«Nie prosta adpačynak, a lačeńnie dušy». Natalla Kalehava arhanizavała adpačynak na Kanarach dla žančyn-palitviaźniaŭ

Pavodle Natalli Kalehavaj, z mužam Alaksandram jany davoli daŭno ŭžo naviedvajuć Kanarskija astravy, «byli surjoznyja prablemy sa zdaroŭjem, a tam asabista adčuli, jak u hetym miescy zdaroŭje dziŭnym čynam adnaŭlajecca».

U pieršy hod vajny «tudy z nami pajechała maja blizkaja siabroŭka z Ukrainy, psichołah vielmi vysokaj kvalifikacyi, jakaja bačyła bambiožki, razburanyja damy, bačyła vajnu». «Jana sapraŭdy adnaŭlałasia tam, prosta na našych vačach. Mienavita tady ŭ mianie ŭpieršyniu źjaviłasia ideja — arhanizoŭvać retryty na Kanarach. Spačatku hladzieła na heta jak na mahčymy biźnies, ale potym zrazumieła, što takija retryty mohuć stać zapatrabavanaj humanitarnaj inicyjatyvaj», — raspaviała Natalla Kalehava. 

Pavodle kiraŭnicy Dapamoga, asabliva jasna heta stała ŭ 2025 hodzie, kali ŭ Litvu pačali prybyvać departavanyja palitviaźni, u ich byŭ vielizarny stres ad niepadrychtavanaha pierajezdu, ludziej praciahvała «łamać» navat praz paŭhoda ci hod žyćcia ŭ ES. 

Jak skłałasia suma ŭ 20 000 jeŭra

Natalla Kalehava kaža pra sumu ŭ 20 000 jeŭra na miesiac, kab vyvozić na retryt na Kanary byłych palitviaźniaŭ — ź siemjami, ź dziećmi abo paasobku. Havorka pra 20 čałaviek u adnoj pajezdcy. 

Viła ŭžo jość: «Padčas majoj pajezdki na Kanary naprykancy minułaha hoda ŭsio nibyta skłałasia samo saboj. Na adnym z astravoŭ ja paznajomiłasia z uładalnikam vialikaha i pryhožaha doma. Kali ja ŭbačyła hetaje miesca — z vyhladam na akijan i hory, z najčyściejšym pavietram i draŭlanaj łaźniaj — ja zrazumieła, što heta moža stać praciaham toj historyi kłopatu, jakuju ŭžo bolš za piać hadoŭ stvaraje Dapamoga». 

Pavodle Kalehavaj, dziakujučy simpatyi ŭładalnika da biełarusaŭ udałosia damovicca pra śpiecyjalnyja ŭmovy, «kali raźmiaścić u domie kala 20 čałaviek, košt pražyvańnia na miesiac składzie prykładna 250—300 jeŭra na čałavieka».

Adkul tady 20 000 na miesiac?

«Davajcie raskažu, z čaho naohuł składajecca suma, jakuju ja ŭkazała. Košt viły na siońniašni dzień — 5000 jeŭra ŭ miesiac, adsiul 250 na čałavieka. Košt avijakvitkoŭ, na žal, vyras, my pačynali ich kuplać pa 130 jeŭra, pa roznych abstavinach my nie mahli ŭsim adnačasova nabyć, ciapier jany dasiahajuć 350—400 jeŭra, — tłumačyć Natalla Kalehava. — Dalej nastupnyja vydatki — jak minimum, 10 jeŭra na ježu na čałavieka ŭ dzień, adpaviedna, 200—300 jeŭra na čałavieka. Atrymlivajecca, kala 7 ź lišnim tysiač sydzie tolki na pradukty charčavańnia. Heta nie pra kafe i restarany, my budziem kuplać pradukty, a dziaŭčaty buduć hatavać sami». 

Pavialičyć

Potym idzie arenda mašyn — 1800 jeŭra, jak viadoma, na tym ža Teneryfie «niemahčyma žyć biez mašyny, tam usiudy treba pieramiaščacca na joj». «My biarom try niedarahija mašyny na ŭsiu hrupu. Kali raptam spatrebiacca mašyny dla ŭsich dvaccaci čałaviek adnačasova, to tam praściej na adzin dzień arandavać jašče aŭtamabil. Čamu niekalki — u nas nie budzie niejkaj ahulnaj prahramy, kštałtu, usie jeduć na plaž abo ŭsie abaviazkova jeduć na vułkan. Ludzi majuć prava žyć u svaim, kamfortnym dla kožnaha, režymie», — skazała Natalla Kalehava. 

400 jeŭra prykładna sydzie na paliva, u košt taksama zakładzienyja dźvie niedarahija ekskursii, adna — 12 jeŭra na čałavieka, druhaja — 44 jeŭra. 

«Taksama tam budzie psichołah, u ich tam budzie joha. I važna, što heta nie prosta adpačynak, heta i reabilitacyja. Psichołah užo abmiarkoŭvaje važnyja dla dziaŭčat temy. Zrazumieła, heta biaspłatna, śpiecyjalisty jeduć jak vałanciory, — raspaviadaje Natalla Kalehava. — Atrymlivajecca, viła — heta samaje niedarahoje ŭ hetym retrycie. Bilety i charčavańnie składajuć hałoŭnyja vydatki. 

Ale pieršaja pajezdka — piłotny, skažam tak, prajekt. Paśla jaje stanie jasna, jakija dakładna vydatki mohuć być. Ale, dumaju, 1000 jeŭra na čałavieka ź biletami vyjdzie. Na moj pohlad, heta prymalnaja cana dla miesiaca na vostravie. Dzie možna adpačyć u režymie «ŭsio ŭklučana» za tysiaču ŭ miesiac? Tym bolš, kali my havorym pra ludziej, jakija i ciapier nie ŭ raskošy dakładna znachodziacca, ludziej paśla turmaŭ i ŭ emihracyi, a tut — viła, jość ježa i dach nad hałavoj, jość kamfort, jość śvitanki i zachody la akijana». 

Pakul tolki žančyny

Pieršaja piłotnaja hrupa žančyn — byłych palitviaźniaŭ pajeduć na Kanarskija vyspy ŭžo ŭ krasaviku. «Ja naohuł spačatku nie dumała, što budu tolki dla žančyn heta rabić. Pieršapačatkova ja dumała, što heta budzie dla ŭsich palitviaźniaŭ, ale potym skłałasia takaja historyja. Pakul tak.

Treba jašče razumieć, što, jak akazałasia, znajści voś tak 20 čałaviek, jakija mohuć pajechać na miesiac i ŭ jakich na rukach jość dakumienty, nie tak prosta. Nie ŭsie mohuć sabie dazvolić na miesiac adarvacca ad usiaho, ad pracy, ad siamji, — tłumačyć Natalla Kalehava. — Tut ža jašče takaja situacyja, što jašče važna znajści, chto z kim siadzieŭ i chto z kim u kanfliktach byŭ ci nie byŭ. Sumiaščalnaść. 

Ja ŭžo navat pa «Zamku» viedaju hetuju prablemu. U žančyn heta krychu nie tak. I pakul my biarom tolki ludziej, jakija źjaŭlajucca palitviaźniami z kałonij. Ale tak, chaciełasia b, kab heta naohuł stała normaj. Ale my nie možam sabie dazvolić zdymać hetuju viłu štomiesiac. Jašče adzin abjekt ciahnuć samim, akramia katedža, jaki viadomy pad imiem «Zamak», — heta praktyčna niemahčyma. Voś tamu tak».

«5—10 jeŭra — nievialikaja suma, a sprava — nieacennaja»

«Heta takaja pierazahruzka, ty vychodziš zusim u inšy stan. Ty razumieješ, što ty narešcie viartaješ u svajoj hałavie raŭnavahu, narešcie prychodziš u paradak krychu va ŭsim hetym. Sam pa sabie vostraŭ taki, dy j niama adčuvańnia, što prosta zaŭtra treba adsiul źjazdžać, usio ž miesiac — heta niadrenna, — kaža jana. — Dumaju, heta patrebnaja reč.

Darečy, apošni raz, kali ja pryjechała z vyspaŭ, zajechała ŭ «Zamak», a tam usio ŭ paradku, tam žychary, viedajecie, vydatna bieź mianie spraŭlalisia, to-bok ja ŭžo tam pastajanna i nie patrabujusia. Tam naładžanaja sistema. Adpaviedna, zachaciełasia zrabić jašče niešta patrebnaje. Chacia, kaniešnie, nie čakała, što ŭ mnohich ludziej buduć takija admoŭnyja vodhuki ŭ sacsietkach na maju inicyjatyvu.

Ja čytaju roznaje taksama, časam zasmučajusia, ale potym pierastaju. Naš «Zamak» žyvie tolki za košt danataŭ, nu i za košt našych z mužam ułasnych srodkaŭ — my addali darahuju ŭłasnaść u karystańnie i za heta ničoha ni z kaho, ułasna, nie biarom. I kali, zdavałasia b, ty ŭžo za čatyry ź lišnim hady dakazaŭ, što ty pavodziš siabie sumlenna, usio roŭna chtości ciabie abvinavačvaje ŭ niejkich tajnych intaresach. Nu, heta ludzi». 

Pavialičyć

Natalla Kalehava ad imia Dapamoga prosić finansavaj padtrymki dla realizacyi hetaj inicyjatyvy:

«Pahladzim, jak dalej budzie. Ciapier u nas viła apłačanaja i bilety, mašyny zareziervavanyja. Nie źbiarom na ŭsio astatniaje — nu, značyć, sami znoŭ apłacim. U mianie 31 sakavika jubilej — 60 hadoŭ. I ja prašu ludziej, jakim my dapamahli ŭ svoj čas tut — a heta bolš za 2000 čałaviek, słuchajcie, 10 jeŭra — nievialikaja suma, bo kali b usie, kamu my dapamahli tym ci inšym čynam, zadanacili b mnie ŭ dzień naradžeńnia pa 5—10 jeŭra, to, viedajecie, u nas nie było b zusim nijakaj prablemy.

My mahli b tady kožny miesiac, kožnyja dva miesiacy dakładna vazić ludziej. Ale ja nie kryŭdžusia na ludziej, kali jany nie adhukajucca. Chtości mianie nie lubić, jak kažuć, za toje, što ja siabruju ź Cichanoŭskaj, chtości za toje, što ja nie siabruju ź Cichanoŭskaj, chtości za niešta jašče. Ludzi znachodziać sabie roznyja nahody». 

Padtrymać prajekt možna pa hetaj spasyłcy.

• 2
• 0
• 0
• 0
• 0
• 0
• 0
• 0