj ryzyk i baraćboj sa śpiekulacyjami: «My viedajem, nakolki važny davier. Ale adna sprava, kali my źbirajem na patreby arhanizacyi, a inšaja — sabrać hrošy dla ludziej. Ciapier u našych supolnaściach prablemy z davieram, tamu my vyrašyli stvaryć prazrystuju płatformu, dzie bačny kožny jeŭra». Pakul što novaja płatforma pracuje ŭ piłotnym režymie na admysłovaj staroncy arhanizacyi.
Pieršy i hałoŭny zbor ciapier — heta kampanija pa arhanizacyi azdaraŭlenčaha retrytu dla byłych palitźniavolenych biełarusak. Prajekt startuje ŭžo 1 krasavika na Kanarskich astravach i praciahniecca miesiac. Byłym palitźniavolenym prapanujuć terapieŭtyčnuju padtrymku, adnaŭlenčyja praktyki i prosta biaśpiečnuju prastoru dla fizičnaj i psichałahičnaj adaptacyi paśla turmy.
Pa stanie na 30 sakavika nieabyjakavyja biełarusy ŭžo sabrali na hetyja mety 8 900 jeŭra, ale zbor jašče praciahvajecca.
«Naša Niva» — bastyjon biełaruščyny
PADTRYMAĆ«Nie prosta adpačynak, a lačeńnie dušy». Natalla Kalehava arhanizavała adpačynak na Kanarach dla žančyn-palitviaźniaŭ
Na ekstranny zbor na dapamohu vyzvalenym palitviaźniam sabrana 90 tysiač jeŭra
Ułady patłumačyli, čamu likvidavali arhanizacyju «KinderVita», jakaja dapamahała dzieciam, chvorym na rak
Hałoŭnym śpikieram Žanočaha forumu ŭ Minsku stanie rasijski kryndžovy psichołah, jaki raskazvaŭ pra «pamiać žanočych pałavych hub»12
Kamientary